ଭଦ୍ରକ ଅଫିସ, ୧୨ା୯-ବିଷପିଇ ଗୁରୁତର ଥିବା ଭଦ୍ରକ ଜିଲା ତିହିଡ଼ି ଅଞ୍ଚଳର ଆଇଟିଆଇ କଲେଜ ଛାତ୍ର ଆଶୁତୋଷ ମଲ୍ଲିକ(୨୦) ରବିବାର ରାତିରେ ଆଖି ବୁଜିଛନ୍ତି। ସେ କଟକ ବଡ଼ ଡାକ୍ତରଖାନାରେ ଚିକିତ୍ସାଧୀନ ଥିଲେ। ତାଙ୍କ ମୃତ୍ୟୁ ପରେ ଜେଜେମା ରଜନୀରାଣୀ ମଲ୍ଲିକ ତିହିଡ଼ି ଥାନାରେ ଅଭିଯୋଗ କରିଛନ୍ତି। ନାତିଙ୍କ ମୃତ୍ୟୁ ପାଇଁ ତାଙ୍କ ସାଙ୍ଗମାନଙ୍କୁ ଦାୟୀ କରି ସେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏହି ଅଭିଯୋଗକୁ ଭିତ୍ତିକରି ଥାନାରେ ଏକ ମାମଲା (ନଂ.୩୮୩/୨୨) ରୁଜୁ କରାଯାଇଛି। ଆଶୁତୋଷ ବିଷପିଇ ପଡ଼ିଥିବା ସ୍ଥାନରୁ ମିଳିଥିବା ସୁଇସାଇଡ୍ ନୋଟ୍ ଆଧାରରେ ତଦନ୍ତ ଚାଲିଛି। ତେବେ ସେ ଉକ୍ତ ନୋଟ୍ରେ ଆତ୍ମହତ୍ୟା ପାଇଁ ସହପାଠୀମାନଙ୍କୁ ଦାୟୀ କରିଥିବା ବେଳେ କାହାରି ନାଁ ଲେଖି ନ ଥିବା ଆଇଆଇସି ତପନ କୁମାର ପ୍ରଧାନ କହିଛନ୍ତି।
ସୂଚନାଯୋଗ୍ୟ, ତିହିଡ଼ି ଥାନା ଅଧୀନ ଅଚକ ପଞ୍ଚାୟତ ସାନ୍ତରାପୁର ଛନ୍ଦାସାହିର ଭକ୍ତହରି ମଲ୍ଲିକଙ୍କ ପୁଅ ଆଶୁତୋଷ ଏକ ଘରୋଇ ଆଇଟିଆଇ କଲେଜରେ ଇଲେକ୍ଟ୍ରିକାଲ ଟ୍ରେଡ୍ରେ ପ୍ରଥମ ବର୍ଷର ଛାତ୍ର ଥିଲେ। ଗତ ଶୁକ୍ରବାର ଅପରାହ୍ନରେ ସେ ମା’ଙ୍କ ସହ ତିହିଡ଼ି ବଜାରକୁ ଯାଇଥିବା ବେଳେ ସେଠାରେ କେତେଜଣ ସହପାଠୀ ତାଙ୍କ ପାଠପଢ଼ାକୁ ନେଇ ଥଟ୍ଟା ପରିହାସ କରିଥିଲେ। ସେଠାରୁ ଫେରିବା ପରେ ଏଥିରେ ମର୍ମାହତ ହୋଇ ସେ ସନ୍ଧ୍ୟାରେ ଘରୁ ପଳାଇ ବିଷପିଇ ଦେଇଥିଲେ। ରାସ୍ତାକଡ଼ରୁ ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ପ୍ରଥମେ ତିହିଡ଼ି ସ୍ବାସ୍ଥ୍ୟକେନ୍ଦ୍ର ଓ ପରେ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ଶନିବାର କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ତେବେ ପରିବାର ପକ୍ଷରୁ ପୂର୍ବରୁ ଥାନାରେ କୌଣସି ଅଭିଯୋଗ ହୋଇ ନ ଥିବାବେଳେ ତିହିଡ଼ି ପୋଲିସ ନିଜ ଆଡୁ ଆଶୁତୋଷଙ୍କର କେତେଜଣ ସହପାଠୀଙ୍କୁ ପଚରାଉଚରା କରିଥିଲା। ସେଥିରୁ ଆଶୁତୋଷଙ୍କୁ ରାଗିଂ କରାଯାଇ ନ ଥିବା ଥାନାଧିକାରୀ ପ୍ରଧାନ ପ୍ରକାଶ କରିଥିଲେ। ସୋମବାର ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।
