ଦୁବାଇ,୨୫।୮: ୨୦୨୦ରେ ୟୁଏଇରେ ମୁମ୍ବାଇ ଇଣ୍ଡିଆନ୍ସ ପଞ୍ଚମ ଥର ପାଇଁ ଆଇପିଏଲ୍ ଚାମ୍ପିୟନ ହୋଇଥିଲା। ଚଳିତ ୨୦୨୧ ସିଜିନର ପ୍ରଥମ ପର୍ଯ୍ୟାୟ ମ୍ୟାଚ୍ ଭାରତରେ ଖେଳାଯାଇଥିବା ବେଳେ ଦ୍ୱିତୀୟ ପର୍ଯ୍ୟାୟ ପୁନର୍ବାର ୟୁଏଇରେ ଖେଳାଯିବ। ମୁମ୍ବାଇ ଏବଂ ଚେନ୍ନାଇର ଖେଳାଳିମାନେ ୟୁଏଇରେ ପହଞ୍ଚି ଅଭ୍ୟାସ ଆରମ୍ଭ କରିଛନ୍ତି। ଚଳିତ ସିଜିନ୍ରେ ମୁମ୍ବାଇ ଚତୁର୍ଥ ସ୍ଥାନରେ ରହିଛି। ସବୁଥର ପରି ଏଥର ମଧ୍ୟ ପ୍ରଶଂସକଙ୍କ ଆଖି ମୁମ୍ବାଇକୁ ଚାମ୍ପିୟନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିବା ଖେଳାଳିଙ୍କ ଉପରେ ରହିଛି। ସେହି ଖେଳାଳିଙ୍କ ମଧ୍ୟରୁ ଜଣେ ହେଲେ ଯୁବ ଉଇକେଟ କିପର ତଥା ବ୍ୟାଟ୍ସମ୍ୟାନ ଈଶାନ କିଶନ। ଆଇପିଏଲ୍ରେ ଚମତ୍କାର ପ୍ରଦର୍ଶନ ପାଇଁ ତାଙ୍କୁ ଭାରତୀୟ ଦଳରେ ସାମିଲ କରାଯାଇଥିଲା।
ଏଯାବତ ଖେଳାଯାଇଥିବା ଆଇପିଏଲ୍-୧୪ର ପ୍ରଥମ ପର୍ଯ୍ୟାୟ ମ୍ୟାଚ୍ରେ ଈଶାନ ସେତେଟା ଭଲ ପ୍ରଦର୍ଶନ କରିନାହାନ୍ତି। ସେ ୫ ମ୍ୟାଚ୍ରେ ମାତ୍ର ୭୩ ରନ୍ କରିବାରେ ସକ୍ଷମ ହୋଇଛନ୍ତି। ଏବେ ଆଇପିଏଲ୍ର ଦ୍ୱିତୀୟ ପର୍ଯ୍ୟାୟ ଆରମ୍ଭ ହେବା ପୂର୍ବରୁ ସେ ପ୍ରଶଂସକଙ୍କ ସହ ନିଜ ବ୍ୟାଟ୍ ସହ ଜଡ଼ିତ ଏକ ରହସ୍ୟ ବାଣ୍ଟିଛନ୍ତି। ମୁମ୍ବାଇର ଅଫିସିଆଲ ଓ୍ବେବ୍ସାଇଟ୍ ସହ ଏକ ସାକ୍ଷାତକାରରେ ଈଶାନ କହିଛନ୍ତି, ତାଙ୍କର ସମସ୍ତ ବ୍ୟାଟ୍ ଉପରେ ‘ଓମ୍ ସାଇ ନାଥ’ ମନ୍ତ୍ର ଲେଖାଅଛି। ଏପରି ଲେଖିବା ପଛରେ କାରଣଟି ହେଲା ସେ ସାଇବାବାଙ୍କ ଉପରେ ବିଶ୍ୱାସ କରନ୍ତି। ଏଥିପାଇଁ ବ୍ୟାଟ୍ ପ୍ରସ୍ତୁତ କରୁଥିବା କମ୍ପାନୀମାନଙ୍କୁ ସେ ବ୍ୟାଟ୍ ଉପରେ ଏହି ମନ୍ତ୍ର ଲେଖିବାକୁ କୁହନ୍ତି। ଏହା ତାଙ୍କୁ ଆତ୍ମବିଶ୍ୱାସ ଦେଇଥାଏ ବୋଲି ସେ କହିଛନ୍ତି।
