ବ୍ରହ୍ମପୁର ଅଫିସ,୧୧ା୧୦: ଗଞ୍ଜାମ ଜିଲା ବ୍ରହ୍ମପୁର ସହରରେ ସୋମବାର ପୋଲିସ ଏକ ବଡ଼ ଧରଣର ଆଇପିଏଲ୍ କ୍ରିକେଟ୍ ବେଟିଂ କାରବାର ଠାବ କରିଛି। ପୋଲିସ ଏହି ର଼୍ୟାକେଟ୍ ଚଳାଉଥିବା ଜଣେ ଷ୍ଟକିଷ୍ଟଙ୍କ ସମେତ ୮ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଲାଞ୍ଜିପଲ୍ଲୀର ଜଗନ୍ନାଥ ଚୌଧୁରୀ, ଅମ୍ବିକାନଗରର ସବ୍ୟସାଚୀ ପାଢ଼ୀ, କୀର୍ତ୍ତିି ରଞ୍ଜନ ଶତପଥୀ, ବିଜିପୁରର ନୀଳାଦ୍ରି ପାଢ଼ୀ, ହଳଦିଆପଦରର ସନ୍ତୋଷ କୁମାର ନାୟକ, ଗୋଷାଣୀ ନୂଆଗଁା ବୈଦ୍ୟସାହିର ଅଜିତ କୁମାର ସାହୁ, ଗୋଷାଣୀନୂଆଗଁାର ରାମ ପ୍ରସାଦ ପାଢ଼ୀ ଓ ବିନୋଦ ପଣ୍ଡା। ଗିରଫ ଅଭିଯୁକ୍ତଙ୍କୁ ବୈଦ୍ୟନାଥପୁର ଥାନା ମାମଲା (ନଂ.୨୭୩/୨୧)ରେ ସୋମବାର କୋର୍ଟ ଚାଲାଣ କରାଯାଇଥିବା ପୋଲିସ କହିଛି। ବୈଦ୍ୟନାଥପୁର ଥାନାରେ ଆୟୋଜିତ ଏକ ଖବରଦାତା ସମ୍ମିଳନୀରେ ବ୍ରହ୍ମପୁର ଏସ୍ପି ପିନାକ ମିଶ୍ର ଏହି ସୂଚନା ଦେଇଛନ୍ତି। ଏମାନଙ୍କ ନିକଟରୁ ୮ଲକ୍ଷ ୬୩ହଜାର ୨୦୦ଟଙ୍କା, ୧୧ ମୋବାଇଲ୍ ଫୋନ୍ ଜବତ ହୋଇଛି। ଅନ୍ୟପଟେ ପୋଲିସ ଷ୍ଟକିଷ୍ଟ ଜଗନ୍ନାଥ ଚୌଧୁରୀଙ୍କୁ ରିମାଣ୍ଡରେ ଆଣିବ ବୋଲି ଟାଉନ ଏସ୍ଡିପିଓ ବିଷ୍ଣୁପ୍ରସାଦ ପତି ସୂଚନା ଦେଇଛନ୍ତି।
ଜଗନ୍ନାଥ ଜିଲାରେ ଆଇପିଏଲ ବେଟିଂ ପାଇଁ ଦୁଇ ଦୁଇଟି ୱେବ୍ସାଇଟ୍ ଜରିଆରେ ୟୁଜର ଆଇଡି ଓ ପାସ୍ୱାର୍ଡ ଦେଇ କେତେକ ବୁକିଙ୍କ ମାଧ୍ୟମରେ ଏହି କାରବାର ଚଳାଇଥିଲେ ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ସେହିପରି ରାଜ୍ୟ ବାହାରକୁ ଏମାନଙ୍କର ଲିଙ୍କ୍ ରହିଥିବା ମଧ୍ୟ ତଦନ୍ତରୁ ଜଣାପଡିଛି। ଆଇପିଏଲ୍ କ୍ରିକେଟ୍ ଆରମ୍ଭ ହେବା ଦିନଠାରୁ ଅନ୍ଲାଇନ୍ ବେଟିଂ ଆରମ୍ଭ ହୋଇଯାଇଥିଲା ।
