ନୂଆଦିଲ୍ଲୀ,୨୯।୧୧ : ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ନିମନ୍ତ୍ରଣ କ୍ରମେ ଭାରତକୁ ଆସିଥିବା ଇଣ୍ଡୋନେସିଆର ରାଜନୈତିକ, ଆଇନ ଏବଂ ସୁରକ୍ଷା ବ୍ୟାପାର ମନ୍ତ୍ରୀ ଡକ୍ଟର ମହମ୍ମଦ ମହଫୁଦ ଏମଡିଙ୍କୁ ଭାରତୀୟ ବହିର୍ବ୍ୟାପାରମନ୍ତ୍ରୀ ଏସ ଜୟଶଙ୍କର ଭେଟିଛନ୍ତି। ଏହି ସମୟରେ ଦୁଇ ନେତାଙ୍କ ମଧ୍ୟରେ ଜି -୨୦, ଦ୍ୱିପାକ୍ଷିକ ସହଯୋଗ ଏବଂ ମ୍ୟାନମାର ପରିସ୍ଥିତି ସହିତ ବହୁ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା। ବୈଠକ ସମ୍ପର୍କରେ ଜୟଶଙ୍କର ସୂଚନା ଦେଇଛନ୍ତି।
ଜୟଶଙ୍କର ତାଙ୍କ ଟୁଇଟରେ ଲେଖିଛନ୍ତି, ଇଣ୍ଡୋନେସିଆର ରାଜନୈତିକ, ଆଇନ ଏବଂ ସୁରକ୍ଷା ବ୍ୟାପାର ସଂଯୋଜକ ମନ୍ତ୍ରୀଙ୍କୁ ଭେଟିଥିବାରୁ ସେ ବେଶ୍ ଆନନ୍ଦିତ ।
ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ନିମନ୍ତ୍ରଣରେ ଇଣ୍ଡୋନେସିଆର ବରିଷ୍ଠ ମନ୍ତ୍ରୀ ମହମ୍ମଦ ମହଫୁଦ ଏମଡି ଦିଲ୍ଲୀ ଆସିଛନ୍ତି। ତାଙ୍କ ସହିତ ଦିଲ୍ଲୀ ଗସ୍ତରେ ଇଣ୍ଡୋନେସିଆ ଉଲେମାଙ୍କର ଏକ ଉଚ୍ଚ ସ୍ତରୀୟ ପ୍ରତିନିଧୀ ଦଳ ଅଛନ୍ତି। ଏହି ଗସ୍ତ ସମୟରେ ଇଣ୍ଡୋନେସିଆ ଉଲେମା ସେମାନଙ୍କ ଭାରତୀୟ ପ୍ରତିପକ୍ଷଙ୍କ ସହ ଆଲୋଚନା କରିବେ।
ଏହାପୂର୍ବରୁ ଇଣ୍ଡୋନେସିଆ ମନ୍ତ୍ରୀ ମହମ୍ମଦ ମହଫୁଦ ଏମଡି ରାଜଧାନୀ ଦିଲ୍ଲୀରେ ଭାରତ ଇସଲାମିକ ସାଂସ୍କୃତିକ କେନ୍ଦ୍ରର କାର୍ଯ୍ୟକ୍ରମକୁ ସମ୍ବୋଧିତ କରିଥିଲେ। ଏହି ସମୟରେ ସେ କହିଥିଲେ ଯେ ମୁଁ ଭାବୁଛି ଧର୍ମ ଶାନ୍ତିର ଉତ୍ସ ହେବା ଉଚିତ ଏବଂ ମତଭେଦ ତଥା ବିବାଦ କିମ୍ବା ହିଂସାର କାରଣ ନୁହେଁ। ଭାରତ ଏବଂ ଇଣ୍ଡୋନେସିଆରେ ଧର୍ମନିରପେକ୍ଷ ଶାନ୍ତି ଏବଂ ସାମାଜିକ ସୌହାର୍ଦ୍ଦ୍ୟକୁ ପ୍ରୋତ୍ସାହିତ କରିବାରେ ଉଲେମାଙ୍କ ଭୂମିକା ବିଷୟରେ ସେ କହିଛନ୍ତି ଯେ ଅନେକ ଥର ଆମେ ଏପରି ଲୋକଙ୍କୁ ଦେଖିଛୁ ଯେଉଁମାନେ ନିଜ ଧର୍ମକୁ ସମ୍ପୂର୍ଣ୍ଣ ସତ୍ୟର ନୀତି ଭାବରେ ବ୍ୟବହାର କରନ୍ତି ଏବଂ ଅନ୍ୟମାନଙ୍କୁ ସହଜରେଦୋଷ ଦେଇଥାନ୍ତି। ଆମକୁ ଏଥିରୁ ବାହାରକୁ ଯାଇ ସଂସ୍କାର କରିବାକୁ ପଡିବ। ଯାହାଦ୍ୱାରା ଶାନ୍ତି ସ୍ଥାପନ ହୋର ପଥ ସହଜ ହେବ।
