ଯୋଡ଼ା,୨୩।୧୧(ଡି.ଏନ.ଏ.): କେନ୍ଦୁଝର ଜିଲା ଯୋଡ଼ା ପୌରପାଳିକାରେ ପୂର୍ବତନ ଚମ୍ପୁଆ ବିଧାୟକ ଜିତୁ ପଟ୍ଟନାୟକ, ପୂର୍ବତନ ଏମ୍ପି ଧନୁର୍ଜୟ ସିଂ ଲାଗୁରି ଓ ସହରର ବିଶିଷ୍ଟ ବ୍ୟକ୍ତିମାନଙ୍କ ସହଯୋଗରେ ୨୦୧୮ରେ ପ୍ରଥମ କରି ଯୋଡ଼ା ମହୋତ୍ସବ ଆରମ୍ଭ ହୋଇଥିଲା। ଦୁଇ ବର୍ଷ ହେଲା କରୋନା ମହାମାରୀ ଯୋଗୁ ମହୋତ୍ସବ ପାଳନ ହୋଇପାରି ନ ଥିଲା। ତେଣୁ ଚଳିତ ବର୍ଷ ଏହି ମହୋତ୍ସବ ପାଳନ ପାଇଁ ପ୍ରାରମ୍ଭିକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ମଙ୍ଗଳବାର ଯୋଡ଼ା ପୌରପାଳିକା ସଭାଗୃହରେ ନଗରପାଳ ଜଗଦୀଶ ପ୍ରସାଦ ସାହୁଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ ହୋଇଥିଲା। ମହୋତ୍ସବ କମିଟିର ସଂଯୋଜକ ସୁଶାନ୍ତ କୁମାର ବାରିକ ପୂର୍ବ ବର୍ଷର ସମସ୍ତ କାର୍ଯ୍ୟଧାରା ଓ କାର୍ଯ୍ୟକ୍ରମର ବିବରଣୀ ପାଠ କରିଥିଲେ। ଆସନ୍ତା ଜାନୁୟାରୀ ୧୯ରେ ଏହି ମହୋତ୍ସବ ୪ ଦିନ ବ୍ୟାପି କରାଯିବା ନେଇ ସର୍ବସମ୍ମତି କ୍ରମେ ସ୍ଥିର କରାଯାଇଥିଲା। ବୈଠକରେ ନଗରପାଳଙ୍କ ସମେତ ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ, ମହିଳା ମହାସଂଘର ସଦସ୍ୟ ଓ ଖବର ଦାତାଙ୍କ ସମେତ ବୁଦ୍ଧିଜୀବୀମାନେ ଉପସ୍ଥିତ ଥିଲେ।
