ବୟସ କେବଳ ଏକ ସଂଖ୍ୟା ମାତ୍ର। ଯଦି କୌଣସି ବ୍ୟକ୍ତିର କିଛି କରିବାକୁ ଆଗ୍ରହ ଥାଏ, ତେବେ ସେ ଯେକୌଣସି ବୟସରେ କିଛି ବି ହାସଲ କରିପାରିବେ । ସ୍କଟଲ୍ୟାଣ୍ଡର ୬୦ ବର୍ଷିୟ ପଲ୍ ମାର୍କସ୍ ସେମିତି କିଛି କରି ଦେଖାଇଛନ୍ତି ।
ଲକଡାଉନ୍ ସମୟରେ ମାର୍କସ୍ ନିଜ ଚାକିରି ହରାଇଥିଲେ। ପରିଣତ ବୟସ ଯୋଗୁ ସେ ଅନ୍ୟ କୌଣସି ସ୍ଥାନରେ କାମ ପାଇଲେ ନାହିଁ । କିନ୍ତୁ ସେ ଏଥିରେ ହାର ମାନି ନ ଥିଲେ। ୬୦ ବର୍ଷ ବୟସରେ ସେ କେତେ ଫିଟ୍ ତାହା ପ୍ରମାଣ କରିବାକୁ ସେ ପୁସଅପ୍ କରିଥିଲେ। ଏହାର ଭିଡିଓକୁ ସେ ସୋସିଆଲ ମିଡିଆରେ ସେୟାର କଲେ। ଏହାପରେ ସେ ଚାକିରି ପାଇ ପାରିଲେ।
ପଲ୍ ମାର୍କସ୍ ପାଞ୍ଚ ମାସ ପୂର୍ବରୁ ଦୁବାଇର କ୍ରେଓଲ୍ ଗ୍ରୁପରେ ମୁଖ୍ୟ ଅପରେସନ୍ ମ୍ୟାନେଜର(ସିଇଓ) ଭାବରେ କାର୍ଯ୍ୟ କରୁଥିଲେ। କିନ୍ତୁ ଲକଡାଉନ୍ ଯୋଗୁ କମ୍ପାନୀ ତାଙ୍କୁ ଚାକିରୀରୁ ବାହାର କରି ଦେଇଥିଲା । ଏହା ପରେ ମାର୍କସ୍ ଭାରତ, ୟୁଏଇ, ବ୍ରିଟେନ ଏବଂ ସ୍ପେନ୍ ଭଳି ଦେଶରେ ଚାକିରି ପାଇଁ ଆବେଦନ କଲେ। କିନ୍ତୁ ଅଧିକ ବୟସ ଯୋଗୁ ତାଙ୍କୁ ଚାକିରି ମିଳିଲା ନାହିଁ। ତେଣୁ ୬୦ ବର୍ଷରେ ମଧ୍ୟ ସେ ସମ୍ପୂର୍ଣ୍ଣ ଫିଟ୍ ଥିବା ପ୍ରମାଣକରି ଦେଖାଇଲେ । ସେ ସୁଟ୍-ବୁଟ୍ ପିନ୍ଧି ପୁସଅପ କଲେ ଏବଂ ଏହାର ଭିଡିଓକୁ ସେ ସୋସିଆଲ ମିଡିଆ ଲିଙ୍କଡଇନରେ ପୋଷ୍ଟ କଲେ। ଏହି ଭିଡିଓ ଭାଇରାଲ ହେବପରେ ଅନେକ ଅଫର ତାଙ୍କ ପାଖକୁ ଆସିବାକୁ ଲାଗିଲା ।
ଏ ନେଇ ମାର୍କସ୍ କୁହନ୍ତି, ସେ ଦୈନିକ ୫୦ ଥର ପୁସ୍ଅପ୍ ଏବଂ ସପ୍ତାହରେ ୩୦ କିଲୋମିଟର ଚାଲନ୍ତି। ବୟସ କେବେ ହେଲେ ଦକ୍ଷତାର ମାପ ହୋଇପାରିବ ନାହିଁ ଏବଂ ୬୦ ବର୍ଷରୁ ଅଧିକ ପ୍ରତ୍ୟେକ ବ୍ୟକ୍ତି ଖବରକାଗଜ ପଢିବା ଏବଂ ଟିଭି ଦେଖିବାରେ ବିତାଇବେ ନାହିଁ ବୋଲି ସେ କହିଛନ୍ତି।
