ଥୁଆମୂଳ ରାମପୁର, ୯ା୩ (ଦୁର୍ଗା କୀର୍ତ୍ତି): ସରକାର ଗରିବଙ୍କୁ ପକ୍କାଘର ଯୋଗାଇବା ପାଇଁ ପ୍ରଧାନମନ୍ତ୍ରୀ ଆବାସ ଓ ଅନ୍ତୋଦୟ ଭଳି ଅନେକ ଯୋଜନା କାର୍ଯ୍ୟକାରୀ କରୁଥିବାବେଳେ କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକରେ ଏହାର ବାସ୍ତବ ଚିତ୍ର ସମ୍ପୂର୍ଣ୍ଣ ଭିନ୍ନ। ପ୍ରଶାସନିକ ଅବହେଳା ଓ ଯୋଜନାର ସଠିକ ରୂପାୟନ ଅଭାବରୁ ଯୋଗ୍ୟ ହିତାଧିକାରୀ ଆଜି ବି ପଲିଥିନ ଟଙ୍ଗା ଭଙ୍ଗା କୁଡ଼ିଆରେ ଜୀବନ ବିତାଉଛନ୍ତି। ଏପରିକି ଜଣେ ଜନପ୍ରତିନିଧି ହୋଇ ମଧ୍ୟ ଆବାସ ସୁବିଧାରୁ ବଞ୍ଚିତ ହେବା ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ସୂଚନା ଅନୁଯାୟୀ, ବ୍ଲକ ସଦର ମହକୁମା କାଳୀ ମନ୍ଦିର ଉପରପଡ଼ାର ବୃଦ୍ଧା ଉଆଁସୀ ମାଝୀ ଜଣେ ଓ୍ବାର୍ଡ ମେମ୍ବର। ହେଲେ ଦୁର୍ଭାଗ୍ୟର ବିଷୟ, ଜନପ୍ରତିନିଧି ଭାବେ ଲୋକଙ୍କ ସେବା କରୁଥିବା ଉଆଁସୀଙ୍କ ନିଜ ମୁଣ୍ଡ ଗୁଞ୍ଜିବାକୁ ଖଣ୍ଡିଏ ପକ୍କାଘର ନାହିଁ। ସେ ନିଜର ୭୫ ବର୍ଷୀୟ ରୁଗ୍ଣ ସ୍ବାମୀ ଗୋବର୍ଦ୍ଧନ ମାଝୀ, ଦୁଇ ପୁଅ, ବୋହୂ ଓ ନାତିନାତୁଣୀଙ୍କ ସହ ଏକ ବିପଦପୂର୍ଣ୍ଣ ଭଙ୍ଗା ମାଟିଘରେ ରହୁଛନ୍ତି। ବର୍ଷା ଦିନେ ଛାତରୁ ପାଣି ଗଳିବା ସହ କାନ୍ଥ ଧସିବା ଭୟରେ ପରିବାର ଲୋକେ ଆତଙ୍କିତ ଅବସ୍ଥାରେ ରାତି କାଟୁଛନ୍ତି। ପରିବାରର ବଡ଼ ପୁଅ ବଳରାମ ମଧ୍ୟ ଋଣ କରି ଏକ ଛୋଟ ଘର ନିର୍ମାଣ କରିଥିଲେ ହେଁ, ଏବେ ସେହି ଋଣ ଭାର ଯୋଗୁ ତାଙ୍କ ଆର୍ଥିକ ସ୍ଥିତି ଶୋଚନୀୟ ହୋଇପଡ଼ିଛି।
ଓ୍ବାର୍ଡ ମେମ୍ବର ଉଆଁସୀ ମାଝୀ କହିଛନ୍ତି, ମୁଁ ସରପଞ୍ଚ, ପିଇଓ ଓ ବିଡିଓଙ୍କୁ ବାରମ୍ବାର ଗୁହାରି କରିଛି। କିନ୍ତୁ ଆଜି ପର୍ଯ୍ୟନ୍ତ ମୋ ପାଇଁ ଘରଟିଏ ମଞ୍ଜୁର ହେଲାନାହିଁ। ଆମେ ଗରିବ ଲୋକ, ଭଙ୍ଗା ଘରେ ବର୍ଷା ଶୀତ ସହି କେତେ ଦିନ ବଞ୍ଚିବୁ ବୋଲି ସେ ପ୍ରଶ୍ନ କରିଛନ୍ତି।
ପ୍ରଶାସନିକ ସ୍ତରରେ ତାଲିକା ପ୍ରସ୍ତୁତିରେ ତ୍ରୁଟି ଓ ଉପଯୁକ୍ତ ତଦାରଖ ଅଭାବରୁ ପ୍ରକୃତ ଗରିବ ଶ୍ରେଣୀର ଲୋକେ ଏହି ସରକାରୀ ସୁବିଧାରୁ ବାଦ ପଡ଼ୁଥିବା ଅଭିଯୋଗ ହେଉଛି। ଉଆଁସୀଙ୍କ ପରିବାର ଏବେବି ଚାଳ ଉପରେ ପଲିଥିନ ଘୋଡ଼ାଇ ଦୁର୍ଦ୍ଦଶାପୂର୍ଣ୍ଣ ଜୀବନ ବିତାଉଛନ୍ତି। ଯଦି ଜଣେ ଜନପ୍ରତିନିଧିଙ୍କ ଅବସ୍ଥା ଏପରି, ତେବେ ସାଧାରଣ ଗରିବ ଶ୍ରେଣୀର ଲୋକଙ୍କ ସ୍ଥିତି କଣ ହୋଇଥିବ, ତାହା ସହଜେ ଅନୁମେୟ। ଏହି ଘଟଣା ପ୍ରତି ଜିଲା ପ୍ରଶାସନ ଦୃଷ୍ଟି ଦେଇ ତୁରନ୍ତ ଯୋଗ୍ୟ ପରିବାରକୁ ଆବାସ ଯୋଜନାରେ ସାମିଲ କରିବାକୁ ସାଧାରଣରେ ଦାବି ହେଉଛି।
Dharitri – Odisha’s No.1 Odia Daily
