ଇଣ୍ଡିଆନ ପ୍ରିମିୟର ଲିଗରେ ପ୍ରଶଂସକମାନେ ପ୍ରାୟତଃ ରନ ବର୍ଷା ହେଉଥିବା ଦେଖନ୍ତି, କିନ୍ତୁ ବେଳେବେଳେ ବୋଲରମାନେ ମଧ୍ୟ ବୋଲିଂ କରି ବ୍ୟାଟ୍ସମ୍ୟାନ୍ଙ୍କୁ ହଇରାଣ କରନ୍ତି। ଆଇପିଏଲ ୨୦୨୦ର ୩୯ତମ ମ୍ୟାଚରେ ତାହା ଦେଖିବାକୁ ମିଳିଥିଲା ଏହି ମ୍ୟାଚ୍ରେ କୋଲକାତା ନାଇଟ ରାଇଡର୍ସ ଦଳ ମାତ୍ର ୮୪ ରନରେ ଅଲଆଉଟ୍ ହୋଇଥିଲା। ବାଙ୍ଗାଲୋରର ପ୍ରତ୍ୟେକ ବୋଲର କୋଲକାତା ବିପକ୍ଷରେ ଦମ୍ଦାର ବୋଲିଂ କରିଥିଲେ। ୟୁଜବେନ୍ଦ୍ର ଚହଲ ୪ ଓଭରରେ ୧୫ ରନ ଦେଇ ୨ ଉଇକେଟ ନେଇଥିଲେ। ୱାଶିଂଟନ ସୁନ୍ଦର ୪ ଓଭରରେ ୧୪ ରନ ପାଇଁ ୧ ଉଇକେଟ ନେଇଥିଲେ। କିନ୍ତୁ ମହମ୍ମଦ ସିରାଜ ସବୁଠୁ ଭଲ ବୋଲିଂ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ।
କୋଲକାତା ବିପକ୍ଷରେ ୮ ରନ ପାଇଁ ସିରାଜ ୩ ଉଇକେଟ ନେଇଥିଲେ। ସିରାଜ ପ୍ରଥମ ଓଭରରୁ ଶାହରୁଖ ଖାନଙ୍କ ଦଳର ବ୍ୟାଟ୍ସମ୍ୟାନଙ୍କ ଅସୁବିଧାରେ ପକାଇଥିଲେ। ପ୍ରଥମ ଓଭରରେ କ୍ରମାଗତ ଦୁଇଟି ବଲରେ ସିରାଜ ରାହୁଲ ତ୍ରିପାଠୀ ଏବଂ ନୀତୀଶ ରାଣାଙ୍କୁ ଆଉଟ୍ କରିଥିଲେ। ଏହା ପରେ ସେ ଟମ ବଣ୍ଟନଙ୍କ ଉଇକେଟ ମଧ୍ୟ ନେଇଥିଲେ। ସିରାଜ ତାଙ୍କର ପ୍ରଥମ ଦୁଇ ଓଭର୍ ମେଡେନ୍ ପକାଇଥିଲେ। ଆଇପିଏଲ ଇତିହାସରେ ପ୍ରଥମ ଥର ପାଇଁ କୌଣସି ଖେଳାଳି ଏହି ଉପଲବ୍ଧି ହାସଲ କରିଛନ୍ତି। ମହମ୍ମଦ ସିରାଜ କେକେଆର୍ ବିପକ୍ଷରେ ବ୍ୟାଟ୍ସମ୍ୟାନ୍ଙ୍କୁ ଗୋଟିଏ ବି ଚୌକା ଦେଇ ନ ଥିଲେ।
ମହମ୍ମଦ ସିରାଜଙ୍କ କ୍ରିକେଟରେ ଯାତ୍ରା ଏତେ ସହଜ ନ ଥିଲା। ସିରାଜ ହାଇଦ୍ରାବାଦର ଅତ୍ୟନ୍ତ ଗରିବ ପରିବାରରେ ଜନ୍ମଗ୍ରହଣ କରିଥିଲେ ଏବଂ ତାଙ୍କ ପିତା ଜଣେ ଅଟୋ ଡ୍ରାଇଭର ଥିଲେ। ଅଟୋ ଡ୍ରାଇଭର ହୋଇଥିଲେ ମଧ୍ୟ ପିତା ସିରାଜଙ୍କୁ କ କୌଣସି ଜିନିଷରୁ ବଞ୍ଚିତ ହେବାକୁ ଦେଇ ନ ଥିଲେ। ସିରାଜ ଦିନସାରା କ୍ରିକେଟ ଅଭ୍ୟାସ କରୁଥିଲେ। ଏପରିକି ସେ ରାତିରେ ଅଭ୍ୟାସ କରିବାକୁ ଯାଉଥିଲେ। ଅଧିକ ଅଭ୍ୟାସ ହେତୁ, ମା’ ମଧ୍ୟ ତାଙ୍କୁ ଅନେକ ଥର ମାଡ ମାରିଥିଲେ କିନ୍ତୁ ଏହି ଜିଦ ତାଙ୍କୁ ଆଇପିଏଲ୍କୁ ନେଇଗଲା। ମହମ୍ମଦ ସିରାଜଙ୍କୁ ଆଇପିଏଲ ୨୦୧୭ରେ ୨.୬ କୋଟି ମୂଲ୍ୟରେ ସନରାଇଜର୍ସ ହାଇଦ୍ରାବାଦ କିଣିଥିଲା ଏବଂ ଏହା ପରେ ଏହି ବୋଲର ପଛକୁ ଚାହିଁ ନ ଥିଲେ। ୨୦୧୭ରେ ସିରାଜ ଭାରତ ପାଇଁ ଟି-୨୦ ଡେବ୍ୟୁ କରିଥିଲେ ଏବଂ ୨୦୧୯ରେ ସେ ଅଷ୍ଟ୍ରେଲିଆ ବିପକ୍ଷରେ ଏଏକଦିବସୀୟ ଡେବ୍ୟୁ କରିଥିଲେ। ସିରାଜ ଏପର୍ଯ୍ୟନ୍ତ ଅନ୍ତର୍ଜାତୀୟ କ୍ରିକେଟରେ ନିଜର ଛାପ ଛାଡି ପାରି ନାହାଁନ୍ତି କିନ୍ତୁ ଆଇପିଏଲରେ ପରାକାଷ୍ଠା ପ୍ରଦର୍ଶନ କରିଛନ୍ତି।
