ନୂଆଦିଲ୍ଲୀ,୨୨।୩: ଆଇପିଏଲ୍ ୨୦୨୩ ପାଇଁ କାଉଣ୍ଟଡାଉନ୍ ଆରମ୍ଭ ହୋଇଛି। ମାର୍ଚ୍ଚ ୩୧ରେ ଏହି ଟୁର୍ନାମେଣ୍ଟ ଆରମ୍ଭ ହେବ। ଦୁଇ ମାସ ଧରି ହେବାକୁ ଥିବା ଏହି ଟୁର୍ନାମେଣ୍ଟର ନିୟମରେ ଅନେକ ପରିବର୍ତ୍ତନ କରାଯାଇଛି, ଯାହା ଖେଳକୁ ଆହୁରି ରୋମାଞ୍ଚକର କରିବ।
ଟି୨୦ କ୍ରିକେଟର ମହାକୁମ୍ଭ ଆଇପିଏଲ୍କୁ ଆଉ ୧୫ ଦିନରୁ କମ୍ ସମୟ ରହିଥିବା ବେଳେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ପକ୍ଷରୁ କିଛି ନିୟମରେ ପରିବର୍ତ୍ତନ କରାଯାଇଛି। ପୂର୍ବରୁ ଟସ୍ ପଡିବା ପୂର୍ବରୁ ଉଭୟ ଦଳର ଅଧିନାୟକଙ୍କୁ ଦଳ ଘୋଷଣା କରିବାକୁ ପଡୁଥିଲା। ବିସିସିଆଇ ପକ୍ଷରୁ ଧାରା ୧.୨.୧ରେ ପରିବର୍ତ୍ତନ କରାଯିବା ଫଳରେ ଏଣିକି ଟସ୍ ପଡିବା ପରେ ମଧ୍ୟ ଟିମ୍ ଘୋଷଣା କରଯାଇପାରିବ। ଏହା ସହିତ ମ୍ୟାଚ୍ ଆରମ୍ଭ ହେବା ପୂର୍ବରୁ ଦଳ ଚାହିଁଲେ ଏହାର ଚୂଡାନ୍ତ ଏକାଦଶ ପରିବର୍ତ୍ତନ କରି ପାରିବ। ଏ ନେଇ ପ୍ରତିପକ୍ଷ ଦଳର ଅଧିନାୟକଙ୍କ ଅନୁମତି ଆବଶ୍ୟକ ପଡିବ ନାହିଁ ବୋଲି କୁହାଯାଇଛି। ଧାରା ୧.୨.୯ ଅନୁସାରେ ଏହା ସମ୍ଭବ ନଥିବା ବେଳେ ଏଥିରେ ସଂଶୋଧନ କରାଯାଇଛି। ତେବେ ମ୍ୟାଚ୍ ଆରମ୍ଭ ହେବା ପୂର୍ବରୁ ଅଧିନାୟକ ୧୧ ଜଣିଆ ଚୂଡାନ୍ତ ଦଳ ଓ ୫ ଜଣ ସବଷ୍ଟିଚ୍ୟୁଟ ଫିଲ୍ଡରଙ୍କ ତାଲିକା ପ୍ରକାଶ କରିବାକୁ ବାଧ୍ୟ ରହିବେ। ଏହା ସହିତ ଉଇକେଟ କିପିଂ ପାଇଁ ରହିଥିବା ନିୟମରେ ମଧ୍ୟ ବଡ ପରିବର୍ତ୍ତନ କରାଯାଇଛି। ଆଗୁଆ ବଲ୍ ସଂଗ୍ରହ ବା ବ୍ୟାଟର ବଲ୍କୁ ଛୁଇଁ ନଥିବା ବେଳେ ସ୍ଥାନ ପରିବର୍ତ୍ତନ କଲେ ପେନାଲ୍ଟିର ବ୍ୟବସ୍ଥା କରାଯାଇଛି। ଉଇକେଟ କିପର ସ୍ଥାନ ପରିବର୍ତ୍ତନ କଲେ ବଲ୍କୁ ଡେଡ୍ ବଲ୍ ଘୋଷଣା କରାଯିବ। ଯଦି ଓ୍ବାଇଡ୍ କିମ୍ବା ନୋ ବଲ୍ ଥିବ ତେବେ ୧ ରନ୍ ସହିତ ୫ ରନ୍ର ପେନାଲ୍ଟି ପ୍ରଦାନ କରାଯିବାକୁ ନିଷ୍ପତ୍ତି ନିଆଯାଇଛି। ଫିଲ୍ଡରେ ରହିଥିବା ଦୁଇ ଅମ୍ପାୟାର ଏହି ନିଷ୍ପତ୍ତି ନେବେ ଓ ଅଧିନାୟକଙ୍କୁ ସୂଚିତ କରିବେ। ସେହିପରି ୫ ଜଣ ସବଷ୍ଟିଚ୍ୟୁଟ ଫିଲ୍ଡରଙ୍କ ତାଲିକାରେ ଥିବା ଖେଳାଳିଙ୍କ ମଧ୍ୟରୁ ଜଣଙ୍କୁ ହିଁ ଇମ୍ପାକ୍ଟ ସବଷ୍ଟିଚ୍ୟୁଟ୍ ଖେଳାଳି ଭାବରେ ସାମିଲ କରାଯାଇପାରିବ ବୋଲି କୁହାଯାଇଛି।
