ନୂଆଦିଲ୍ଲୀ,୨୪।୯: ନିର୍ବାଚନ କମିଶନ ଓ ସ୍ବତନ୍ତ୍ର ଘନିଷ୍ଠ ସଂଶୋଧନ ପ୍ରକ୍ରିୟା (SIR)କୁ ନେଇ ବିବାଦ ମଧ୍ୟରେ କକରୋଚ୍ ଜନତା ପାର୍ଟି (CJP) ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ୪୮ ଘଣ୍ଟାର ଅଲ୍ଟିମେଟମ୍ ଦେଇଛନ୍ତି । CJP ପ୍ରତିଷ୍ଠାତା ଅଭିଜିତ ଦୀପକେ ଜ୍ଞାନେଶ କୁମାରଙ୍କ ଇସ୍ତଫା ଦାବି କରିବା ସହ ଦାବି ପୂରଣ ନହେଲେ ଦେଶବ୍ୟାପୀ ଆନ୍ଦୋଳନ କରାଯିବ ବୋଲି କହିଛନ୍ତି।
ଦୀପକେ କହିଛନ୍ତି, ୪୮ ଘଣ୍ଟା ମଧ୍ୟରେ CEC ଇସ୍ତଫା ନଦେଲେ ‘ଜନ୍ତର ମନ୍ତର ପାର୍ଟ-୨’ ଭଳି ଆନ୍ଦୋଳନ କରାଯିବ । ନିର୍ବାଚନ କମିଶନରେ ସଂସ୍କାର ଦାବିକୁ ନେଇ CJP ପକ୍ଷରୁ ଆଗକୁ ବଡ଼ ଆନ୍ଦୋଳନର ସଙ୍କେତ ଦିଆଯାଇଛି। CJP ପ୍ରତିଷ୍ଠାତା ଜ୍ଞାନେଶ କୁମାରଙ୍କ ବିରୋଧରେ ତୀବ୍ର ଅଭିଯୋଗ ଆଣିଛନ୍ତି । ତାଙ୍କ ଦାବି ହେଉଛି, ଜ୍ଞାନେଶ କୁମାର CEC ହେବା ପରଠାରୁ କିଏ ଭୋଟ୍ ଦେବେ ଏବଂ କିଏ ଦେଇପାରିବେ ନାହିଁ, ସେନେଇ ସରକାର ନିଷ୍ପତ୍ତି ନେଉଥିବା ପରିସ୍ଥିତି ସୃଷ୍ଟି ହୋଇଛି। ଏହା ଗଣତନ୍ତ୍ରର ମୂଳ ଧାରଣା ସହ ସମ୍ପର୍କିତ ପ୍ରଶ୍ନ ବୋଲି ସେ କହିଛନ୍ତି। ଏହି ଅଭିଯୋଗଗୁଡ଼ିକ CJP ପକ୍ଷରୁ କରାଯାଇଛି ।
ଏକ ରିପୋର୍ଟ ପରେ ନିର୍ବାଚନ କମିଶନ ଭିତରେ SIRକୁ ନେଇ ମତଭେଦର ଚର୍ଚ୍ଚା ତୀବ୍ର ହୋଇଛି । ରିପୋର୍ଟ ଅନୁସାରେ, ନିର୍ବାଚନ କମିଶନର ସୁଖବୀର ସିଂ ସାନ୍ଧୁ ଓ ବିବେକ ଯୋଶୀ ଗତ ୧୦ ମାସରେ ଅନେକ ନିଷ୍ପତ୍ତି ଉପରେ ଔପଚାରିକ ଭାବେ ଆପତ୍ତି ଜଣାଇଥିବା ଦାବି କରାଯାଇଛି। ଏହା ପରେ CJP ନିର୍ବାଚନ କମିଶନ ସଂସ୍କାର ଓ ଭୋଟର ଅଧିକାର ପ୍ରସଙ୍ଗକୁ ନେଇ ଆନ୍ଦୋଳନର ସଙ୍କେତ ଦେଇଛି । ଅନ୍ୟପକ୍ଷରେ, ନିର୍ବାଚନ କମିଶନ ପକ୍ଷରୁ SIR ସମ୍ପର୍କିତ ସମସ୍ତ ନିଷ୍ପତ୍ତି ସର୍ବସମ୍ମତିରେ ନିଆଯାଇଥିବା ନେଇ ପ୍ରତିକ୍ରିୟା ଆସିଛି ।