ନୂଆଦିଲ୍ଲୀ,୨୩।୬: ପଞ୍ଜାବ ଗସ୍ତରେ ଯାଇଥିବା ଭାରତୀୟ ଜନତା ପାର୍ଟି (BJP)ର ରାଷ୍ଟ୍ରୀୟ ଅଧ୍ୟକ୍ଷ ନିତିନ ନବୀନ ହଠାତ ଦିଲ୍ଲୀ ଫେରି ଆସିଛନ୍ତି। ଚଣ୍ଡୀଗରେ ସେ ପଞ୍ଜାବର ରାଜ୍ୟପାଳ ଗୁଲାବ ଚନ୍ଦ କଟାରିଆ ଏବଂ ପଞ୍ଜାବ ପ୍ରଦେଶ ଅଧ୍ୟକ୍ଷ କେବଳ ସିଂହ ଢିଲ୍ଲୋଙ୍କୁ ଭେଟିବାର ଥିଲା ଏବଂ ମଙ୍ଗଳବାର ସେ ଦିଲ୍ଲୀ ଗସ୍ତ କରିବାର କାର୍ଯ୍ୟକ୍ରମ ଥିଲା। ମାତ୍ର ଗତକାଲି ସଞ୍ଜ ଆରମ୍ଭରେ ହିଁ ସେ ଦିଲ୍ଲୀ ଫେରି ଆସିଛନ୍ତି।
ପଞ୍ଜାବରେ ହୋଇଥିବା ଭାଜପାର ବୈଠକରେ ଭାଗ ନେବା ପାଇଁ ରାଘବ ଚଢା ମଧ୍ୟ ତାଙ୍କ ସହ ଯାଇଥିଲେ, କିନ୍ତୁ ସେ ମଧ୍ୟ ତାଙ୍କ ସହିତ ଦିଲ୍ଲୀ ଫେରି ଆସିଛନ୍ତି। ଅନ୍ୟପଟେ, ଭାଜପା ମହାସଚିବ ତରୁଣ ଚୁଘ ଏବଂ ରାଜ୍ୟ ସଭା ଏମପି ବିକ୍ରମଜିତ ସିଂହ ସାହନୀ ମଧ୍ୟ ଉଭୟଙ୍କ ସହ ଦିଲ୍ଲୀ ଆସିଛନ୍ତି। ଚାରିଜଣ ଯାକ ଲୁଧିଆନାର ହଲୱାରା ବିମାନବନ୍ଦରରୁ ଦିଲ୍ଲୀ ଅଭିମୁଖେ ଉଡ଼ାଣ ଭରିଥିଲେ।
କେନ୍ଦ୍ରୀୟ କ୍ୟାବିନେଟ ଅଦଳବଦଳ ନେଇ ଚାଲିଥିବା ଚର୍ଚ୍ଚା ଏବଂ କେନ୍ଦ୍ର ରାଷ୍ଟ୍ରମନ୍ତ୍ରୀ ଜର୍ଜ କୁରିଅନଙ୍କ ଇସ୍ତଫା ପରେ, ଆସନ୍ତାକାଲି ସକାଳ ୧୧ଟାରେ କେନ୍ଦ୍ରୀୟ ମନ୍ତ୍ରୀମଣ୍ଡଳର ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହେବ। ଏହି ବୈଠକରେ ବିଭିନ୍ନ ମନ୍ତ୍ରଣାଳୟ ସହ ଜଡ଼ିତ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଏବଂ ନୀତିଗତ ନିଷ୍ପତ୍ତି ଉପରେ ମୋହର ବାଜିପାରେ।
ରାଜନୈତିକ ମହଲରେ ଚର୍ଚ୍ଚା ଚାଲିଛି ଯେ ରାଘବ ଚଢାଙ୍କୁ କେନ୍ଦ୍ରୀୟ କ୍ୟାବିନେଟରେ ସାମିଲ କରାଯାଇପାରେ। ପଞ୍ଜାବ ବିଧାନସଭା ନିର୍ୱାଚନ ୨୦୨୭ ପାଇଁ ତାଙ୍କୁ ଏକ ବଡ଼ ଦାୟିତ୍ୱ ଦିଆଯାଇପାରେ। ସେହିପରି ଚଢାଙ୍କୁ ମଧ୍ୟ କେନ୍ଦ୍ରୀୟ କ୍ୟାବିନେଟ କିମ୍ୱା ଭାଜପା ସଂଗଠନରେ ସ୍ଥାନ ମିଳିପାରେ। ଯଦିଓ ଏପର୍ଯ୍ୟନ୍ତ ଏନେଇ କୌଣସି ଆଧିକାରିକ ସୂଚନା ମିଳିନାହିଁ, କିନ୍ତୁ ଆସନ୍ତାକାଲି ହେବାକୁ ଥିବା କେନ୍ଦ୍ରୀୟ ମନ୍ତ୍ରୀମଣ୍ଡଳ ବୈଠକରେ ଏହା ଉପରେ ନିଷ୍ପତ୍ତି ନିଆଯାଇପାରେ।
ସୂଚନାଯୋଗ୍ୟ ଯେ, ନିକଟରେ ଜୁନ ୯ ତାରିଖରେ ବିଜେପିର ଏକ ହାଇ-ଲେଭଲ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଜାନୁଆରୀ ୨୦୨୬ରେ କାର୍ଯ୍ୟଭାର ଗ୍ରହଣ କରିଥିବା ବିଜେପିର ନୂଆ ରାଷ୍ଟ୍ରୀୟ ଅଧ୍ୟକ୍ଷ ନିତିନ ନବୀନଙ୍କ ନୂଆ ଟିମ ଉପରେ ବିଚାର ବିମର୍ଶ କରାଯାଇଥିଲା, ଯାହାର ଘୋଷଣା ଏହି ମାସ ଶେଷ ସୁଦ୍ଧା ହେବାର ସମ୍ଭାବନା ରହିଛି। ବିଜେପି ନିକଟରେ ପଞ୍ଜାବ, ହରିୟାଣା, ତ୍ରିପୁରା ଏବଂ ଦିଲ୍ଲୀରେ ନୂଆ ପ୍ରଦେଶ ଅଧ୍ୟକ୍ଷ ନିଯୁକ୍ତ କରିଛି। ଏବେ ବିଜେପି ସଂଗଠନ ଏବଂ କେନ୍ଦ୍ରୀୟ ମନ୍ତ୍ରୀମଣ୍ଡଳରେ ପରିବର୍ତ୍ତନ ନେଇ ଚର୍ଚ୍ଚା ଜୋର୍ ଧରିଛି।