ରାଫାହ(ଗାଜା ଷ୍ଟ୍ରିପ୍)/ତେଲ୍ ଆଭିଭ୍,୨୩ା୧୦: ଇସ୍ରାଏଲ୍ ଯୁଦ୍ଧବିମାନଗୁଡ଼ିକ ଶନିବାର ରାତିରୁ ଗାଜା ଉପରେ ବୋମାମାଡ଼ ଜାରି ରଖିଥିବାବେଳେ ରବିବାର ସିରିଆର ଦୁଇଟି ବିମାନବନ୍ଦର ଏବଂ ଅଧିକୃତ ଓ୍ବେଷ୍ଟ ବ୍ୟାଙ୍କ୍ର ଏକ ମସ୍ଜିଦ ଉପରେ ଆକ୍ରମଣ କରିଛି। ଫଳରେ ଯୁଦ୍ଧ କେବଳ ଇସ୍ରାଏଲ୍ ଏବଂ ଗାଜା ମଧ୍ୟରେ ସୀମିତ ନ ରହି ଅନ୍ୟ ଦେଶକୁ ବ୍ୟାପିବାର ଆଶଙ୍କା ସୃଷ୍ଟି ହୋଇଛି। ଯୁଦ୍ଧ ଆରମ୍ଭ ହେବା ଦିନଠାରୁ ଇସ୍ରାଏଲ୍ ପ୍ରାୟ ପ୍ରତିଦିନ ଲେବାନନ୍ର ହେଜ୍ବୋଲ୍ଲା ଆତଙ୍କବାଦୀ ଗୋଷ୍ଠୀ ଉପରେ ଆକ୍ରମଣ ଚଳାଇଛି। ଇସ୍ରାଏଲ୍ ଅଧିକୃତ ଓ୍ବେଷ୍ଟ ବ୍ୟାଙ୍କରେ ଉତ୍ତେଜନା ବଢ଼ିବାରେ ଲାଗିଛି। ଇସ୍ରାଏଲ୍ ସୈନ୍ୟ ସେଠାର ଶରଣାର୍ଥୀ ଶିବିରରେ ଆତ୍ମଗୋପନ କରିଥିବା ଆତଙ୍କବାଦୀଙ୍କ ସହ ଲଢ଼େଇ କରିବା ସହ ଦୁଇଥର ଏୟାରଷ୍ଟ୍ରାଇକ୍ କଲେଣି।
ଗାଜାରେ ସ୍ଥଳଯୁଦ୍ଧ ଆରମ୍ଭ କରିବା ଯୋଜନାରେ ଇସ୍ରାଏଲ୍ ରହିଛି। ସେଥିପାଇଁ ସୀମାରେ ହଜାର ହଜାର ଟ୍ୟାଙ୍କ୍ ମହଜୁଦ୍ କରିରଖିଛି। ଉତ୍ତର ଗାଜାରୁ ଲୋକମାନଙ୍କୁ ଅନ୍ୟତ୍ର ପଳାଇଯିବା ଲାଗି ତେଲ୍ ଆଭିଭ୍ ବାରମ୍ବାର କହିବା ସହ ଆକାଶମାର୍ଗରୁ ଲିଫ୍ଲେଟ୍ ପକାଉଛି। ଯଦି ପାଲେଷ୍ଟିନୀୟମାନେ ତୁରନ୍ତ ଉକ୍ତ ଅଞ୍ଚଳରୁ ପଳାଇ ନ ଯାଆନ୍ତି, ତେବେ ସେମାନଙ୍କୁ ଆତଙ୍କବାଦୀଙ୍କ ଭଳି ବ୍ୟବହାର କରାଯିବ ବୋଲି ଇସ୍ରାଏଲ୍ ଚେତାବନୀ ଦେଇଛି। ବର୍ତ୍ତମାନ ସୁଦ୍ଧା ଉକ୍ତ ଅଞ୍ଚଳରୁ ୭ ଲକ୍ଷ ଲୋକ ପଳାଇଗଲେଣି। ତଥାପି ଆହୁରି କେତେ ଲକ୍ଷ ଲୋକ ରହିଯାଇଛନ୍ତି। ସ୍ଥଳଯୁଦ୍ଧ ଆରମ୍ଭ ହେଲେ ବହୁସଂଖ୍ୟାରେ ସାଧାରଣ ଲୋକ ମୃତାହତ ହେବା ଆଶଙ୍କା ରହିଛି। ଗାଜା ସିଟିରେ ହମାସ୍ର ଭିତ୍ତିଭୂମି ଏବଂ ଭୂତଳ ଟନେଲ୍ ବ୍ୟବସ୍ଥା ରହିଛି। ପରବର୍ତ୍ତୀ ଆକ୍ରମଣକୁ ଜୋର୍ଦାର କରାଯିବ ବୋଲି ଇସ୍ରାଏଲୀ ସେନାର ଜଣେ ଅଧିକାରୀ କହିଛନ୍ତି। ହମାସ୍କୁ ସମ୍ପୂର୍ଣ୍ଣ ମୂଳପୋଛ କରିଦେବାକୁ ଇସ୍ରାଏଲ୍ ଚାହେଁ। ସାଧାରଣ ଲୋକେ ଯେପରି ସୀମାରେ ପହଞ୍ଚତ୍ପାରିବେ ସେଥିପାଇଁ ଏକ ସମ୍ଭାବ୍ୟ ବଫର ଜୋନ୍ ସୃଷ୍ଟି କରିବା ଲାଗି ଏହାର ଅଧିକାରୀମାନେ କହିଛନ୍ତି।
ଇନ୍କ୍ୟୁବେଟରରେ ଥିବା ୧୨୦ ଶିଶୁ ବିପଦରେ
ଇସ୍ରାଏଲ୍ର ବିମାନ ଆକ୍ରମଣରେ ଗାଜା ଷ୍ଟ୍ରିପ୍ର ୧,୭୫୦ରୁ ଅଧିକ ପିଲାଙ୍କ ମୃତ୍ୟୁ ଘଟିଲାଣି। ଗାଜା ହସ୍ପିଟାଲଗୁଡ଼ିକୁ ଇନ୍ଧନ ଯୋଗାଣ ବନ୍ଦ ହୋଇଯାଇଥିବାରୁ ଇନ୍କ୍ୟୁବେଟରରେ ଥିବା ଅନୂ୍ୟନ ୧୨୦ ନବଜାତ ଶିଶୁଙ୍କ ଜୀବନ ପ୍ରତି ବିପଦ ଦେଖାଦେଇଛି। ହସ୍ପିଟାଲଗୁଡ଼ିକରେ ଇନ୍ଧନ ସମେତ ଔଷଧ, ପାଣିର ଘୋର ଅଭାବ ଦେଖାଦେଇଛି। ଫଳରେ ରୋଗୀ ସେବା ବାଧାପ୍ରାପ୍ତ ହେବା ସହ ଆକ୍ରମଣରେ ଆହତ ହୋଇଥିବା ଲୋକଙ୍କୁ ଚିକିତ୍ସା କରାଯାଇ ପାରୁନାହିଁ।
