ତେହରାନ୍ ୯ା୩: ଆମେରିକା ଏବଂ ଇସ୍ରାଏଲ ଇରାନ ଉପରେ ଆକ୍ରମଣକୁ ପୁଣି ଜୋର୍ଦାର କରିଛନ୍ତି। ରବିବାର ସକାଳେ ତେହରାନ୍ ଏବଂ ଏହାର ଆଖପାଖ ଅଞ୍ଚଳରେ ରହିଥିବା ବହୁ ଗୁରୁତ୍ୱପୂର୍ଣ୍ଣ ତୈଳ ଡିପୋ ଉପରେ ଇସ୍ରାଏଲ ପକ୍ଷରୁ ବୋମାମାଡ଼ କରାଯାଇଛି। ଫଳରେ ଏକାଧିକ ତୈଳ ଡିପୋରେ ନିଆଁ ଲାଗିଯାଇ ସେଗୁଡିକ ଜଳୁଥିବା ବେଳେ ତେହରାନ୍ ଆକାଶ ନିଆଁ ପିଣ୍ଡୁଳାରେ ପରିଣତ ହୋଇଛି। ତୈଳ ଡିପୋଗୁଡିକରେ ନିଆଁ ଲିଭାଇବାକୁ ଉଦ୍ୟମ ଚାଲୁ ରହିଥିଲେ ହେଁ ଏବେ ବି ଅନେକ ଡିପୋରେ ନିଆଁ ଆୟତ୍ତ ହୋଇପାରି ନଥିବା କୁହାଯାଇଛି।
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଶନିବାର ଇରାନକୁ ଚେତାବନୀ ଦେଇ ଆକ୍ରମଣ ଜୋର୍ଦାର କରିବାକୁ କହିଥିଲେ। ଉପସାଗରୀୟ ଅଞ୍ଚଳର ବିଭିନ୍ନ ଦେଶରେ ରହିଥିବା ଆମେରିକୀୟ ସାମରିକ ପ୍ରତିଷ୍ଠାନ ଉପରେ ଇରାନ ଆକ୍ରମଣ ଜାରି ରଖିଥିବାରୁ ଇରାନକୁ ଉଚିତ ଶିକ୍ଷା ଦେବାକୁ ଟ୍ରମ୍ପ୍ ଚେତାବନୀ ଜାରି କରିବା ସହ ଏହାକୁ ନର୍କରେ ପରିଣତ କରିବାକୁ କହିଥିଲେ। ଏହି କ୍ରମରେ ରବିବାର ସକାଳୁ ଇସ୍ରାଏଲ ଏବଂ ଆମେରିକା ପକ୍ଷରୁ ତେହରାନ ସମେତ ଏହାର ଆଖପାଖ ଅଞ୍ଚଳରେ ଆକ୍ରମଣ ଜୋର୍ଦାର କରାଯାଇଛି। ଏହି ଘଟଣାରେ ୨ ଜଣ ଟ୍ୟାଙ୍କର ଡ୍ରାଇଭରଙ୍କ ସମେତ ୪ ଜଣଙ୍କ ମୃତ୍ୟୁ ହୋଇଛି। ତେହରାନ୍ ଆକାଶରେ ନିଆଁ ପିଣ୍ଡୁଳା ଭର୍ତ୍ତି ହୋଇଯାଇଥିବା ବେଳେ ପ୍ରବଳ ଧୂଆଁ ସାରା ସହରକୁ ଆଛାଦିତ କରିଦେଇଛି। ବହୁ ପେଟ୍ରୋଲିୟମ ଡିପୋ ଏବଂ ପରିବହନ କେନ୍ଦ୍ରଗୁଡିକରେ ନିଆଁ ଲାଗିଯାଇଥିବାରୁ ପେଟ୍ରୋଲିୟମ ଯୋଗାଣ ବନ୍ଦ ହୋଇଯାଇଛି।
