ନୂଆଦିଲ୍ଲୀ,୨।୭: କରୋନା କଟକଣା ପାଇଁ ଏଟିଏମ୍ରେ ନିର୍ଦ୍ଧାରିତ ଥରରୁ ଅଧିକ ଥର ଉଠାଣ ଉପରେ କୌଣସି ନେଣଦେଣ ଚାର୍ଜ ଲାଗୁ ହେଉ ନ ଥିଲା। ସରକାର ଏଟିଏମ୍ ଉଠାଣ ଉପରେ କେତେକ କୋହଳ ବ୍ୟବସ୍ଥା କରିଥିଲେ। ସେହିଭଳି ବ୍ୟାଙ୍କ ଖାତାରେ ନୂ୍ୟନତମ ବାଲାନ୍ସ ରଖିବା କଟକଣା ମଧ୍ୟ ଏହି ସମୟରେ କୋହଳ କରାଯାଇଥିଲା। ଏହି ସବୁ ନିୟମର ଅବଧି ଜୁନ ୩୦ରେ ଶେଷ ହୋଇଛି। ଜୁଲାଇ ପହିଲାରେ ବିଭିନ୍ନ ନିୟମ ପୂର୍ବବତ୍ ଲାଗୁ ହେବ ବୋଲି ଜଣାପଡିଛି। ଯଦି ସରକାର ଉକ୍ତ ଅବଧିକୁ ନ ବଢ଼ାନ୍ତି ତେବେ ଲୋକଙ୍କୁ କୋହଳ ସୁବିଧା ଆଉ ମିଳିବ ନାହିଁ। ହେଲେ ସରକାର ସେଭଳି କୌଣସି ଘୋଷଣା ବର୍ତ୍ତମାନ ପର୍ଯ୍ୟନ୍ତ କରି ନାହାନ୍ତି। କରୋନା ମାମଲା ବଢୁଥିବାରୁ ନିୟମ କୋହଳ ହେଲେ ଲୋକମାନେ ଏହାର ସୁବିଧା ଲାଭ କରନ୍ତେ ବୋଲି ବିଶେଷଜ୍ଞ ମତପ୍ରକାଶ କରିଛନ୍ତି।
ସୂଚନାଯୋଗ୍ୟ, ଲକ୍ଡାଉନ ଘୋଷଣା ସମୟରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ ଏଭଳି ନିୟମ ସବୁ ଉପରେ କୋହଳ ନେଇ ଘୋଷଣା କରିଥିଲେ। ଲୋକମାନେ ଯେଭଳି କୌଣସି ହଇରାଣ ନ ହୁଅନ୍ତି ତାକୁ ଧ୍ୟାନରେ ରଖି ଏଭଳି ବ୍ୟବସ୍ଥା କରାଯାଇଥିଲା। ଡିଜିଟାଲ ଟ୍ରାଞ୍ଜାକଶନକୁ ଉତ୍ସାହିତ କରିବା ଲାଗି ସରକାର ୩ ମାସ ଏଟିଏମ୍ ଉଠାଣକୁ ଚାର୍ଜ ମୁକ୍ତ କରିଥିଲେ। ବ୍ୟାଙ୍କ ଖାତାରେ ମଧ୍ୟ ସର୍ବନିମ୍ନ ବାଲାନ୍ସ ନ ରଖିବା ଉପରେ ଜରିମାନା ଦେବାକୁ ପଡୁ ନ ଥିଲା। ପ୍ରକୃତ ନିୟମ ମୁତାବକ ବ୍ୟାଙ୍କଗୁଡିକରେ ସର୍ବନିମ୍ନ ବାଲାନ୍ସ କଟକଣା ଅନ୍ତର୍ଗତ ଗ୍ରାହକଙ୍କୁ ୫ରୁ ୧୦ ହଜାର ଟଙ୍କା ପର୍ଯ୍ୟନ୍ତ ରଖିବାକୁ ପଡୁଛି। ଚାର୍ଜରୁ ବର୍ତ୍ତିବା ଲାଗି ଗ୍ରାହକ ଏହି ବାଲାନ୍ସ ରଖୁଛନ୍ତିି। ଗ୍ରାହକଙ୍କୁ ନିଜ ବ୍ୟାଙ୍କ ଏଟିଏମ୍ରେ ୫ ଥର ଏବଂ ଅନ୍ୟ ବ୍ୟାଙ୍କ ଏଟିଏମ୍ରେ ୩ ଥର ନିଃଶୁଳ୍କ ନେଣଦେଣ ସୁବିଧା ମିଳୁଛି। ଏଟିଏମ୍ରେ ନିର୍ଦ୍ଧାରିତ ନିଃଶୁଳ୍କ ନେଣଦେଣ ସୀମା ପରେ ଗ୍ରାହକଙ୍କୁ ୮ରୁ ୨୦ ଟଙ୍କା ପର୍ଯ୍ୟନ୍ତ ଚାର୍ଜ ଲାଗୁ ହେଉଛି। ଏଟିଏମ୍ ଉଠାଣ ନିୟମ ବିଭିନ୍ନ ବ୍ୟାଙ୍କରେ ଭିନ୍ନ ରହିଛି।
