ପାଣିକୋଇଲି,୧୧ା୧୨(ଡି.ଏନ.ଏ.): ପାଣିକୋଇଲି ଥାନା ଅନ୍ତର୍ଗତ ମୂଳାପାଳ ପଞ୍ଚାୟତର ବରପଦା ମୌଜାରୁ ରାତିଅଧିଆ ଶତାଧିକ ଗଛ କଟାଯିବା ନେଇ ଥାନାରେ ଅଭିଯୋଗ ପରେ ତଦନ୍ତ ଆରମ୍ଭ ହୋଇଛି। ବ୍ୟାସନଗର ତହସିଲଦାର ଅଶୋକ କୁମାର ମାଝି ଓ ଥାନାଧିକାରୀ ଚିନ୍ମୟୀ ବେହେରା ସଦଳବଳ ଘଟଣାସ୍ଥଳରେ ପହଞ୍ଚତ୍ ଗଛ କଟା ଓ ନିର୍ମାଣାଧୀନ ରାସ୍ତା କାର୍ଯ୍ୟର ତଦନ୍ତ କରିଥିଲେ। ଗଛ ଲଗାଯାଇଥିବା ପ୍ଲଟର ସତତ୍ୟା ଉପରେ ମାପ କରାଯାଇ ଯାଞ୍ଚ କରାଯାଇଥିଲା। ଘଟଣାସ୍ଥଳରେ ଅଭିଯୋଗକାରୀ ଗୋଷ୍ଠୀ ଓ ରାସ୍ତା ନିର୍ମାଣକାରୀ ଗୋଷ୍ଠୀର ଶତାଧିକ ଲୋକ ରୁଣ୍ଡ ହୋଇଥିଲେ।
ଆଇନ ଶୃଙ୍ଖଳା ପରିସ୍ଥିତ ସୃଷ୍ଟି ହେବାକୁ ଥିବାରୁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଥିଲା। ତେବେ ତଦନ୍ତ ପରେ ପୋଲିସ ଓ ରାଜସ୍ବ ବିଭାଗ କୌଣସି କାର୍ଯ୍ୟାନୁଷ୍ଠାନ ନ ନେଇ ଫେରିଆସିଥିଲେ, ଯାହାକୁ ନେଇ ସାଧାରଣରେ ଉତ୍ତେଜନା ଓ ଅସନ୍ତୋଷ ଦେଖିବାକୁ ମିଳିଥିଲା। ଗଛ କଟା ଉପରେ ତ୍ୱରିତ କାର୍ଯ୍ୟାନୁଷ୍ଠାନ ନ ନେଇ ବିଳମ୍ବତା ତଦନ୍ତକୁ ଅନେକ ଗ୍ରହଣ କରିପାରି ନ ଥିଲେ। ଏନେଇ ତହସିଲଦାର ଓ ପୋଲିସକୁ ଘଟଣା ସର୍ମ୍ପକରେ ପଚାରିବାରୁ ତଦନ୍ତ ପ୍ରକ୍ରିୟା ଚାଲୁ ରହିଛି। ଉପରିସ୍ଥ ଅଧିକାରୀଙ୍କ ସହ ଆଲୋଚନା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ। ବାଲି ଖାଦାନକୁ ରାସ୍ତା ନିର୍ମାଣ ପାଇଁ ଫଳନ୍ତି ଗଛ ସହ ତାର ବାଡ଼ାକୁ ନଷ୍ଟ କରାଯାଇଥିବା ଲିଙ୍ଗେଶ୍ୱର ଉନ୍ନୟନ କମିଟି ପକ୍ଷରୁ ଥାନାରେ ଅଭିଯୋଗ କରାଯାଇଥିଲା।
