ନୂଆଦିଲ୍ଲୀ,୨୨।୯: ଆଇପିଏଲ୍ ୨୦୨୧ର ଦ୍ୱିତୀୟ ପର୍ଯ୍ୟାୟର ତୃତୀୟ ମୁକାବିଲାରେ ରାଜସ୍ଥାନ ରୟାଲ୍ସ ବାଜିମାତ କରିଥିଲା। ଏହି ବିଜୟ ପରେ ଚର୍ଚ୍ଚାରେ ଭାରତର ଯୁବ ପେସର କାର୍ତ୍ତିକ ତ୍ୟାଗି। ସେ ମ୍ୟାଚ୍ର ଶେଷ ଓଭରରେ ଦୁଇ ଉଇକେଟ ନେଇ ମ୍ୟାଚ୍ର ଭାଗ୍ୟ ବଦଳାଇ ଦେଇଥିଲେ। ଏହାକୁ ନେଇ ତାଙ୍କର ପ୍ରଶଂସା କରାଯାଉଛି। ତେବେ କାର୍ତ୍ତିକଙ୍କ ପାଇଁ କ୍ରିକେଟରେ ନିଜ ଭାଗ୍ୟ ନିରୂପଣ କରିବା ସେତେଟା ସହଜ ନ ଥିଲା।
କାର୍ତ୍ତିକ ବାପାଙ୍କ ଫାର୍ମରେ କାମ କରୁଥିଲେ। ଏଥିସହ କ୍ରିକେଟ ମଧ୍ୟ ଖେଳୁଥିଲେ। ୨୦୧୭-୧୮ରେ ରଣଜୀ ଟ୍ରଫି ଖେଳିବା ସମୟରେ ସବୁକିଛି ଠିକ୍ ଥିଲା। ହେଲେ ୟୁପି ରଣଜୀ ଟିମ୍ର ଏଲହି ଦ୍ରୁତ ବୋଲର ଆହତ ହୋଇଥିଲେ। ଦୀର୍ଘ ୧୧ ମାସ ଧରି ସେ ଉକ୍ତ ସମସ୍ୟା ସହ ଲଢ଼ିଥିଲେ।
ଆହତ ହେବା ପରେ କାର୍ତ୍ତିକଙ୍କୁ ଲଗାତାର ଭାବେ ଡାକ୍ତର ବଦଳାଇବା ପଡ଼ୁଥିଲା। ସେ ଚିକିତ୍ସା ପାଇଁ ଦିଲ୍ଲୀ ଆସୁଥିଲେ। ଏଭଳି ସମୟ ଥିଲା ଯାଆସ କରିବା ଲାଗି ତାଙ୍କ ପାଖରେ ଟଙ୍କା ନ ଥିଲା। ସେତେବେଳେ କାର୍ତ୍ତିକଙ୍କ ବାପା ଯୋଗେନ୍ଦ୍ର ତ୍ୟାଗି ନିଜ ଜମି ବିକି ପୁଅଙ୍କୁ ସୁସ୍ଥ କରିଥିଲେ। ସେ ନିଜ ପୁଅ କ୍ୟାରିୟର ଖରାପ ନ ହେଉ ସେଥିପ୍ରତି ଯତ୍ନବାନ ଥିଲେ। ୬ ମାସ ଯାଏ ଉନ୍ନତି ନ ଆସିବାରୁ ସେ ଏନ୍ସିଏ ଯାଇଥିଲେ। ଏହାପରେ ସେ ଅଣ୍ଡର-୧୯ ଦଳକୁ ଫେରିଥିଲେ।
ପୁଣିଥରେ ସୁସ୍ଥ ହୋଇ ଫେରିବା ପରେ କାର୍ତ୍ତିକ ଉଲ୍ଲେଖନୀୟ ପ୍ରଦର୍ଶନ କରିଥିଲେ। ଭାରତୀୟ ଟିମ୍ରେ ତାଙ୍କୁ ନେଟ ବୋଲର ଭାବେ ସ୍ଥାନ ମିଳିଥିଲା। ଏହାପରେ ଆଇପିଏଲରେ ରାଜସ୍ଥାନ ତାଙ୍କୁ ନିଜ ଟିମ୍ରେ ସାମିଲ କରିଥିଲା। ଏଯାବତ ସେ ୧୨ ମ୍ୟାଚ୍ ଖେଳି ୧୨ ଉଇକେଟ ନେଇ ସାରିଲେଣି।
ଉତ୍ତରପ୍ରଦେଶର ଏକ ଛୋଟ ସହର ହାପୁଡରେ ଜନ୍ମିତ କାର୍ତ୍ତିକଙ୍କ ଜୀବନ କଠିନ ପରିସ୍ଥିତିରେ ଆରମ୍ଭ ହୋଇଥିଲା ସତ, ହେଲେ ଏବେ ସେ ସଫଳତାର ଶିଡି ଚଢ଼ିବାରେ ଲାଗିଛନ୍ତି। ଏହି ଖେଳାଳିଙ୍କୁ ନେଇ ଚର୍ଚ୍ଚା ବଢ଼ିବାରେ ଲାଗିଛି। ଏଣୁ ଭବିଷ୍ୟତରେ ସେ ଭାରତୀୟ ଟିମ୍ରେ ସ୍ଥାନ ପାଇବା ସୁନିଶ୍ଚିତ ବୋଲି କୁହାଯାଉଛି।
