ନୂଆଦିଲ୍ଲୀ,୫।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଦିଲ୍ଲୀରେ ବିଭିନ୍ନ ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ କରିଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ମୋଦି ଆମ୍ ଆଦ୍ମୀ ପାର୍ଟି (ଆପ୍) ସରକାରଙ୍କୁ କଡ଼ା ସମାଲୋଚନା କରିଛନ୍ତି। ଏହି ସରକାର କେନ୍ଦ୍ର ସହ ଲଢ଼େଇ କରି ଗୋଟିଏ ଦଶନ୍ଧି ବରବାଦ କରିଦେଇଛି। ଜାତୀୟ ରାଜଧାନୀକୁ ଭବିଷ୍ୟତର ଏକ ମହାନଗର ଭାବେ ପରିବର୍ତ୍ତନ କରାଇବା ପାଇଁ ଭାଜପାକୁ ସୁଯୋଗ ଦେବାକୁ ସେ ଆହ୍ବାନ ଦେଇଛନ୍ତି। ଭାଜପା କ୍ଷମତାକୁ ଆସିଲେ ଗୋଟିଏ ହେଲେ ଜନକଲ୍ୟାଣ ଯୋଜନା ବନ୍ଦ ହେବ ନାହିଁ ବୋଲି ପ୍ରଧାନମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି। ତେବେ ଯୋଜନା କାର୍ଯ୍ୟକାରିତାରେ ରହିଥିବା ଦୁର୍ନୀତିର ମୂଳୋତ୍ପାଟନ ଭାଜପା ସରକାର କରିବ ବୋଲି ସେ କହିଛନ୍ତି।
ରୋହିଣୀ ଅଞ୍ଚଳରେ ଏକ ରାଲିକୁ ସମ୍ବୋଧିତ କରି ମୋଦି ଆପ୍ ସରକାରକୁ ବିପର୍ଯ୍ୟୟ ବୋଲି କହିବା ସହ ଏହା ଦିଲ୍ଲୀକୁ କ୍ଷତିଗ୍ରସ୍ତ କରାଇଛି। ଭାଜପା ଏଥିରେ ପରିବର୍ତ୍ତନ ଆଣିବ। ଦିଲ୍ଲୀବାସୀ ଆପଦାକୁ ଆଉ ସହିବେ ନାହିଁ। ସେମାନେ ପରିବର୍ତ୍ତନ ଆଣିବେ ବୋଲି ପ୍ରଧାନମନ୍ତ୍ରୀ କହିଛନ୍ତି।
କୋଭିଡ୍ ମହାମାରୀ ବେଳେ ଦିଲ୍ଲୀବାସୀ ଅକ୍ସିଜେନ୍ ଏବଂ ଔଷଧ ପାଇଁ ସଂଘର୍ଷ କରୁଥିବାବେଳେଆପଦା ଲୋକ (ଆପ୍ ନେତାମାନେ) ‘ଶୀଶ ମହଲ ନିର୍ମାଣ ଉପରେ ସମ୍ପୂର୍ଣ୍ଣ ଧ୍ୟାନ ଦେଇଥିଲେ। ଦିଲ୍ଲୀ ମୁଖ୍ୟମନ୍ତ୍ରୀଙ୍କ ପାଇଁ ଶୀଶ ମହଲା ନିର୍ମାଣରେ ବିପୁଳ ଅର୍ଥ ବ୍ୟୟ ହୋଇଛି। ଏହା ହେଉଛି ସେମାନଙ୍କ ଅସଲ ରୂପ। ଆପ୍ ନେତା ଜନସାଧାରଣଙ୍କୁ ଖାତିର କରିନାହାନ୍ତି ବୋଲି ମୋଦି କହିଛନ୍ତି। ଭାଜପା ସରକାର ଆସିଲେ କଲ୍ୟାଣକାରୀ ଯୋଜନାଗୁଡ଼ିକ ବନ୍ଦ ହୋଇଯିବ ବୋଲି ଆପ୍ ନେତାମାନେ ମିଥ୍ୟା ପ୍ରଚାର ଚଳାଇଛନ୍ତି। ଗୋଟିଏ ବି ଯୋଜନା ବନ୍ଦ ହେବ ନାହିଁ ବୋଲି ମୋଦି ଦିଲ୍ଲୀବାସୀଙ୍କୁ ପ୍ରତିଶ୍ରୁତି ଦେଇଥିଲେ।
