ଟୋକିଓ: ଜାପାନର ଯୁବପିଢ଼ିଙ୍କ ମଧ୍ୟରେ ବିବାହ ପ୍ରତି ବିତୃଷ୍ଣା ମନୋଭାବ ଦେଖିବାକୁ ମିଳିଛି। ଏହାର ପ୍ରଭାବ ପଡ଼ିଛି ଜନ୍ମହାର ଉପରେ। ଅବିବାହିତ ଯୁବତୀଯୁବକ ଏବଂ ନିଃସନ୍ତାନ ଦମ୍ପତି ନିଜର ମାନସିକ ଅବଷାଦ ମେଣ୍ଟାଇବାକୁ ଗୃହପାଳିତ ପ୍ରାଣୀଙ୍କ ପ୍ରତି ଅଧିକ ସଉକ ଦେଖାଉଛନ୍ତି। ଜାପାନରେ ବିଲେଇ, କୁକୁର ଭଳି ପୋଷାଜୀବଙ୍କ ସଂଖ୍ୟା ଆଶାତୀତ ଭାବେ ବଢ଼ିବାରେ ଲାଗିଛି। ଫଳରେ ଶିଶୁଙ୍କ ଅପେକ୍ଷା ଏବେ ଏଭଳି ପାଳିତ ପ୍ରାଣୀଙ୍କ ପଞ୍ଜୀକରଣ ଲାଗି ଦୈନିକ ଲାଗୁଛି ଲମ୍ବା ଲାଇନ।
ବିଶ୍ୱ ଅର୍ଥବ୍ୟବସ୍ଥା ଉପରେ ନଜର ରଖୁଥିବା ‘ଗୋଲ୍ଡମ୍ୟାନ୍ ସଚ୍’ ଜାପାନରେ ଭିନ୍ନ ଟ୍ରେଣ୍ଡ୍ ଠଉରାଇଛି। ଜାପାନର ଅର୍ଥବ୍ୟବସ୍ଥା ପ୍ରଭାବିତ ହେବା ପଛରେ ଜନ୍ମହାର ହ୍ରାସକୁ ପ୍ରମୁଖ କାରଣ ଭାବେ ବିଚାରକୁ ନେଇ ସଂସ୍ଥା ସର୍ଭେ କରିଥିଲା। ଏଥିରୁ ଅପ୍ରତ୍ୟାଶିତ ଜୀବନଶୈଳୀ ସାମ୍ନାକୁ ଆସିଛି। ଏଠାକାର ଦେଶବାସୀ ଛୁଆ ଅପେକ୍ଷା ପ୍ରାଣୀ ପାଳନ ପ୍ରତି ବେଶି ଆଗ୍ରହୀ ବୋଲି ଜଣାପଡ଼ିଛି। ଜାପାନରେ ପ୍ରାଣୀପାଳନ ଲାଗି ସ୍ବତନ୍ତ୍ର ଗାଇଡ୍ ଲାଇନ୍ ରହିଛି। ଏଥିଲାଗି ରେଜିଷ୍ଟ୍ରେଶନ ବାଧ୍ୟତାମୂଳକ। କେବଳ ଏତିକି ନୁହେଁ, ବିଦେଶଯାତ୍ରାରେ ସାଙ୍ଗରେ କୌଣସି ପ୍ରାଣୀକୁ ନେଉଥିଲେ ସ୍ବତନ୍ତ୍ର ଅନୁମତି ଅପରିହାର୍ଯ୍ୟ। ସେମାନଙ୍କର ଭିନ୍ନ ପରିଚୟ ପତ୍ର ଥାଏ। ଏସବୁ ପ୍ରକ୍ରିୟାରେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଥିଲେ ବି ଜାପାନବାସୀ ଏହି ମୂଲ୍ୟ ଦେବାକୁ ପ୍ରସ୍ତୁତ। ଶିଶୁକୁ ପାଳିପୋଷି ମଣିଷ କରିବାର ଦାୟିତ୍ୱ ମୁଣ୍ଡାଇବାକୁ ଚାହଁୁ ନ ଥିବା ବ୍ୟକ୍ତି କୁକୁର କିମ୍ବା ବିଲେଇଟିଏ ପାଳିବାକୁ ଅଗ୍ରାଧିକାର ଦେଉଛନ୍ତି। ସ୍ଥଳବିଶେଷରେ କହିଲେ ଏବେ ଜାପାନରେ ଶିଶୁଙ୍କ ସ୍ଥାନ ପୋଷାପ୍ରାଣୀ ନେଇ ସାରିଛନ୍ତି ବୋଲି ‘ଗୋଲ୍ଡମ୍ୟାନ୍ ସାଚ୍’ ପକ୍ଷରୁ କୁହାଯାଇଛି।
୨୦୧୪ରେ ଜାପାନରେ ୧୫ ବର୍ଷ ବୟସର ୧୬.୫ ମିଲିୟନ ଶିଶୁ ରହିଥିବାବେଳେ ବିଲେଇ, କୁକୁର ଭଳି ପୋଷାପ୍ରାଣୀଙ୍କ ସଂଖ୍ୟା ଥିଲା ୨୧.୩ ମିଲିୟନ। ସେହିପରି ଗୋଟିଏ ସନ୍ତାନ ନୀତି ପ୍ରତି ଆଗ୍ରହ ବଢ଼ିବାରେ ଲାଗିଛି, ଯାହା ପୂର୍ବରୁ ନ ଥିଲା। ଏହା ପଛର ପ୍ରମୁଖ କାରଣ ବୃତ୍ତିକ୍ଷେତ୍ରକୁ ନେଇ ନିଶା। ଜାପାନିଜମାନେ ନିଜ ବୃତ୍ତିଗତ ଜୀବନକୁ ନେଇ ବେଶ୍ ସତର୍କ। ଦେଶପ୍ରେମୀ ଭାବନା ଏବଂ ବିଶ୍ୱ ମାନଚିତ୍ରରେ ଦେଶକୁ ସ୍ବତନ୍ତ୍ର ସ୍ଥାନ ଦେବାକୁ ସେମାନେ ସର୍ବଦା ଚେଷ୍ଟିତ। ତେଣୁ ଦେଶର କର୍ମଜୀବୀମାନେ ଛୁଟି ମଧ୍ୟ ନିଅନ୍ତି ନାହିଁ। ଅପରପକ୍ଷେ କର୍ମ କ୍ଷେତ୍ରରେ ମାନସିକ ଚାପ ହ୍ରାସ ଲାଗି ଏବେ ଅନେକଗୁଡ଼ିଏ କମ୍ପାନୀ ବାର୍ଷିକ ୧୪ଦିନ ଛୁଟି ନେବା ବାଧ୍ୟତାମୂଳକ କରିଛନ୍ତି।
ଅପରପକ୍ଷେ ଏଠାରେ ମହିଳା ଏବଂ ପୁରୁଷ ଉଭୟେ କର୍ମପ୍ରବଣ। ଏପରି ସ୍ଥଳେ ଶିଶୁ ଜନ୍ମ କରିବା, ଠିକ୍ ଭାବେ ଦେଖାରଖା କରିବାକୁ ସେମାନେ କୁଣ୍ଠାବୋଧ ପ୍ରକାଶ କରୁଛନ୍ତି। ବିଜନେସ ଇନ୍ସାଇଡ୍ର ଏକ ରିପୋର୍ଟ ଅନୁଯାୟୀ ଏଭଳି ଧାରଣା ନ ବଦଳିଲେ ଆସନ୍ତା ୨୦ ବର୍ଷରେ ଜାପାନରୁ ମୋଟ ଜନସଂଖ୍ୟାର ୩୫ ପ୍ରତିଶତ ୮୦ବର୍ଷ ଆୟୁ ବିଶିଷ୍ଟ ହୋଇଯାଇଥିବେ। ସେହିପରି ୨୦୨୫ ସୁଦ୍ଧା ଜାପାନର ୩ଜଣରୁ ଜଣକ ବୟସ ୬୫ ବର୍ଷରୁ ଅଧିକ ହୋଇଯିବ। ବୟସ୍କଙ୍କ ସଂଖ୍ୟା ବଢ଼ିବାର କୁପ୍ରଭାବ ଉଭୟ ଅର୍ଥନୈତିକ ଏବଂ ସାମାଜିକ ବ୍ୟବସ୍ଥାକୁ ପ୍ରଭାବିତ କରିବ। ଏଭଳି ଧାରା ଜାରି ରହିଲେ ଆସନ୍ତା ୫୦ ବର୍ଷରେ ଜାପାନର ଜନସଂଖ୍ୟା ୮୦ ମିଲିୟନ ତଳକୁ ଖସିଆସିବା ଆଶଙ୍କା ବେଶି।
