ଭୁବନେଶ୍ୱର,୫।୯(ବ୍ୟୁରୋ):ସାମ୍ପ୍ରତିକ ସମୟରେ ବିଶ୍ୱ ଅନେକ ପରିବେଶ ସମ୍ବନ୍ଧୀୟ ଆହ୍ବାନର ସମ୍ମୁଖୀନ ହେଉଛି। ଏହା କେବଳ ମାନବ ଜାତି ପାଇଁ ନୁହେଁ, ବରଂ ସମଗ୍ର ଜୀବଜଗତର ଅସ୍ତିତ୍ୱ ପ୍ରତି ବିପଦ ସୃଷ୍ଟି କରୁଛି। ଏଥିପାଇଁ କେବଳ ମନୁଷ୍ୟ ହିଁ ଦାୟୀ। ନିଜର ସ୍ବାର୍ଥ ସାଧନ ପାଇଁ ସେ ପ୍ରକୃତିକୁ ନଷ୍ଟ କରିଚାଲିଛି। ତେଣୁ ଯୁବପିଢିଙ୍କୁ ଏବେଠାରୁ ପରିବେଶ ଶିକ୍ଷା ପ୍ରଦାନ କରାଯିବା ଆବଶ୍ୟକ। ଏଥିପାଇଁ କେନ୍ଦ୍ର ସରକାର କାର୍ଯ୍ୟକାରୀ କରିଥିବା ଦେଶର ନୂତନ ଶିକ୍ଷା ନୀତିର ପାଠ୍ୟକ୍ରମରେ ପରିବେଶ ସମ୍ବନ୍ଧୀୟ ବିଷୟ ଅନ୍ତର୍ଭୁକ୍ତ କରାଯିବା ଆବଶ୍ୟକ। ଓଡ଼ିଶା ପରିବେଶ ସମିତି ପକ୍ଷରୁ ‘ନୂତନ ଶିକ୍ଷା ନୀତିରେ ପରିବେଶ ଶିକ୍ଷା ଉପରେ ଗୁରୁତ୍ୱ ପ୍ରଦାନ’ ଶୀର୍ଷକ ବିଷୟବସ୍ତୁ ଉପରେ ଆୟୋଜିତ ଏକ ୱେବିନାରରେ ବିଶେଷଜ୍ଞମାନେ ଏହି ମତ ଦେଇଛନ୍ତି।
କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଫକିର ମୋହନ ବିଶ୍ୱବିଦ୍ୟାଳୟର ପୂର୍ବତନ କୁଳପତି ତଥା ବିଶ୍ୱଭାରତୀ ବିଶ୍ୱବିଦ୍ୟାଳୟର ଜୀବ ପ୍ରଯୁକ୍ତିବିଦ୍ୟାର ପୂର୍ବତନ ପ୍ରଫେସର ଡ଼. ଶିବ ପ୍ରସାଦ ଆଧିକାରୀ ଯୋଗଦେଇଥିଲେ। ସମୟ କ୍ରମେ ବିଶ୍ୱର ପରିବେଶ ଦୃଶ୍ୟପଟ୍ଟ କିପରି ପରିବର୍ତ୍ତିତ ହୋଇଚାଲିଛି ଏବଂ ଏହାର ଗୁଣବତ୍ତା ଉପରେ କ୍ଷତିକାରକ ପ୍ରଭାବ ବିସ୍ତାର ହେଉଛି ତାହା ଉପରେ ବର୍ଣ୍ଣନା କରିଥିଲେ। ନିମ୍ନ ଶ୍ରେଣୀର ପିଲାଙ୍କ ଠାରୁ ଆରମ୍ଭ କରି ବୈଷୟିକ ବିଶ୍ୱବିଦ୍ୟାଳୟର ଛାତ୍ରୀଛାତ୍ରମାନଙ୍କୁ ଏ ନେଇ ଉପଯୁକ୍ତ ଶିକ୍ଷା ପ୍ରଦାନର ଆବଶ୍ୟକତା ରହିଛି ବୋଲି ସେ ମତ ଦେଇଥିଲେ। ସମିତିର ସଭାପତି ଡ. ସୁନ୍ଦର ନାରାୟଣ ପାତ୍ର ସଭାପତିତ୍ୱ କରି କହିଲେ, ପରିବେଶ ଶିକ୍ଷାକୁ ନେଇ ସଚେତନତା କାର୍ଯ୍ୟକ୍ରମ, ସଭାସମିତି, ଖବରକାଗଜ ଓ ଟିଭିରେ ବିଭିନ୍ନ ବାର୍ତ୍ତା ମାଧ୍ୟମରେ ସମସ୍ତଙ୍କୁ ପ୍ରଦାନ କରାଯିବା ବାଞ୍ଛନୀୟ। ସ୍ବାଗତ ଭାଷଣ ପ୍ରଦାନ କରି ସମ୍ପାଦକ ଡ଼. ଜୟକୃଷ୍ଣ ପାଣିଗ୍ରାହୀ ବିଶ୍ୱ ପରିବେଶ କିପରି ଘୋର ଆହ୍ବାନର ସମ୍ମୁଖୀନ ହେଉଛି ତଥା ସମଗ୍ର ପୃଥିବୀରେ ଗ୍ରୀଷ୍ମ ପ୍ରବାହ, ପ୍ରବଳ ବର୍ଷା, ବନ୍ୟାର ପ୍ଲାବନ, ଭୂସ୍ଖଳନ ଏବଂ ଜଙ୍ଗଲ ଅଗ୍ନିକାଣ୍ଡ ପରି ପ୍ରାକୃତିକ ବିପର୍ଯ୍ୟୟ ବୃଦ୍ଧିପାଉଛି ତାହା ବର୍ଣ୍ଣନା କରିଥିଲେ। ଅନ୍ୟମାନଙ୍କ ମଧ୍ୟରେ ବନ୍ୟପ୍ରାଣୀ ବିଶେଷଜ୍ଞ ଡ଼. ଲାଲା ଏକେ ସିଂହ, ପୂର୍ବତନ ପିସିସିଏଫ ଡ଼. ବିଜୟ କେତନ ପଟ୍ଟନାୟକ, ଇଂ ମୁକ୍ତିପଦ ପଣ୍ଡା, ଡ. ସୁଧାକର କର, ଇଂ ବିପିନ ପଣ୍ଡା ପ୍ରମୁଖ ଯୋଗଦେଇ ବିଭିନ୍ନ ଦିଗ ଉପରେ ଆଲୋକପାତ କରିଥିଲେ।
