କୁଜଙ୍ଗ,୧୮ା୮(ଡି.ଏନ୍.ଏ.): ଜଗତ୍ସିଂହପୁର ଜିଲାରେ ବୁଧବାର କୁଜଙ୍ଗ ବ୍ଲକ ଅଞ୍ଚଳରେ ୨ଟି ଘାଇ ହୋଇଛି। ଗୋଟିଏ ସକାଳେ ମହାନଦୀର ଘେରିବନ୍ଧର ତେରମାଣପୁରଠାରେ ହୋଇଥିବା ବେଳେ ଅପରାହ୍ନରେ ପାଇକା ନଦୀବନ୍ଧର କାଠକୋଟଠାରେ ୫୦ ଫୁଟର ଏକ ଘାଇ ହୋଇଛି। ଏଥିଯୋଗୁ ବ୍ଲକ ଅନ୍ତର୍ଗତ ହଂସୁରା, କାଠକୋଟ, ବଡବାଲିକଣି, ତାଳପଡା, ସାଇଲୋ, ମହ୍ଲାସାହି, ଜିଲାନାସୀ, କୁଜଙ୍ଗ, ଭୂତମୁଣ୍ଡାଇ ଓ ନୂଆଗଡ଼ ପଞ୍ଚାୟତ ଅନ୍ତର୍ଗତ ୩୪ଟି ଗାଁର ୧୫ ହଜାର ଲୋକ ଜଳବନ୍ଦୀ ହୋଇଛନ୍ତି। ବନ୍ୟା ବିପନ୍ନ ଅଞ୍ଚଳରେ ଲୋକଙ୍କ ଦୁର୍ଦ୍ଦଶା ଲଘୁଚାପଜନିତ ଝିପିଝିପି ବର୍ଷା ବଢାଇ ଦେଇଛି।
ମଙ୍ଗଳବାର ବଡ଼ବାଲିକଣି ଓ ଜିଲାନାସୀ ପଞ୍ଚାୟତରେ ରାସ୍ତା ଓ ଘେରିବନ୍ଧରେ ୩ଟି ଘାଇ ହୋଇଥିଲା। ବୁଧବାର ସୃଷ୍ଟି ହୋଇଥିବା ୨ଗୋଟି ଘାଇ ଅଞ୍ଚଳବାସୀଙ୍କ ଦୁଃଖକୁ ବଢାଇ ଦେଇଛି। ସାଇଲୋ ପଞ୍ଚାୟତର ହରିପୁରଠାରେ ଏନ୍ଡିଆର୍ଏଫ୍ ଟିମ୍ ଉପସ୍ଥିତ ରହି ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ସାଇଲୋ ପଞ୍ଚାୟତର ହରିପୁର, ଜିଲାନାସୀ ପଞ୍ଚାୟତର ଜୟଶଙ୍ଖପୁର ଓ ସାହାରାଡିଆ, ମହ୍ଲାସାହି ପଞ୍ଚାୟତର ମଧୁପୁର, କୁଜଙ୍ଗ ପଞ୍ଚାୟତର ଭଣ୍ଡୁଆକୁ ୩୮ କୁଇଣ୍ଟାଲ ଗୋଖାଦ୍ୟ, ୩୦ କୁଇଣ୍ଟାଲ ଚୁଡା, ୧୨ କୁଇଣ୍ଟାଲ ଗୁଡ଼ ଓ ୪୦ ପେଟି ବିସ୍କୁଟ ଯୋଗାଇ ଦିଆଯାଇଛି। ଅନ୍ୟପକ୍ଷେ ମଙ୍ଗଳବାର ୭ଟା ଡଙ୍ଗା ବନ୍ୟା ପ୍ରଭାବିତ ଅଞ୍ଚଳକୁ ପ୍ରଶାସନ ପକ୍ଷରୁ ଯୋଗାଇ ଦିଆଯାଇଥିଲା। ବୁଧବାର ଆଉ ୯ଟି ଡଙ୍ଗା ଯୋଗାଇ ଦିଆଯାଇଛି ବୋଲି ବ୍ଲକ ପ୍ରଶାସନ ପକ୍ଷରୁ କୁହାଯାଇଛି। ଉକ୍ତ ଡଙ୍ଗା ପ୍ରଭାବିତ ଅଞ୍ଚଳକୁ ପର୍ଯ୍ୟାପ୍ତ ହେଉନାହିଁ ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ପାଇକା ନଦୀରେ ସୃଷ୍ଟ ୫୦ ଫୁଟର ଘାଇରେ ତୀବ୍ର ଜଳସ୍ରୋତ ଯୋଗୁ କାଠକୋଟ ଓ ବାଣସରା ଗଁାରେ ବ୍ୟାପକ ଘରଦ୍ୱାରା କ୍ଷତିଗ୍ରସ୍ତ ହୋଇଯାଇଛି। ଖବର ଲେଖା ହେବା ସୁଦ୍ଧା ପ୍ରଶାସନ ସେଠାରେ ପହଞ୍ଚତ୍ ନ ଥିବା ବିପନ୍ନ ଲୋକ ଅଭିଯୋଗ କରିଛନ୍ତି। ସେମାନେ ଭୟ ଓ ଆତଙ୍କିତ ଅବସ୍ଥାରେ ଅଛନ୍ତି। କୁଜଙ୍ଗ ବିଡିଓ ସୌମ୍ୟଶ୍ରୀ ପାଣିଗ୍ରାହୀ କାର୍ଯ୍ୟାଳୟରେ ନ ରହି ବନ୍ୟାଞ୍ଚଳ ବୁଲୁଥିବା ବେଳେ ବ୍ଲକ କାର୍ଯ୍ୟାଳୟ ସମ୍ମୁଖରେ ରିଲିଫ ପାଇଁ ବିପନ୍ନମାନେ ପହଞ୍ଚତ୍ ଫେରୁଥିବା ଦେଖିବାକୁ ମିଳିଥିଲା। ତାଳଦଣ୍ଡା କେନାଲ ବନ୍ଧରେ କେତେକ ଦୁର୍ବଳ ସ୍ଥାନରେ ଘଳିଆ ପଡିବା ଯୋଗୁ ପ୍ରଶାସନ ପକ୍ଷରୁ ବାଲିବସ୍ତା ପକାଯାଉଛି। ବ୍ଲକ ଅଞ୍ଚଳରେ ୧,୪୭୬ ହେକ୍ଟର ଚାଷ ଜମିରେ ଧାନ ଓ ପନିପରିବା ନଷ୍ଟ ହୋଇଥିବା ପ୍ରଶାସନ ପକ୍ଷରୁ କୁହାଯାଇଛି।
