ଯୋଡ଼ା, ୨୮।୮(ଡି.ଏନ.ଏ.)-କେନ୍ଦୁଝର ଜିଲା ଯୋଡା ବ୍ଲକରେ ଥିବା ତଥା ୫୨୦ ନଂ ଜାତୀୟ ରାଜପଥର ବାସୁଦେବପୁରଠାରେ ଥିବା ବୈତରଣୀ ନଦୀ ସେତୁ ଦୁର୍ବଳ ହୋଇଯାଇଥିବାରୁ ତଥା ବଢି ପାଣି ଆସି ଅତଡା ଖସିବାରୁ ଯାତାୟାତ ପ୍ରଭାବିତ ହୋଇଛି। ବୈତରଣୀ ନଦୀର ଏହି ସେତୁ ଉପରେ ଦୈନନ୍ଦିନ ହଜାର ହଜାର ଖଣିଜ ବୋଝେଇ ଟ୍ରକ ସହିତ ସ୍ଥାନୀୟ ଯୋଡା ବଡବିଲ, କୋଇଡା ପ୍ରଭୃତି ଅଞ୍ଚଳର ଜନସାଧାରଣ ଚମ୍ପୁଆ , କେନ୍ଦୁଝର ତଥା କଟକ ଭୁବନେଶ୍ୱରକୁ ଯାତାୟାତ କରିଥାନ୍ତି। ପୋଲର ଅତଡା ଖାଇଯିବାରୁ ପୋଲ ଉପର ଦେଇ ଯାତାୟାତ କରିବା ବିପଦପୂର୍ଣ୍ଣ ରହିଛି ା ଫଳରେ ସଦର ଉପଖଣ୍ଡ ମହକୁମା ଚମ୍ପୁଆ ତଥା କେନ୍ଦୁଝର ଜିଲା ମୁଖ୍ୟାଳୟକୁ ଯାତାୟତ ଠପ୍ ହୋଇଯାଇଛି। ଏସମ୍ପର୍କରେ ପ୍ରତିକ୍ରିୟା ଦେଇ ବଡବିଲ ତହସିଲଦାର କ୍ଷୀରୋଦ କୁମାର ବେହେରା କହିଛନ୍ତି ଯେ, ଯାତାୟାତରେ ବିପଦ ଥିବାରୁ ଏହାକୁ ସମ୍ପୂର୍ଣ୍ଣ ଭାବେ ବନ୍ଦ କରିଦିଆଯାଇଛି ଏବଂ ଏହାର ମରାମତି ମଧ୍ୟ ଆରମ୍ଭ ହୋଇଛି॥ ପୋଲରେ ଯାତାୟାତ ଠପ ହୋଇଥିବାରୁ ଯାତ୍ରୀମାନେ ନାହିଁ ନଥିବା ଅସୁବିଧାର ସମୁଖୀନ ହେଉଥିବା ଦେଖିବାକୁ ମିଳିଥିଲା ା
