ବର୍ମିଂହାମ୍, ୫।୭: ଭାରତ ଏବଂ ଇଂଲଣ୍ଡ ମଧ୍ୟରେ ଏଜବାଷ୍ଟନ ଟେଷ୍ଟରେ ଘରୋଇ ଦଳ ବିଜୟ ପଥରେ ଆଗେଇଛି। ୩୭୮ ରନ୍ର ଟାର୍ଗେଟକୁ ପିଛା କରି ଇଂଲଣ୍ଡ ୩ ଉଇକେଟ୍ ହରାଇ ୨୫୯ ରନ୍ ସଂଗ୍ରହ କରିଛି। ଫଳରେ ୭ଟି ଉଇକେଟ ସୁରକ୍ଷିତ ଥାଇ ଦଳ ବିଜୟ ଲକ୍ଷ୍ୟଠାରୁ ମାତ୍ର ୧୧୯ ରନ ଦୂରରେ ରହିଛି। ଭାରତୀୟ ଅଧିନାୟକ ଜଶପ୍ରୀତ ବୁମ୍ରା ଇଂଲଣ୍ଡକୁ ପ୍ରଥମ ଦୁଇଟି ଝଟକା ଦେଇଥିଲେ। ସେ ପ୍ରଥମେ ଜ୍ୟାକ କ୍ରାଉଲି କ୍ଳିନ୍ ବୋଲ୍ଡ କରିଥିଲେ। ତା’ପରେ ଓଲି ପୋପଙ୍କ ଉଇକେଟ ନେଇଥିଲେ।
ଏହି ଦୁଇଟି ଉଇକେଟ ନେଇ ବୁମରା ୪୦ ବର୍ଷ ପୁରୁଣା ରେକର୍ଡ ଭାଙ୍ଗିଛନ୍ତି। ଏହି ରେକର୍ଡ ଭାରତର ପୂର୍ବତନ ଦ୍ରୁତ ବୋଲର ଅଧିନାୟକ କପିଲ ଦେବ ନାଁରେ ଥିଲା। ଇଂଲଣ୍ଡ ବିପକ୍ଷ କୌଣସି ଟେଷ୍ଟ ସିରିଜରେ ସର୍ବାଧିକ ଉଇକେଟ ନେଇଥିବା ବୁମରା ଭାରତୀୟ ଦ୍ରୁତ ବୋଲର ହୋଇପାରିଛନ୍ତି।
ଇଂଲଣ୍ଡ ବିପକ୍ଷ ଚଳିତ ସିରିଜରେ ବୁମ୍ରା ଏପର୍ଯ୍ୟନ୍ତ ୨୩ଟି ଉଇକେଟ ନେଇଛନ୍ତି। କପିଲ ୧୯୮୧-୮୨ରେ ଇଂଲଣ୍ଡ ବିପକ୍ଷ ୬ଟି ମ୍ୟାଚ ଟେଷ୍ଟ ସିରିଜରେ ୨୨ଟି ଉଇକେଟ ନେଇଥିଲେ। ଭୁବନେଶ୍ୱର କୁମାର ତୃତୀୟ ସ୍ଥାନରେ ଅଛନ୍ତି। ୨୦୧୪ରେ ଇଂଲଣ୍ଡ ବିପକ୍ଷ ଟେଷ୍ଟ ସିରିଜରେ ଭୁଭି ୧୯ ଉଇକେଟ ନେଇଥିଲେ।
