ଆନନ୍ଦପୁର, ୧।୮(ପ୍ରଦୋଷ କୁମାର ବିଶ୍ୱାଳ ): ଆନନ୍ଦପୁର ରିଙ୍ଗ୍ ବନ୍ଧରେ ଘାଇ ସୃଷ୍ଟି ହୋଇ ବନ୍ୟା ବିପର୍ଯ୍ୟୟ ଘଟିବା ପରେ ଶନିବାର ଆନନ୍ଦପୁରରେ କଂଗ୍ରେସ ପକ୍ଷରୁ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଯାଇଛି। ଏହି ଅବସରରେ ପୂର୍ବତନ ପିସିସି ସଭାପତି ତଥା ପୂର୍ବତନ ମନ୍ତ୍ରୀ ଜୟଦେବ ଜେନା ରାଜ୍ୟ ସରକାର ଏବଂ ଜଳସମ୍ପଦ ବିଭାଗ ଉପରେ ବର୍ଷିଛନ୍ତି।
ଖବରଦାତା ସମ୍ମିଳନୀରେ ଜୟଦେବ କହିଛନ୍ତି ଯେ, ୧୯୯୮ ମସିହାରେ ତାଙ୍କର ସ୍ବତନ୍ତ୍ର ଉଦ୍ୟମରେ ଆନନ୍ଦପୁର, ଫକୀରପୁର, ବଞ୍ଚୋ, ପଞ୍ଚୁଗୋଛିଆ, ସମଣା, ହାବେଳେଶ୍ୱର ଓ ଆୟତପୁର ଆଦି ଅଞ୍ଚଳକୁ ବନ୍ୟାରୁ ସୁରକ୍ଷା ଦେବା ପାଇଁ ଏହି ରିଙ୍ଗ୍ ବନ୍ଧ ନିର୍ମାଣ କରାଯାଇଥିଲା। କିନ୍ତୁ ଗତ ୨୭ ବର୍ଷ ଧରି ଏହାର ସଠିକ୍ ରକ୍ଷଣାବେକ୍ଷଣ କରାଯାଇ ନାହିଁ। ସୁଇସ୍ ଗେଟ୍ର ନିୟମିତ ତଦାରଖ ଅଭାବ ଏବଂ ବ୍ୟାରେଜ ଗେଟ୍ର ଅବୈଜ୍ଞାନିକ ପରିଚାଳନା ଫଳରେ ରିଙ୍ଗ୍ ବନ୍ଧରେ ଘାଇ ସୃଷ୍ଟି ହୋଇଛି। ଏହାର ପରିଣାମସ୍ୱରୂପ ଆନନ୍ଦପୁର ସହର ସମେତ ବହୁ ପଞ୍ଚାୟତ ଜଳମଗ୍ନ ହୋଇପଡ଼ିଛି ଏବଂ ହଜାର ହଜାର ଏକର ଚାଷଜମି ସମ୍ପୂର୍ଣ୍ଣ ନଷ୍ଟ ହୋଇଯାଇଛି ବୋଲି ସେ ଅଭିଯୋଗ କରିଛନ୍ତି।
ବନ୍ୟାକ୍ଷତିଗ୍ରସ୍ତ ଲୋକଙ୍କ ସମସ୍ୟାର ସମାଧାନ ପାଇଁ ସେ କେତେକାଂଶରେ ଗୁରୁତ୍ୱପୂର୍ଣ୍ଣ ଦାବି ଉପସ୍ଥାପନ କରିଛନ୍ତି। ବନ୍ୟାକ୍ଷତିଗ୍ରସ୍ତ ପରିବାରଙ୍କୁ ତୁରନ୍ତ ପର୍ଯ୍ୟାପ୍ତ ପରିମାଣର ରିଲିଫ୍ ସହ କ୍ଷତିଗ୍ରସ୍ତ ଚାଷୀଙ୍କୁ ଉପଯୁକ୍ତ କ୍ଷତିପୂରଣ, ମାଗଣା ବିହନ ଓ କୃଷି ଇନପୁଟ୍ ସହାୟତା ଦେବାକୁ ସେ ଦାବି କରିଛନ୍ତି। ଏଥିସହ କ୍ଷତିଗ୍ରସ୍ତ ଘରବାଡ଼ିର ତୁରନ୍ତ ସର୍ଭେ କରାଯିବା, ରିଙ୍ଗ୍ ବନ୍ଧ ଓ ସୁଇସ୍ ଗେଟ୍ର ସ୍ଥାୟୀ ମରାମତି ଏବଂ ଦୀର୍ଘମିଆଦି ବନ୍ୟା ନିୟନ୍ତ୍ରଣ ବ୍ୟବସ୍ଥା ଗ୍ରହଣ କରିବାକୁ ସେ ସରକାରଙ୍କୁ ଚେତାବନୀ ଦେଇଛନ୍ତି। ଯଦି ଯଥାଶୀଘ୍ର ଏହି ସମସ୍ୟାର ସମାଧାନ ନ କରାଯାଏ, ତେବେ ବନ୍ୟାପୀଡ଼ିତ ଲୋକ ଓ ଚାଷୀମାନଙ୍କୁ ସାଙ୍ଗରେ ଧରି କଂଗ୍ରେସ ରାଜରାସ୍ତାକୁ ଓହ୍ଲାଇବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
ଏହି ଖବରଦାତା ସମ୍ମିଳନୀରେ କେନ୍ଦୁଝର ଜିଲ୍ଲା କଂଗ୍ରେସ ସଭାପତି ମନୋଜ ଜେନା, ଚିତ୍ତ ପାତ୍ର, ସନ୍ତୋଷ ସାମଲଙ୍କ ସମେତ ବହୁ ସ୍ଥାନୀୟ କଂଗ୍ରେସ ନେତା ଓ କର୍ମୀ ଉପସ୍ଥିତ ଥିଲେ।