ଖୋର୍ଦ୍ଧା ଅଫିସ,୨୩ା୫: ଖୋର୍ଦ୍ଧା ଶିଳ୍ପାଞ୍ଚଳଠାରେ ସୋମବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଇଟିସିର ଅତ୍ୟାଧୁନିକ ଇଣ୍ଟିଗ୍ରେଟେଡ ଗ୍ରାହକ ସାମଗ୍ରୀ ଉପତ୍ାଦନ ଏବଂ ଲଜିଷ୍ଟିକ(ଆଇସିଏମଏଲ) ସୁବିଧା କେନ୍ଦ୍ର ଉଦ୍ଘାଟନ କରିଛନ୍ତି। ୩୫ ଏକର ପରିମିତ ଅଞ୍ଚଳରେ ନିର୍ମିତ ଏହି କେନ୍ଦ୍ରରେ ନୂତନ କୃଷି ମୂଲ୍ୟବୋଧ ଶୃଙ୍ଖଳା ଏବଂ ଜୀବିକା ଉପଲବ୍ଧ ହେବ। ପର୍ଯ୍ୟାୟକ୍ରମେ ଆଇଟିସିର ବିଶ୍ୱସ୍ତରୀୟ ଖାଦ୍ୟ ବ୍ରାଣ୍ଡ ଉପତ୍ାଦନ କରାଯିବ ବୋଲି ଆଇଟିସି ଲିମିଟେଡର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ସଞ୍ଜୀବ ପୁରୀ କହିଛନ୍ତି। ଓଡ଼ିଶାକୁ ଦେଶର ପରବର୍ତ୍ତୀ ଇଣ୍ଡଷ୍ଟ୍ରିଆଲ ହବ୍ କରାଯିବ। ଯାହା ନିବେଶକମାନଙ୍କୁ ନିରନ୍ତର ବ୍ୟବସାୟ ଅଭିବୃଦ୍ଧି ତଥା ଲୋକଙ୍କ ସାମାଜିକ ଅର୍ଥନୈତିକ ବିକାଶ ପାଇଁ ସୁଯୋଗ ପ୍ରଦାନ କରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଖୋର୍ଦ୍ଧାରେ ବିଶ୍ୱସ୍ତରୀୟ ଖାଦ୍ୟ ପ୍ରକ୍ରିୟାକରଣ ସୁବିଧା ଉପଲବ୍ଧ କରାଇବା କ୍ଷେତ୍ରରେ ଆଇଟିସିର ନିବେଶ ରାଜ୍ୟର ଉପତ୍ାଦନ କ୍ଷେତ୍ରକୁ ମୂଲ୍ୟଯୁକ୍ତ ସୁବିଧା ଯୋଗାଇବା ସହ କୃଷି ଉପତ୍ାଦର ମୂଲ୍ୟ ବଢ଼ିବ। ପରିବେଶ ସନ୍ତୁଳନ ଲାଗି ଗୁରୁତ୍ୱ ଦିଆଯାଇଛି। ନୂତନ ଅତ୍ୟାଧୁନିକ କାରଖାନା ଏକ ମେଗାଓ୍ବାଟ ସବୁଜ ଶକ୍ତି ଦ୍ୱାରା ଚାଳିତ ହେବ। ବୈଜ୍ଞାନିକ ଭାବରେ ପରିକଳ୍ପିତ ରେନ ୱାଟର ହାର୍ଭେଷ୍ଟିଙ୍ଗ ବ୍ୟବସ୍ଥା କରାଯାଇଛି। ଭବିଷ୍ୟତ ପ୍ରସ୍ତୁତ ୟୁନିଟ ଅତ୍ୟାଧୁନିକ ଯନ୍ତ୍ରପାତି, ଡିଜିଟାଲ ଭିତ୍ତିଭୂମି ସହିତ ଚାଳିତ ହେବ। ଏଠାରେ ୫୫% ମହିଳା ନିୟୋଜିତ ହେବେ। ନିକଟରେ ଓଡ଼ିଶାରେ ବିଶ୍ୱସ୍ତରରେ ଏଗ୍ରୋ ଫରେଷ୍ଟି ଇନିସିଏଟିଭକୁ ବିସ୍ତାର କରିଛି। ୬ହଜାରରୁ ଊର୍ଦ୍ଧ୍ୱ ଜମିରେ କ୍ଷେତ ଫସଲ ସହିତ ବୃକ୍ଷରୋପଣ ମାଧ୍ୟମରେ କ୍ଷୁଦ୍ର ଚାଷୀଙ୍କ ପାଇଁ ଅତିରିକ୍ତ ଜୀବିକା ନିର୍ବାହର ଲକ୍ଷ୍ୟ ରହିଛି। ରାଜ୍ୟର ପର୍ଯ୍ୟଟନ କ୍ଷେତ୍ରରେ ଆଇଟିସିର ଏକ ପ୍ରମୁଖ ଯୋଗଦାନ ରହିଛି। ଆଇଟିସିର ଏଫ୍ଏମ୍ସିଜି ଉପତ୍ାଦ ଗୁଡିକ ଓଡ଼ିଶାର ୨.୫ ଲକ୍ଷରୁ ଅଧିକ ଖୁଚୁରା ଆଉଟଲେଟରେ ଉପଲବ୍ଧ। ୧୦ଲକ୍ଷରୁ ଊର୍ଦ୍ଧ୍ୱ ଲୋକଙ୍କ ଜୀବିକା ନିର୍ବାହ ଏହା ଦ୍ୱାରା ସମ୍ଭବ ହୋଇପାରିଛି। ରପତ୍ାନି ପାଇଁ ରାଜ୍ୟରୁ ମକା, ଚାଉଳ ଏବଂ ଚିଙ୍ଗୁଡି ଯୋଗାଣ ପାଇଁ ଆଇଟିସିର ଏଗ୍ରି- ବିଜିନେସ ଓଡ଼ିଶାର କୃଷକଙ୍କ ସହ ଘନିଷ୍ଠ ଭାବରେ କାର୍ଯ୍ୟ କରୁଛି। ଜଳବାୟୁ ପରିବର୍ତ୍ତନ ବିପଦରୁ ରାଜ୍ୟର କୃଷକଙ୍କ ସ୍ଥିରତା ଆଣିବାରେ ପ୍ରୟାସ କରୁଛି। ନୀତି ଆୟୋଗ ସହିତ ସହଭାଗିତାରେ କମ୍ପାନୀ ୧ଲକ୍ଷରୁ ଊର୍ଦ୍ଧ୍ୱ ଚାଷୀଙ୍କୁ ସ୍ଥାୟୀ କୃଷି ଅଭ୍ୟାସରେ ତାଲିମ ଦେଇଛି। ଗ୍ରାମାଞ୍ଚଳରେ ଜଳ ନିରାପତ୍ତାକୁ ଦୃଷ୍ଟିରେ ରଖି ଆଇଟିସି ଓଡ଼ିଶାରେ ୭୯ଶହ ଏକର ପରିମିତ ଅଞ୍ଚଳରେ ଜଳସେଚନ ବିକାଶ କାର୍ଯ୍ୟକ୍ରମ କାର୍ଯ୍ୟକାରୀ କରୁଛି। ଏକ ଦଶନ୍ଧି ଧରି ଓଡ଼ିଶା ଗ୍ରାମୀଣ ବିକାଶ ଏବଂ ମାର୍କେଟିଂ ସୋସାଇଟି ସହ ସହଭାଗିତାରେ ଧୂପବତୀ ଉପତ୍ାଦନରେ ନିୟୋଜିତ ଗ୍ରାମୀଣ ମହିଳାଙ୍କ ଜୀବିକା ଯୋଗାଇବା ପାଇଁ କାର୍ଯ୍ୟ କରୁଛି। ଏହି କାର୍ଯ୍ୟକ୍ରମରେ ରାଜ୍ୟରେ ୨୨ହଜାରତ୍ରୁ ଅଧିକ ହିତାଧିକାରୀ ଅନ୍ତର୍ଭୁକ୍ତ ରହିଛନ୍ତି। ଏଥିସହିତ ପରିବେଶ ଦୀର୍ଘସ୍ଥାୟୀ କାର୍ଯ୍ୟକ୍ରମ ଅନ୍ତର୍ଗତ ଶ୍ରୀମନ୍ଦିର କାର୍ଯ୍ୟାଳୟ ସହିତ ମିଳିତ ଭାବରେ ପୁରୀ ଶ୍ରୀଜଗନ୍ନାଥ ମନ୍ଦିର ପରିସରରେ ୩ଟି କମ୍ପୋଷ୍ଟର ମେଶିନ ସ୍ଥାପନ କରିଛି। ମହିଳା ସଶକ୍ତୀକରଣ, ଦକ୍ଷତା, ପ୍ରାଥମିକ ଶିକ୍ଷା, ପରିମଳ ଏବଂ କଠିନ ବର୍ଜ୍ୟବସ୍ତୁ ପରିଚାଳନା ସମେତ ଆଇଟିସି ରାଜ୍ୟରେ ଏହାର ସିଲଏସଆର ପଦକ୍ଷେପକୁ ବୃଦ୍ଧି କରିଛି। ଅନ୍ୟମାନଙ୍କ ମଧ୍ୟରେ ୫-ଟି ସଚିବ ଭି.କେ. ପାଣ୍ଡିଆନ, ଖୋର୍ଦ୍ଧା ବିଧାୟକ ଜ୍ୟୋତିରୀନ୍ଦ୍ର ନାଥ ମିତ୍ର, ଜଟଣୀ ବିଧାୟକ ସୁରେଶ କୁମାର ରାଉତରାୟ ପ୍ରମୁଖ ଉପସ୍ଥିତ ଥିଲେ।
