ମଣିଷ ଅପରାଧ କଲେ ହାଜତ ଯାଆନ୍ତି । ଦୋଷ ପାଇଁ ଦଣ୍ଡ ପାଆନ୍ତି । ତେବେ କଥା କହିପାରୁ ନ ଥିବା, ଭାବ ପ୍ରକାଶ କରିପାରୁ ନ ଥିବା ପ୍ରାଣୀ କ’ଣ କେବେ ଅପରାଧ କରନ୍ତି ? ଜାଣି ଆଶ୍ଚର୍ଯ୍ୟ ହେବେ କିଛି ନିରୀହ ପ୍ରାଣୀ ଆଇନ ଆଖିରେ ଅପରାଧୀ ସାଜିଛନ୍ତି ଓ ହାଜତ ବି ଯାଇଛନ୍ତି ….
ଗୁପ୍ତଚର ପାରା- ୨୦୧୫ରେ ଭାରତୀୟ ପୋଲିସ ଏକ ପାରାକୁ ଗୁପ୍ତଚର ଭାବେ ସନ୍ଦେହ କରି ଗିରଫ କରିଥିଲା। ସନ୍ଦେହର ପ୍ରଥମ କାରଣ ଥିଲା ପାରା ଶରୀରରେ ଷ୍ଟାମ୍ପ ମାରି କିଛି ଲେଖା ଯାଇଥିଲା। ଭଲରେ ଦେଖିବାରୁ ଜଣାପଡ଼ିଲା ତାହା ପାକିସ୍ତାନର ଅଫିସିଆଲ ଭାଷା ଉର୍ଦ୍ଦୁରେ ଲେଖା ହୋଇଥିଲା ଓ ତାହା କୌଣସି ପାକିସ୍ତାନୀଙ୍କ ଫୋନ୍ ନମ୍ବର ପରି ପ୍ରତ୍ୟେୟ ହେଉଥିଲା। ଦ୍ୱିତୀୟରେ ପାରାଟି କଶ୍ମୀରର ସେହି ପ୍ରାନ୍ତରେ ଦେଖିବାକୁ ମିଳିଥିଲା ଯେଉଁ ଅଞ୍ଚଳକୁ ଉଭୟ ଭାରତ ଓ ପାକିସ୍ତାନ ନିଜର ବୋଲି ଦାବିକରି ଯୁଦ୍ଧ କରିଆସୁଛନ୍ତି। ୧୪ ବର୍ଷ ବୟସର ଏକ ବାଳକ ଏହି ପାରାଟିକୁ ପାଇଥିଲା। ସନ୍ଦେହଜନକ ଲାଗୁଥିବାରୁ ସେ ପାରାଟିକୁ ପୋଲିସକୁ ହସ୍ତାନ୍ତର କରିଥିଲା। ଅଫିସରମାନେ ପାରାକୁ ଭେଟେରିନାରୀ ହସ୍ପିଟାଲ ନେଇ ଏକ୍ସ-ରେ କରାଇଥିଲେ। ତା’ସହ ଆହୁରି ଅନେକ କିଛି ଯାଞ୍ଚ କରିଥିଲେ। କିନ୍ତୁ ପାରାଟି ଗୁପ୍ତଚର ବୋଲି କିଛି ପ୍ରମାଣ ମିଳି ନ ଥିଲା। ତଥାପି ତାକୁ ସନ୍ଦେହ ଘେରରେ ନେଇ କଷ୍ଟଡିରେ ରଖିଥିଲେ। ଅନ୍ୟପକ୍ଷେ ଏହି ଘଟଣାକୁ ନେଇ ପାକିସ୍ତାନୀ ସୋସିଆଲ ମିଡିଆରେ ବହୁତ ମଜା ଉଠାଯାଇଥିଲା।
ଗାଳି ଦେଉଥିବା ଶୁଆ- ଏଇ ଘଟଣାଟି ମଧ୍ୟ ୨୦୧୫ର। ମହାରାଷ୍ଟ୍ରରେ ହରିୟଲ ନାମକ ଏକ ଶୁଆକୁ ଆସିଥିଲା ଥାନାରେ ହାଜର ହେବାର ନିର୍ଦ୍ଦେଶ। କାରଣ ୮୫ ବର୍ଷୀୟା ମହିଳା ଜନାବାଈ ଏହି ଶୁଆ ବିରୋଧରେ ଥାନାରେ ଅଭିଯୋଗ କରିଥିଲେ। ଶୁଆଟି ଥିଲା ମହିଳାଙ୍କ ସାବତ ପୁଅ ସୁରେଶ ସଖରକର୍ଙ୍କର। ସୁରେଶ ଓ ତାଙ୍କ ସାବତ ମା’ଙ୍କ ଭିତରେ ଜମିଜମାକୁ ନେଇ ବହୁପୂର୍ବରୁ କଳହ ଲାଗି ରହିଥିଲା। ତେଣୁ ସୁରେଶ ନିଜ ଶୁଆକୁ ଏମିତି ତାଲିମ ଦେଇଥିଲେ ଯେ, ତାଙ୍କ ସାବତ ମା’ ଯେବେ ଯେବେ ତାଙ୍କ ଘର ଦେଇ ଯାଉଥିଲେ ଶୁଆଟି ତାଙ୍କୁ ବହୁତ ଖରାପ ଭାଷାରେ ଗାଳି ଗୁଲଜ କରୁଥିଲା। ଦିନେ କି ଦୁଇଦିନ ନୁହେଁ ଦୁଇବର୍ଷ ଶୁଆଟି ଏହି ଭଳି ଗାଳି ଦେଇଆସୁଥିଲା। ଶେଷରେ ଏହାକୁ ସହି ନ ପାରି ଜନାବାଈ ଥାନାର ଦ୍ୱାରସ୍ଥ ହୋଇଥିଲେ। ଆଉ ଶୁଆ ଉପରେ କାର୍ଯ୍ୟାନୁଷ୍ଠାନ କରିବାକୁ ଅନୁରୋଧ କରିଥିଲେ। ହେଲେ ପୋଲିସ ଯେବେ ଶୁଆକୁ ନିଜ କଷ୍ଟଡିକୁ ନେଲା ତା’ ପରଠାରୁ ଶୁଆଟି କଥା କହିବା ପୂରା ବନ୍ଦ କରିଦେଲା। ବୋଧହୁଏ ଶୁଆ ଜାଣିଥିଲା କେଉଁଠି ନିଜର ଚଞ୍ଚୁ ଖୋଲିବା କଥା ଓ କେଉଁଠି ନୁହେଁ। ଶେଷରେ ପୋଲିସ ହରିୟଲକୁ ବନ୍ଦି କରି ରଖିବାକୁ ଉଚିତ ମଣି ନ ଥିଲା। ଆଉ ତାକୁ ବନ ବିଭାଗକୁ ହସ୍ତାନ୍ତର କରିଦେଇଥିଲା।
କୁକୁରକୁ ଆଜୀବନ କାରାଦଣ୍ଡ- ୧୯୨୪, ପେନସିଲଭାନିଆରେ ଗଭର୍ନର ଗିଫର୍ଡ ପିନଚଟ୍ ଏକ କଳାରଙ୍ଗର ଲାବ୍ରାଡର କୁକୁରକୁ ଦେଇଥିଲେ ଆଜୀବନ କାରାଦଣ୍ଡ। ସେପୁଣି ବିନା ପାରୋଲ୍ରେ। ପେପ୍ ନାମକ ଏହି କୁକୁର ମୁଣ୍ଡ ଉପରେ ଥିଲା ଗଭର୍ନରଙ୍କ ସ୍ତ୍ରୀଙ୍କ ବିଲେଇର ହତ୍ୟା ଅଭିଯୋଗ। ଗଣମାଧ୍ୟମରେ ତାକୁ ‘ପେପ୍ ଦ କ୍ୟାଟ୍ ମର୍ଡରିଂ ଡଗ୍’ ଆଖ୍ୟା ଦିଆଯାଇଥିଲା। ହେଲେ ପରବର୍ତ୍ତୀ ସମୟରେ ଜଣାପଡ଼ିଥିଲା ଯେ, ପେପ୍ କୌଣସି ବିଲେଇକୁ ହତ୍ୟା କରି ନ ଥିଲା। ତଥାପି ସେ ଆଜୀବନ ଜେଲ୍ରେ ରହିଥିଲା। ହେଲେ ବେଶ୍ ଭଲରେ ବିତୁଥିଲା ତା’ ସମୟ। ଯେତେବେଳେ ତାର ମୃତ୍ୟୁ ହେଲା ସେହି ଜେଲ୍ରେ ହିଁ ତାକୁ କବର ଦିଆଯାଇଥିଲା।
ମାଙ୍କଡ ଗଲା ଜେଲ- ପଞ୍ଜାବର ପଟିଆଲାରେ ଏକ ମାଙ୍କଡ ବହୁତ ଉତ୍ପାତ ହେଉଥିଲା। କେତେବେଳେ କାହାଘରୁ ଖାଦ୍ୟ ଚୋରାଉଥିଲା ତ କେବେ କାହା ଶାର୍ଟର ବଟନ୍ ଛିଣ୍ଡେଇ ଦେଉଥିଲା। ପୁଣି କେବେ ଆକ୍ରମଣ କରି ରାମ୍ପି ଦେଉଥିଲା। ଛୋଟ ପିଲାଙ୍କୁ ପଥର ଧରି ଗୋଡାଉଥିଲା। ଶେଷରେ ମାଙ୍କଡ ବିରୋଧରେ ଅଭିଯୋଗ କରାଯାଇଥିଲା। ଆଉ ବନ ବିଭାଗ ଅଧିକାରୀ ମାଙ୍କଡକୁ ଧରି ମଙ୍କି ଜେଲ୍କୁ ପଠେଇ ଦେଇଥିଲେ, ଯାହାକି ସ୍ଥାନୀୟ ଚିଡିଆଖାନାର ଏକ କୋଣରେ ତିଆରି ହୋଇଥିଲା। ଜେଲରେ ଫଳକ ଲଗାଯାଇ ଲେଖାଯାଇଥିଲା ଯେ, ଏହି ମାଙ୍କଡଗୁଡିକୁ ପଞ୍ଜାବର ବିଭିନ୍ନ ସ୍ଥାନରୁ ଆଣି ରଖାଯାଇଛି। ଏମାନେ ବହୁତ ବଦ୍ମାସ୍। ଏମାନଙ୍କ ନିକଟକୁ ଯିବା ବିପଜ୍ଜନକ।
ଜେଲରୁ ଖସିବାରେ ସାହାଯ୍ୟ କରି ବିଲେଇ ଗିରଫ- ମଧ୍ୟମଧରଣର ସୁରକ୍ଷା ଥିବା ବ୍ରାଜିଲ, ଅରାପିରାକା ଜେଲର ଏକ ଫାଟକ ପାଖରେ ବୁଲୁଥାଏ ଏକ ଧଳା ରଙ୍ଗର ବିଲେଇ। ହଠାତ ଜଣେ ସୁରକ୍ଷାକର୍ମୀଙ୍କ ନଜର ବିଲେଇ ଉପରେ ପଡ଼ିଲା। ଦେଖିଲେ ବିଲେଇ ଦେହରେ ଟେପ୍ ଗୁଡେଇ ହୋଇଥିଲା। ଭାବିଲେ ବୋଧହୁଏ କୌଣସି ଦୁଷ୍ଟପିଲା ଏଭଳି କରିଛି। କିନ୍ତୁ ବିଲେଇଟି ସେହି ସ୍ଥାନ ଛାଡି ଯାଉ ନ ଥିଲା। ତେଣୁ ସନ୍ଦେହ କରି ସୁରକ୍ଷା କର୍ମଚାରୀ ତାକୁ ତନଖି ଦେଖିଲେ। ଆଉ ଯାହା ପାଇଲେ ସେଥିରେ ଚକିତ ହୋଇଗଲେ। କାରଣ ବିଲେଇ ଦେହରେ ଗୁଡାଯାଇଥିବା ଟେପ୍ ଖୋଲି ଯେତେବେଳେ ଦେଖିଲେ ତା’ ଭିତରେ ଛୋଟ କରତ, ଛୋଟ ଡ୍ରିଲ, ଇୟରଫୋନ୍, ମେମୋରୀ କାର୍ଡ, ବ୍ୟାଟେରି ଓ ଫୋନ୍ ଚାର୍ଜର ଥିଲା। ଜେଲ ଅଧିକାରୀଙ୍କ ଅନୁସାରେ, ବିଲେଇଟି ଆଗରୁ ବି ଜେଲ୍ ଭିତରକୁ ଯାଉଥିଲା। କଏଦୀମାନେ ତାକୁ ଆଦର କରନ୍ତି। ଛୋଟବେଳୁ ସେ ଜେଲକୁ ଆସୁଛି। ହେଲେ ସେ କେଉଁ କଏଦୀକୁ ଜେଲରୁ ଫେରାର୍ ହେବା ପାଇଁ ସାହାଯ୍ୟ କରୁଥିଲା ଜାଣି ହେଉନି। ତେଣୁ ତାକୁ କିଛି ଦିନ ପାଇଁ ସ୍ବତନ୍ତ୍ର ଜେଲରେ ରଖି ପରେ ସ୍ଥାନୀୟ ଆନିମଲ ସେଣ୍ଟରକୁ ପଠେଇ ଦେଇଥିଲୁ।
କୁନି ଗୁଣ୍ଡୁଚି ସାଜିଲା ଅପରାଧୀ- ପଶ୍ଚିମ ଜର୍ମାନୀର ବୋର୍ତ୍ତୋପ ସହରର ଏକ ଗଳିରେ ଯାଉଥିଲେ ଜଣେ ମହିଳା। ହଠାତ ସେ ଦେଖିଲେ ଏକ କୁନି ଈଷତ୍ ଲାଲରଙ୍ଗର ଗୁଣ୍ଡୁଚି ବେଶ୍ ରାଗିବା ଢଙ୍ଗରେ ତାଙ୍କୁ ପିଛା କରୁଛି। ଛୋଟିଆ ପ୍ରାଣୀ ହେଲେ ବି ତା’ର ଢଙ୍ଗ ଥିଲା ବେଶ୍ ଭୟଙ୍କର। ସେ ପାଖକୁ ଆସି ମହିଳାଙ୍କୁ କାମୁଡିବାକୁ ଚେଷ୍ଟା କଲା। ମହିଳାଜଣକ ଚାହିଁ ବି ତାଠୁ ପିଛା ଛଡ଼େଇ ପାରିଲେ ନାହିଁ। ଶେଷରେ ସେ ପୋଲିସଙ୍କ ସାହାଯ୍ୟ ଲୋଡ଼ିଲେ। ପୋଲିସ୍ ଆସି ଗୁଣ୍ଡୁଚିକୁ କାବୁ କଲା। ଆଉ ଅପରାଧୀ ଗୁଣ୍ଡୁଚିକୁ ପୋଲିସଷ୍ଟେଶନ୍ ନେଇ ଆସିଲେ। ଅନୁଧ୍ୟାନ କରିବାରୁ ଜାଣିବାକୁ ପାଇଲେ ଯେ, ଗୁଣ୍ଡୁଚି ଅବସାଦର ଶିକାର ହୋଇଛି। ତେଣୁ ତାକୁ ମହୁ ଖୁଆଇ ସୁସ୍ଥ କରିବାକୁ ଚେଷ୍ଟା କଲେ। ଏହାପରେ ତାକୁ ଆକ୍ରମଣକାରୀ ଭାବେ ବନ୍ଦି କରି ନ ରଖି ବରଂ ରେସ୍କ୍ୟୁ ସେଣ୍ଟର ପଠାଇଦେଲେ।
ଜେଲରେ ଗଧ-୨୦୦୮ରେ ଦକ୍ଷିଣ ମେକ୍ସିକୋର ଚିଆପସ୍ର ପୋଲିସ ବ୍ଲାକି ନାମକ ଏକ ଗଧକୁ ଆରେଷ୍ଟ କରିଥିଲା। ତା’ର ଅପରାଧ ଏହା ଥିଲା ଯେ, ସେ ଜଣେ ବ୍ୟକ୍ତିଙ୍କ ଛାତିକୁ ମୁଣ୍ଡରେ ମାରିବା ସହ ଆଉ ଜଣେ ବ୍ୟକ୍ତିଙ୍କୁ ଗୋଇଁଠା ମାରିଥିଲା। ଏହାପରେ ପୋଲିସ ଗଧକୁ ଗିରଫ କରି ଜେଲ୍ରେ ରଖିଥିଲା। ପୋଲିସଙ୍କ କହିବାନୁସାରେ ଯେ ପର୍ଯ୍ୟନ୍ତ ତା’ର ମାଲିକ ଆହତ ହୋଇଥିବା ବ୍ୟକ୍ତିଙ୍କ ଚିକିତ୍ସା ଖର୍ଚ୍ଚ ଓ କାମକୁ ଯାଇପାରି ନ ଥିବାରୁ ତାଙ୍କ ପାଉଣା ଦେଇ ନ ଥିଲେ ସେତେଦିନ ପର୍ଯ୍ୟନ୍ତ ବ୍ଲାକି ରହିଥିଲା ଜେଲରେ।
