ଭୁବନେଶ୍ୱର, ୧୨।୯(ବ୍ୟୁରୋ): ରାଜ୍ୟକୁ ଆଳୁ ଉତ୍ପାଦନରେ ସ୍ବାବଲମ୍ବୀ କରିବାରେ ସରକାର ସମ୍ପୂର୍ଣ୍ଣ ଫେଲ୍ ମାରିଛନ୍ତି। ଚାଷୀମାନଙ୍କୁ ଆଳୁ ଚାଷ ପାଇଁ ପ୍ରୋତ୍ସାହିତ କରିବା ଏବଂ ଉଦ୍ୟୋଗୀମାନଙ୍କୁ ଶୀତଳଭଣ୍ଡାର ପ୍ରତିଷ୍ଠା ପାଇଁ ସହାୟତା ଯୋଗାଇବା ଲକ୍ଷ୍ୟରେ ରାଜ୍ୟ ସରକାର ୨୦୧୫ ଏପ୍ରିଲ ୩୦ରେ ଆଳୁ ମିଶନ ପ୍ରତିଷ୍ଠା କରିଥିଲେ। ଇତିମଧ୍ୟରେ ୬ ବର୍ଷରୁ ଅଧିକ ଦିନ ବିତିଯାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଏପରି କି ରାଜ୍ୟରେ ଆଳୁଚାଷ ଦିନକୁ ଦିନ ହ୍ରାସ ପାଉଥିବା କୃଷି ମନ୍ତ୍ରୀ ଅରୁଣ କୁମାର ସାହୁ ସ୍ବୀକାର କରିଛନ୍ତି।
ବିଜେଡି ବିଧାୟକ ପ୍ରଫୁଲ୍ଲ ସାମଲ ବିଧାନସଭାରେ ଏକ ପ୍ରଶ୍ନ ଜରିଆରେ ପଚାରିଥିଲେ ଯେ, ୨୦୧୫ରେ ଆରମ୍ଭ ହୋଇଥିବା ଆଳୁ ମିଶନର ଲକ୍ଷ୍ୟ କ’ଣ ଥିଲା ଏବଂ ବର୍ତ୍ତମାନ ଆଳୁ ରଖିବା ଓ ବଜାରରେ ଅଭାବ ପ୍ରତି ସରକାରଙ୍କ ପଦକ୍ଷେପ କ’ଣ ରହିଛି। ଏହାର ଉତ୍ତରରେ ମନ୍ତ୍ରୀ ସାହୁ କହିଛନ୍ତି, ରାଜ୍ୟକୁ ଆଳୁ ଉତ୍ପାଦନରେ ସ୍ବାବଲମ୍ବୀ କରିବା, ଚାଷୀଙ୍କୁ ଏଥିପାଇଁ ପ୍ରୋତ୍ସାହିତ କରିବା, ଉଦ୍ୟୋଗୀମାନଙ୍କୁ ଶୀତଳ ଭଣ୍ଡାର ପ୍ରତିଷ୍ଠା ପାଇଁ ସହାୟତା ଯୋଗାଇବା ଲକ୍ଷ୍ୟରେ ଆଳୁ ମିଶନ ପ୍ରତିଷ୍ଠା ହୋଇଥିଲା। ଏବେ ଆଳୁ ଚାଷ ହ୍ରାସ ପାଉଥିବା ବେଳେ ଏହାକୁ ବୃଦ୍ଧି କରିବା ପାଇଁ ପଦକ୍ଷେପ ନିଆଯାଉଛି। ସେହିପରି ୨୦୧୬-୧୭ରେ ୨୫,୧୮୫ ହେକ୍ଟର ଚାଷ ଜମିରେ ୩.୦୨ ଲକ୍ଷ ମେଟ୍ରିକ ଟନ୍, ୨୦୧୭-୧୮ରେ ୨୫,୦୯୦ ହେକ୍ଟର ଚାଷ ଜମିରେ ୨.୯୮ ଲକ୍ଷ ମେଟ୍ରିକ ଟନ୍, ୨୦୧୮-୧୯ରେ ୨୪,୬୮୭ ହେକ୍ଟର ଜମିରେ ୨.୯୦ ଲକ୍ଷ ମେଟ୍ରିକ ଟନ ଏବଂ ୨୦୧୯-୨୦ରେ ୨୪,୭୧୪ ହେକ୍ଟର ଚାଷ ଜମିରେ ୨.୯୪ ଲକ୍ଷ ମେଟ୍ରିକ ଟନ୍ ଆଳୁ ଉତ୍ପାଦନ ହୋଇଥିଲା। ୨୦୨୦-୨୧ ବର୍ଷରେ ଗତ ୫ ବର୍ଷ ତୁଳନାରେ ଅଧିକ ଜମିରେ ଅର୍ଥାତ୍ ୨୬ ହଜାର ହେକ୍ଟର ଚାଷ ଜମିରେ ଆଳୁ ଉତ୍ପାଦନ କରାଯାଇଛି। କିନ୍ତୁ ୩.୦୯ ଲକ୍ଷ ମେଟ୍ରିକ ଟନ୍ ଆଳୁ ଉତ୍ପାଦନ ହୋଇପାରିଛି।
ଅନ୍ୟପକ୍ଷରେ ରାଜ୍ୟରେ ୧୩୧ ଶୀତଳଭଣ୍ଡାର ମଧ୍ୟରୁ ଏବେ ମୋଟ ୪୯ଟି କାର୍ଯ୍ୟକ୍ଷମ ଅଛି। ୨୦୧୫ରୁ ଏଯାବତ୍ ୨୪ ଜଣ ଉଦ୍ୟୋଗୀ ଶୀତଳଭଣ୍ଡାର ନିର୍ମାଣ କରିଛନ୍ତି। ସେହି ଉଦ୍ୟୋଗୀମାନଙ୍କୁ କୃଷି ଉଦ୍ୟାନ ବିଭାଗ ତରଫରୁ ୪୯୪୪.୪୦ ଲକ୍ଷ ଟଙ୍କାର ରିହାତି ଆକାରରେ ଟଙ୍କା ପ୍ରଦାନ କରାଯାଇଛି। ଉକ୍ତ ୨୪ଟି ଶୀତଳ ଭଣ୍ଡାରରରେ ସଂରକ୍ଷଣ କ୍ଷମତା ୧,୧୦,୬୦୦ ମେଟ୍ରିକ ଟନ୍। ସୂଚନାଯୋଗ୍ୟ ଯେ, ରାଜ୍ୟରେ ଶୀତଳ ଭଣ୍ଡାର ପ୍ରତିଷ୍ଠା ଲାଗି ଜାତୀୟ ଉଦ୍ୟାନ ମିଶନରୁ ସାଧାରଣ ଅଞ୍ଚଳ ଲାଗି ୩୫ ପ୍ରତିଶତ ବା ସର୍ବାଧିକ ୧୪୦.୦ ଲକ୍ଷ ଟଙ୍କା ଓ ଅନୁସୂଚିତ ଅଞ୍ଚଳ ପାଇଁ ୫୦ ପ୍ରତିଶତ ସର୍ବାଧିକ ୨୦୦.୦୦ ଲକ୍ଷ ଟଙ୍କା ରିହାତି ପ୍ରଦାନ କରାଯାଉଛି। ଖାଦ୍ୟ ପ୍ରକ୍ରିୟାକରଣ ଓ ଶୀତଳ ଭଣ୍ଡାର କ୍ଷେତ୍ରରେ ଘରୋଇ ପୁଞ୍ଜିନିବେଶ ନିମନ୍ତେ ସରକାର ଓଡ଼ିଶା ଖାଦ୍ୟ ପ୍ରକ୍ରିୟାକରଣ ନୀତି-୨୦୧୩, ଓଡିଶା ଖାଦ୍ୟ ପ୍ରକ୍ରିୟାକରଣ ନୀତି-୨୦୧୬ ଏବଂ ଶିଳ୍ପନୀତି ନିର୍ଦ୍ଧାରଣ-୨୦୧୫ ପ୍ରଣୟନ କରିଥିବା ମନ୍ତ୍ରୀ ସାହୁ ଆଉ ଏକ ପ୍ରଶ୍ନର ଉତ୍ତରରେ ଦର୍ଶାଇଛନ୍ତି। ସରକାର ଏତେସବୁ ସୁବିଧା ଯୋଗାଇବା ସତ୍ତ୍ୱେ ଗତ ୫ ବର୍ଷରେ ୨୪ଟି ଶୀତଳଭଣ୍ଡାର ରାଜ୍ୟରେ ପ୍ରତିଷ୍ଠା ହେବାକୁ ନେଇ ସାଧାରଣରେ ପ୍ରଶ୍ନ ଉଠିଛି।
