ନୂଆଦିଲ୍ଲୀ, ୧୪।୨: ଚଳିତ ଆର୍ଥିକ ବର୍ଷର ୩ୟ ତ୍ରୈମାସ ପରେ ଦେଶରେ ଘରୋଇ ଯାତ୍ରୀବାହୀ ଗାଡ଼ି (ପିଭି) ବିକ୍ରିରେ ବୃଦ୍ଧି ଘଟିଛି। ଏପରିକି ଯାତ୍ରୀବାହୀ ଗାଡ଼ି ପ୍ରତି ଲୋକଙ୍କ ଆକର୍ଷଣ ବଢ଼ିବାରେ ଲାଗିଛି। ବିଶେଷକରି ୨୦୨୩ ଜାନୁୟାରୀରେ ୨,୯୮,୦୯୩ ୟୁନିଟ୍ ପିଭି ଗାଡି ବିକ୍ରି ହୋଇଥିବା ଜଣାପଡିଛି। ଏ ନେଇ ସୋମବାର ସୋସାଇଟି ଅଫ୍ ଇଣ୍ଡିଆନ୍ ମାନୁଫାକଚର୍ସ (ଏସଆଇଏଏମ୍) ପକ୍ଷରୁ ବିସ୍ତୃତ ସୂଚନା ପ୍ରଦାନ କରାଯାଇଛି। ସେହିଭଳି ଏସଆଇଏଏମର ସୂଚନା ଅନୁଯାୟୀ ୨୦୨୩ ଜାନୁୟାରୀରେ ଘରୋଇ ଯାତ୍ରୀବାହୀ ଯାନ ବିକ୍ରି ୧୭.୨୩% ବୃଦ୍ଧି ଘଟି ୨,୯୮,୦୯୩ ୟୁନିଟ୍ରେ ପହଞ୍ଚତ୍ଛି। ଏପରିକି ୨୦୨୨ ଜାନୁୟାରୀରେ ଘରୋଇ ଯାତ୍ରୀବାହୀ ଗାଡ଼ିର ୟୁଟିଲିଟି ଯାନ(ୟୁଭି) ସେଗମେଣ୍ଟରେ ୧,୧୬,୯୬୨ ୟୁନିଟ୍ ବିକ୍ରି ହୋଇଥିଲା। ହେଲେ ଗତ ବର୍ଷ ଜାନୁୟାରୀ ମାସ ତୁଳନାରେ ଚଳିତ ବର୍ଷ ଜାନୁୟାରୀରେ ୟୁଭି ବିକ୍ରିରେ ବୃଦ୍ଧି ଦେଖିବାକୁ ମିଳିଛି। ସେହିପରି ୨୦୨୩ ଜାନୁୟାରୀରେ ୟୁଭି ୧,୪୯,୩୨୮ ୟୁନିଟ୍ ବିକ୍ରି ହୋଇଛି, ଯାହା ଗତବର୍ଷ ତୁଳନାରେ ପ୍ରାୟ ୨୮% ଅଧିକ ବୋଲି ଏସଆଇଏଏମ ପକ୍ଷରୁ କୁହାଯାଇଛି। ଅପରପକ୍ଷରେ ୨ଚକିଆ ଯାନ ବିକ୍ରି ୩.୮୧% ବୃଦ୍ଧି ପାଇ ୧,୧୮୪ ମିଲିୟନ ୟୁନିଟ୍ରେ ରହିଛି। ଏ ସମ୍ପର୍କରେ ଏସଆଇଏଏମର ମହାନିର୍ଦ୍ଦେଶକ ରାଜେଶ ମେନନ କହିଛନ୍ତି, ପ୍ରଥମ ଥର ପାଇଁ ଜାନୁୟାରୀରେ ଯାତ୍ରୀବାହୀ ଗାଡ଼ି ବିକ୍ରି ସବୁଠୁ ଉଚ୍ଚସ୍ତରରେ ପହଞ୍ଚତ୍ଛି। ଏପରିକି ୨୦୨୨ ଏପ୍ରିଲରୁ ୨୦୨୩ ଜାନୁଆରୀ ଶେଷ ସୁଦ୍ଧା ଦେଶର ଯାତ୍ରୀବାହୀ ଗାଡ଼ିର ବିକ୍ରିର ସଂଖ୍ୟା ୩ ମିଲିୟନ ୟୁନିଟ୍ ପାର୍ କରିଛି। ବିଶେଷ କରି ୨୦୨୨ ଜାନୁୟାରୀ ତୁଳନାରେ ୨୦୨୩ ଜାନୁୟାରୀରେ ଏଲ୍୫ କାଟାଗୋରିର ୩ ଚକିଆ ଯାନର ବିକ୍ରି ମଧ୍ୟ ଦୁଇଗୁଣ ବଢିଛି, ଠିକ୍ ସେହିପରି ୨ ଚକିଆ ଯାନ ମାତ୍ର ୪% ବୃଦ୍ଧି ଘଟିଥିବା ଜଣାପଡିଛି ବୋଲି ସେ ମତପ୍ରକାଶ କରିଛନ୍ତି। ଉଲ୍ଲେଖଯୋଗ୍ୟ ଏସଆଇଏଏମର ସୂଚନା ଅନୁଯାୟୀ ୨୦୨୩ ଜାନୁୟାରୀରେ କାର୍ ନିର୍ମାଣକାରୀ କମ୍ପାନୀ ୫୫,୫୫୧ ପିଭି ୟୁନିଟ୍ କାର ରପ୍ତାନି କରିଛନ୍ତି। ହେଲେ ୨୦୨୨ର ସମାନ ଅବଧି ମଧ୍ୟରେ ଉକ୍ତ କାରର ରପ୍ତାନି ସଂଖ୍ୟା ୪୦,୭୮୧ ୟୁନିଟ୍ ଥିଲା। ଅପରପକ୍ଷରେ ୩ଚକିଆ ଯାନର ରପ୍ତାନି ହ୍ରାସ ପାଇଛି। ଏପରିକି ୨୦୨୨ ଜାନୁୟାରୀରେ ୩୯,୧୫୧ ୟୁନିଟ୍ ତିନି ଚକିଆ ଯାନ ରପ୍ତାନି ହୋଇଥିବାବେଳେ ୨୦୨୩ ଜାନୁୟାରୀରେ ତାର ପରିମାଣ ୨୩,୦୮୦ ୟୁନିଟକୁ ଖସି ଆସିଛି। ସେହିପରି ୨ଚକିଆ ଯାନର ରପ୍ତାନି ୪୦.୭୬ % ହ୍ରାସ ଘଟି ୨,୨୦,୧୦୩ ୟୁନିଟ୍ରେ ରହିଛି।
