ଯୋଡ଼ା,୨୦।୪(ଡି.ଏନ୍.ଏ.): କେନ୍ଦୁଝର ଜିଲା ଯୋଡା ଖଣି ମଣ୍ଡଳରୁ ଝାଡଖଣ୍ଡ ରାଜ୍ୟକୁ ଦୈନିକ ଲୁହାପଥର ଚୋରା ଚାଲାଣ କରାଯାଉଛି। ଗୋଟିଏପଟେ ପ୍ରଶାସନ ପକ୍ଷରୁ ଆନ୍ତଃରାଜ୍ୟ ସୀମା ସିଲ୍, ନାଇଟ୍ କର୍ଫ୍ୟୁ ଜାରି କରାଯାଇ ପୋଲିସ ପଇଁତରା ମାରୁଥିବା ବେଳେ ଅନ୍ୟପଟେ ଚୋରା ଖଣିଜ ବୋଝେଇ ଗାଡି ଅନାୟାସରେ ଚାଲାଣ କରୁଛନ୍ତି। ଏହା କିପରି ସମ୍ଭବ ହେଉଛି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ତେବେ ସୋମବାର ଚୋରା ଚାଲାଣ ବେଳେ ଲୁହାପଥର ବୋଝେଇ ଡମ୍ପରକୁ ଜବତ କରିଛି ବନବିଭାଗ। ବାମେବାରୀ ବନପାଳ ଯତୀନ୍ଦ୍ର କୁମାର ସାହୁଙ୍କ ଠାରୁ ମିଳିଥିବା ସୂଚନା ଅନୁଯାୟୀ, ଭୋର୍ ୩ଟା ବେଳେ ନୟାଗଡ ଗ୍ରାମ୍ୟ ଜଙ୍ଗଲରେ ଗଚ୍ଛିତ ରଖାଯାଇଥିବା ଲୁହା ପଥରକୁ ଏକ ଡମ୍ପର ବୋଝେଇ କରୁଥିଲା। ଖବର ପାଇ ଚମ୍ପୁଆ ରେଞ୍ଜ ଅଧିକାରୀ ସଞ୍ଜୀବ ରାଉତଙ୍କ ସମେତ ସଦଳବଳ ଚଢାଉ କରି ଡମ୍ପରକୁ ଜବତ ସହ ସଂପୃକ୍ତ ୨ ଅଭିଯୁକ୍ତଙ୍କୁ ଗିରଫ କରିଛନ୍ତି। ସେମାନେ ହେଲେ ଉଚ୍ଚବାଲି ଅଞ୍ଚଳର ଡମ୍ପର ମାଲିକ ମହେଶ୍ୱର ବାରିକ, ଡ୍ରାଇଭର ଉମାଶଙ୍କର ମହାକୁଡ। ଡମ୍ପରରେ ପ୍ରାୟ ୧୦ ମେଟ୍ରିକ ଟନ୍ ଉନ୍ନତମାନର ଲୁହା ପଥର ବୋଝେଇ ହୋଇଥିଲା।
