ତେହେରାନ,୬।୩ : ଇରାନରେ ୯୦୦ ରୁ ଅଧିକ ସ୍କୁଲ ଛାତ୍ରୀଙ୍କୁ ଜହର ଦେବା ମାମଲା ଦିନକୁ ଦିନ ଜଟିଳ ହେବାରେ ଲାଗିଛି। ବାସ୍ତବରେ ଏହା ପୂର୍ବରୁ କୁହାଯାଇଥିଲା ଯେ ସ୍କୁଲ ଛାତ୍ରୀମାନଙ୍କ ଜହର ଦେବା ପଛରେ ଇସଲାମିକ ମୌଳବାଦୀମାନେ ଅଛନ୍ତି ଏବଂ ସେମାନେ ଚାହୁଁ ନାହାଁନ୍ତି ଯେ ଝିଅମାନେ ବିଦ୍ୟାଳୟକୁ ଯାଆନ୍ତୁ । ସେଥିପାଇଁ ସେମାନେ ସେମାନଙ୍କୁ ରୋକିବା ପାଇଁ ଜହର ଦେଇଥିଲେ।
ନଭେମ୍ବର ୩୦ ରେ ଇରାନର କୋମ ସହରରେ ସ୍କୁଲ ଛାତ୍ରୀଙ୍କୁ ଜହର ଦେବାର ପ୍ରଥମ ମାମଲା ରିପୋର୍ଟ ହୋଇଥିଲା। ଯେଉଁଥିରେ ପ୍ରାୟ ୫୦ଜଣ ଛାତ୍ରୀ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି ହୋଇଥିଲେ। ତେବେ କିଛି ଦିନ ପରେ ଛାତ୍ରୀମାନଙ୍କୁ ଡାକ୍ତରଖାନାରୁ ଘରକୁ ପଠାଯାଇଥିଲା। ତେବେ ଜଣେ ଛାତ୍ରୀଙ୍କ ମୃତ୍ୟୁ ହୋଇଥିବା ଖବର ମଧ୍ୟ ଆସିଥିଲା।
ଇରାନର ଗଣମାଧ୍ୟମ ଅନୁଯାୟୀ ଦେଶର ଆଠଟି ପ୍ରଦେଶର ୫୮ ଟି ବିଦ୍ୟାଳୟରେ ଛାତ୍ରୀଙ୍କ ଜହର ଦିଆଯାଇଥିବା ଜଣାପଡ଼ିଛି। ଅନ୍ତର୍ଜାତୀୟ ଗଣମାଧ୍ୟମ ଅନୁଯାୟୀ, ଇରାନର ୧୦ ଟି ପ୍ରଦେଶର ୩୦ଟି ବିଦ୍ୟାଳୟରେ ସ୍କୁଲ ଛାତ୍ରୀଙ୍କୁ ଜହର ଦିଆଯାଇଥିଲା। ଇରାନ ସରକାର ପ୍ରଥମେ ଏହାକୁ ଅସ୍ବୀକାର କରିଥିଲେ କିନ୍ତୁ ପରେ ସ୍ବୀକାର କରିଥିଲେ।
ନିକଟରେ ଜେନେଭାରେ ମିଳିତ ଜାତିସଂଘର ମାନବାଧିକାର ବୈଠକରେ ଇରାନର ଏହି ପ୍ରସଙ୍ଗ ଉଠାଯାଇଥିଲା। ଅନେକ ଦେଶ ଏହାକୁ ନେଇ ଉଦବେଗ ପ୍ରକାଶ କରିଥିଲେ। ଇରାନର ଉପ ଶିକ୍ଷା ମନ୍ତ୍ରୀ ଏହା ମଧ୍ୟ ସ୍ବୀକାର କରଥିଲେ ଯେ ଝିଅମାନଙ୍କୁ ସ୍କୁଲ ଯିବାକୁ ରୋକିବା ପାଇଁ କିଛି ଲୋକ ଏପରି କରିଛନ୍ତି। ତେବେ ପରେ ସେ ତାଙ୍କ ବିବୃତ୍ତିକୁ ପ୍ରତ୍ୟାହାର କରି ନେଇଥିଲେ।
ଇରାନର ରାଷ୍ଟ୍ରପତି ଇବ୍ରାହିମ ରାଇସି ଦାବି କରିଛନ୍ତି ଯେ ଲୋକଙ୍କ ମଧ୍ୟରେ ଭୟ ଏବଂ ଅସୁରକ୍ଷିତ ବାତାବରଣ ସୃଷ୍ଟି କରିବା ପାଇଁ ଏହା ଇରାନର ଶତ୍ରୁ ଦେଶମାନଙ୍କର କାମ। ବର୍ତ୍ତମାନ ଘଟଣାର ତଦନ୍ତ ପାଇଁ ଇରାନର ଆଭ୍ୟନ୍ତରୀଣ ବ୍ୟାପାର ମନ୍ତ୍ରୀଙ୍କୁ ନିର୍ଦ୍ଦେଶ ଦିଆଯାଇଛି। ଅନ୍ୟପକ୍ଷରେ, ଇରାନର ଜଣେ ବରିଷ୍ଠ ଧର୍ମଗୁରୁ କହିଛନ୍ତି ଯେ ସରକାରଙ୍କ ବିବୃତ୍ତି ଲୋକଙ୍କ ମଧ୍ୟରେ ସରକାରଙ୍କ ପ୍ରତି ବିଶ୍ୱସନୀୟତାକୁ ନଷ୍ଟ କରୁଛି। ଏହା ଲୋକଙ୍କ ମଧ୍ୟରେ ଦ୍ୱନ୍ଦ୍ୱ ସୃଷ୍ଟି କରିଛି।
