ଭୁବନେଶ୍ୱର,୪।୧୨(ବ୍ୟୁରୋ): ଭାରତୀୟ ପାଣିପାଗ ବିଭାଗ (ଆଇଏମ୍ଡି)ର ଆକଳନ ଅନୁସାରେ ଦକ୍ଷିଣ ଆଣ୍ଡାମାନ ସମୁଦ୍ରରେ ସୃଷ୍ଟ ଲଘୁଚାପ ବାତ୍ୟା ‘ଜଓ୍ବାଦ’ର ରୂପନେଇ ଓଡ଼ିଶା ଉପକୂଳ ଆଡକୁ ମାଡ଼ି ଆସୁଛି। ଏହା ପୁରୀଠାରେ ସ୍ଥଳଭାଗକୁ ଛୁଇଁବ ଓ ଏଥିରେ ଭୁବନେଶ୍ୱର ବି ପ୍ରଭାବିତ ହେବା ସମ୍ଭାବନା ରହିଛି। ବାତ୍ୟାକୁ ଦୃଷ୍ଟିରେ ରଖି ଶୁକ୍ରବାର ବିଧାନସଭା ସମ୍ମୁଖ ଲୋୟର ପିଏମ୍ଜି ଓ ରାଜଭବନ ସମ୍ମୁଖ ଧାରଣାସ୍ଥଳରେ ପୋଲିସ ପହଞ୍ଚତ୍ ଆନ୍ଦୋଳନକରୀଙ୍କୁ ଉଠିଯିବାକୁ ନିବେଦନ କରିଥିଲା। ଏହାପରେ ଆନ୍ଦୋଳନକାରୀ ଧାରଣାସ୍ଥଳ ଖାଲି କରି ଦେଇଛନ୍ତି। ଏନେଇ ଡିସିପି ଉମାଶଙ୍କର ଦାଶ କହିଛନ୍ତି, ସାମୁଦ୍ରିକ ବାତ୍ୟା ଜୱାଦ୍ ସମୟରେ ଯେକୌଣସି ପ୍ରକାରର ଦୁର୍ଘଟଣାରୁ ବର୍ତ୍ତିବା ଲାଗି ଡାକବାଜିଯନ୍ତ୍ର ଯୋଗେ ଧାରଣା ସ୍ଥଳ ଖାଲି କରିବାକୁ କୁହାଯାଇଥିଲା। ରାତି ସୁଦ୍ଧା ସମସ୍ତ ଆନ୍ଦୋଳନକରୀ ଧାରଣାରୁ ଓହରି ଧାରଣାସ୍ଥଳ ଖାଲି କରିଛନ୍ତି। ବାତ୍ୟା ସମୟରେ ଘରେ ରହି ଆବଶ୍ୟକ ସୁରକ୍ଷା ପଦକ୍ଷେପ ପାଳନ କରିବାକୁ ସେ ଜନସାଧାରଣଙ୍କୁ ନିବେଦନ କରିଛନ୍ତି। ଅପରପକ୍ଷେ, ଆନ୍ଦୋଳନରତ ମହାବିଦ୍ୟାଳୟ ଶିକ୍ଷକ ଏବଂ ଅଣଶିକ୍ଷକ (+୨ଓ +୩) କର୍ମଚାରୀ ସଂଘ ପକ୍ଷରୁ ଯୁଗ୍ମ ସମ୍ପାଦକ କମଳାକାନ୍ତ ଲେଙ୍କା କହିଛନ୍ତି, ବାତ୍ୟାକୁ ଦୃଷ୍ଟିରେ ରଖି ଆନ୍ଦୋଳନରୁ ଉଠିଯାଉଛୁ। ସ୍ଥିତି ସାମାନ୍ୟ ହେଲେ ଆନ୍ଦୋଳନକୁ ଫେରିବୁ। ଦାବି ପୂରଣ ନ ହେବା ପର୍ଯ୍ୟନ୍ତ ଆନ୍ଦୋଳନ ଚାଲିବ ବୋଲି ସେ କହିଛନ୍ତି।
