ନୂଆଦିଲ୍ଲୀ,୧୬ ।୩
କେନ୍ଦ୍ର ସରକାର ନଭେମ୍ବର ୨୦୧୬ ରେ ନୂଆ ବିମୁଦ୍ରୀକରଣ ନିୟମ ଲାଗୁ କରିଥିଲେ। ଫଳରେ ଦେଶରେ ଆଉ ପୁରୁଣା ୫୦୦ ଏବଂ ୧୦୦୦ ଟଙ୍କିଆ ନୋଟ୍ର ପ୍ରଚଳନ ହୋଇପାରିବ ନାହିଁ ବୋଲି ସରକାର ଘୋଷଣା କରିଥିଲେ। ବିମୁଦ୍ରୀକରଣ ପରେ ଦେଶରେ ନୂଆ ୫୦୦ ଏବଂ ୨୦୦୦ ଟଙ୍କିଆ ନୋଟ୍ର ପ୍ରଚଳନ ଆରମ୍ଭ ହୋଇଥିଲା। ସେହି ସମୟରେ ଯାହା ପ୍ରିଣ୍ଟ କରାଯାଇଥିଲା ସେହି ନୂଆ ୨୦୦୦ଟଙ୍କିଆ ବଜାରରେ ବିତରଣ ହେଉଛି। ଗତ ଦୁଇ ବର୍ଷ ମଧ୍ୟରେ ନୂଆ ୨ ହଜାର ଟଙ୍କିଆ ନୋଟ୍ ଆଉ ଛାପା ହୋଇ ନ ଥିବା ସରକାରଙ୍କ ପକ୍ଷରୁ ଲୋକ ସଭାରେ କୁହାଯାଇଛି। ବର୍ତ୍ତମାନ ନୂଆ ୨୦୦୦ ଟଙ୍କିଆ ପ୍ରଚଳନ ବନ୍ଦ କରିବାକୁ ସରକାର ପ୍ରସ୍ତୁତ ହେଉଥିବା ଜାତୀୟ ଗଣମାଧ୍ୟମରେ ଜୋର୍ଦାର ଚର୍ଚ୍ଚା ହେଉଛି ।
କେନ୍ଦ୍ର ସରକାରଙ୍କ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର ଏକ ଲିଖିତ ପ୍ରଶ୍ନର ଉତ୍ତର ଦେଇ କହିଛନ୍ତି, ୨୦୧୮ ମାର୍ଚ୍ଚ ୩୦ ସୁଦ୍ଧା ୩,୩୬୨ ନିୟୁତ ୨ହଜାର ଟଙ୍କିଆ ନୋଟ୍ ବଜାରରେ ପ୍ରଚଳିତ ଥିଲା। ୨୦୨୧ ଫେବୃୟାରୀ ୨୬ ସୁଦ୍ଧା ମାର୍କେଟରେ ୨୪୯୯ ଖଣ୍ଡ ୨ ହଜାର ଟଙ୍କିଆ ନୋଟ୍ ପ୍ରଚଳିତ ହେଉଥିଲ। ସେହିଭଳି ଠାକୁର କହିଛନ୍ତି, କେଉଁ ମୂଲ୍ୟର ନୋଟ୍ ହେଲେ ଲୋକଙ୍କ ବ୍ୟବହାର ଓ କାରବାର ସହଜ ହେବା ସହ ସେମାନଙ୍କ ଚାହିଦା ପୂରଣ ହୋଇପାରିବ ତାହା ଆର୍ବିଆଇ ଧାର୍ଯ୍ୟ କରେ। ୨୦୧୯-୨୦ ଏବଂ ୨୦୨୦-୨୧ରେ ୨୦୦୦ ଟଙ୍କିଆ ନୋଟ୍ ଛାପାଇବା ପାଇଁ ଅର୍ଡର ଦିଆଯାଇ ନାହିଁ।
ସେହିପରି ୨୦୧୯ରେ ଆର୍ବିଆଇ ପକ୍ଷରୁ ମିଳିଥିବା ସୂଚନା ଅନୁସାରେ ଆର୍ଥିକ ବର୍ଷ ୨୦୧୬-୧୭ରେ ୩୫୪.୨୯୯୧ କୋଟି ନୋଟ୍ ଛାପାଯାଇଥିଲା। ୨୦୧୭-୧୮ରେ ମାତ୍ର ୧୧.୧୫୦୭ କୋଟି ଏବଂ ୨୦୧୮-୧୯ରେ ୪.୬୬୯ କୋଟି ନୋଟ୍ ପ୍ରିଣ୍ଟ ହୋଇଥିବା ବେଳେ ଏପ୍ରିଲ ୨୦୧୯ ପରେ ଆଉ ନୂଆ ନୋଟ୍ ଛାପାଯାଇନାହିଁ।
