ଅହମଦାବାଦ,୮।୩: ଅହମଦାବାଦରେ ବିଶ୍ୱର ସବୁଠାରୁ ବଡ଼ କ୍ରିକେଟ ଷ୍ଟାଡିୟମରେ ଲକ୍ଷାଧିକ ଦର୍ଶକଙ୍କ ସମ୍ମୁଖରେ ଇତିହାସ ରଚିଛି ଭାରତ। ଏକାଧିକ ରେକର୍ଡ ସହ ବିଶ୍ୱର ପ୍ରଥମ ଦଳ ଭାବେ କ୍ରମାଗତ ଟି୨୦ କ୍ରିକେଟ ବିଶ୍ୱକପ ଟାଇଟଲ ହାସଲ କରିଛି ଭାରତୀୟ ଦଳ। ପୂର୍ବରୁ ୨୦୦୭ ଓ ୨୦୨୪ରେ ଭାରତ ଚାମ୍ପିୟନ ହୋଇଥିଲା।
ରବିବାର ଅନୁଷ୍ଠିତ ଫାଇନାଲରେ ନ୍ୟୁଜିଲାଣ୍ଡକୁ ୯୬ ରନରେ ହରାଇ ଐତିହାସିକ ସଫଳତା ଲାଭ କରିଛି ଭାରତ। ସଞ୍ଜୁ ସାମସନ, ଅଭିଷେକ ଶର୍ମା ଓ ଇଶାନ କିଶନଙ୍କ ବିସ୍ଫୋରକ ଅର୍ଦ୍ଧଶତକ ବଳରେ ଭାରତ ୨୦ ଓଭରରେ ୫ ଉଇକେଟ ହରାଇ ୨୫୫ ରନ କରିଥିଲା। କୌଣସି ଟି୨୦ ବିଶ୍ୱକପ ଫାଇନାଲରେ ଏହାଥିଲା ସର୍ବାଧିକ ସ୍କୋର। ୨୫୬ ରନ ବିଜୟ ଲକ୍ଷ୍ୟରେ ପଡ଼ିଆକୁ ଓହ୍ଲାଇଥିବା ନ୍ୟୁଜିଲାଣ୍ଡ ୧୯ ଓଭରରେ ୧୫୯ ରନକରି ଅଲ୍ଆଉଟ ହୋଇ ଯାଇଥିଲା। ଫଳରେ ୨୦୨୧ ସଂସ୍କରଣ ପରି ଏଥର ମଧ୍ୟ ଏହି ବ୍ଲାକ୍କ୍ୟାପ ଦଳ ରନରଅପରେ ସନ୍ତୁଷ୍ଟ ହୋଇଛି। ଏଥିସହ ଟି୨୦ ବିଶ୍ୱକପରେ ୩ ଥର ଚାମ୍ପିୟନ ହୋଇଛି।
ଏପରିକ ଗତ ୩ ବର୍ଷ ମଧ୍ୟରେ ଏହା ଭାରତ ପାଇଁ ଚତୁର୍ଥ ଆଇସିସି ଟ୍ରଫି। ଏଥିପୂର୍ବରୁ ଭାରତୀୟ ପୁରୁଷ ଦଳ ୨୦୨୪ରେ ଟି୨୦ ବିଶ୍ୱକପ୍ ଓ ୨୦୨୫ରେ ଆଇସିସି ଚାମ୍ପିୟନ୍ସ ଟ୍ରଫି ଜିତିଥିଲା। ସେହିଭଳି ମହିଳା ଦଳ ୨୦୧୫ରେ ଆଇସିସି ଦିନିକିଆ ବିଶ୍ୱକପ୍ ଜିତିଥିଲା। ମୋଟ ଉପରେ ଭାରତ ଅଷ୍ଟମ ଥର ପାଇଁ ଆଇସିସି ଟ୍ରଫି ଜିତିଛି।
