ଢେଙ୍କାନାଳ ଅଫିସ/ରାସୋଳ (ଡି.ଏନ୍.ଏ.),୧୪।୧ ଢେଙ୍କାନାଳ ଜିଲା ରାସୋଳସ୍ଥିତ ଓଡ଼ିଶା ଗ୍ରାମ୍ୟ ବ୍ୟାଙ୍କ ଡକାୟତି ଘଟଣାରେ ଗୁରୁବାର ଆରମ୍ଭ ହୋଇଛି ସାଇଣ୍ଟିଫିକ୍ ଟିମ୍ର ତଦନ୍ତ। ଥାନାଧିକାରୀ ବିଜୟ କୁମାର ହାଇବ୍ରୁଙ୍କ ନେତୃତ୍ୱରେ ପୋଲିସ କର୍ମଚାରୀ ଏଥିରେ ସହାୟତା କରିଥିଲେ। ସାଇଣ୍ଟିଫିକ୍ ଟିମ୍ ଦିନତମାମ ବ୍ୟାଙ୍କରେ ତନାଘନା କରିବା ସହିତ ନମୁନା ସଂଗ୍ରହ କରିଛନ୍ତି। ଏଭଳି ବଡ଼ ଧରଣର ଡକାୟତି ପରେ ବ୍ୟାଙ୍କ କର୍ତ୍ତୃପକ୍ଷଙ୍କ ମୁଣ୍ଡବ୍ୟଥା ବଢ଼ିଛି। ଭୁବନେଶ୍ୱରସ୍ଥିତ ଗ୍ରାମ୍ୟ ବ୍ୟାଙ୍କ ଅଧ୍ୟକ୍ଷ ଏମ୍. ମୋହନ ପୂର୍ବାହ୍ନରେ ପହଞ୍ଚତ୍ ଘଟଣାବେଳେ ଉପସ୍ଥିତ ବ୍ୟାଙ୍କ ମ୍ୟାନେଜର, କ୍ୟାଶିୟର ଏବଂ ଅନ୍ୟ କର୍ମଚାରୀଙ୍କ ସହିତ ଆଲୋଚନା କରିଛନ୍ତି। ତଦନ୍ତ ଚାଲିଥିବାରୁ ଗ୍ରାହକଙ୍କ ଲାଗି ବ୍ୟାଙ୍କ ବନ୍ଦ ରଖାଯିବା ସହିତ ଅପ୍ରୀତିକର ପରିସ୍ଥିତି ସୃଷ୍ଟି ହେବା ଆଶଙ୍କାରେ ବାହାରେ ସୁରକ୍ଷା କର୍ମୀ ମୁତୟନ କରାଯାଇଥିଲା।
ବ୍ୟାଙ୍କରୁ ଅଭିଯୁକ୍ତମାନେ କୋଟିଏରୁ ଊର୍ଦ୍ଧ୍ୱ ଟଙ୍କାର ସୁନା ସମେତ ଜମାକାରୀଙ୍କ ଲକ୍ଷାଧିକ ଟଙ୍କା ନେଇଯାଇଥିଲେ। ମାତ୍ର ୨ ଘଣ୍ଟା ମଧ୍ୟରେ ଲୁଟ୍ ସୁନା, ଟଙ୍କା ଧରିବାରେ ପୋଲିସ ସଫଳ ହୋଇଥିଲେ ହେଁ, ଏଯାଏ ଚିତ୍ର ଅସ୍ପଷ୍ଟ ରହିଛି। ବ୍ୟାଙ୍କରେ ମୋଟ କେତେଟଙ୍କା ଥିଲା, କେତେଟଙ୍କା ଲୁଟ୍ ହୋଇଛି, ଲକରରେ ଥିବା ସୁନାର ପରିମାଣ ଏବଂ ଜବତ ସୁନା, ଟଙ୍କା ବିଷୟରେ ଗୁରୁବାର ଦିନତମାମ ଅଧିକାରୀମାନେ ଯାଞ୍ଚ କରିଛନ୍ତି। ତଥାପି ସମ୍ପୂର୍ଣ୍ଣ ଆକଳନ ସରିବାକୁ ଦିନେ ଦୁଇଦିନ ଲାଗିଯିବ ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ଅପରପକ୍ଷେ ସ୍ପଷ୍ଟ ଦିବାଲୋକରେ ଥାନାଠାରୁ ମାତ୍ର ୭୦୦ ମିଟର ଦୂରରୁ ଏଭଳି ଡକାୟତି ପୋଲିସକୁ ଖୋଲା ଚ୍ୟାଲେଞ୍ଜ ବୋଲି ଚର୍ଚ୍ଚା ହେଉଛି। ସ୍ଥାନୀୟ ଅଭିଯୁକ୍ତଙ୍କ ସହାୟତା ବିନା ଏଭଳି ଲୁଟ୍ପାଟ ଅସମ୍ଭବ। ଏଥିରେ କେତେଜଣ ଜଣାଶୁଣା ବ୍ୟକ୍ତି ସାମିଲ ରହିଥିବା ଆଲୋଚନା ଜୋର୍ ଧରିଛି। ଏ ସଂକ୍ରାନ୍ତରେ ଥାନାଧିକାରୀ ହାଇବ୍ରୁ କହିଛନ୍ତି, ପୋଲିସ ହାତରେ ପ୍ରମାଣ ଲାଗିଛି। ଡକାୟତି ଘଟଣାର କିଛି ଘଣ୍ଟା ମଧ୍ୟରେ କେତେଜଣ ଅଭିଯୁକ୍ତ ଧରାପଡ଼ିଛନ୍ତି। ସେମାନଙ୍କୁ ଅଟକ ରଖି ପଚରାଉଚୁରା କରାଯାଉଛି। ଅତିଶୀଘ୍ର ଡକାୟତି ଘଟଣାର ରହସ୍ୟ ଉନ୍ମୋଚିତ ହେବ। ତେବେ ତଦନ୍ତ ଚାଲିଥିବାରୁ ଜିଲା ପୋଲିସ ପକ୍ଷରୁ ରାତି ୮ଟା ସୁଦ୍ଧା ଏ ସମ୍ପର୍କରେ ସ୍ପଷ୍ଟ ତଥ୍ୟ ଦିଆଯାଇନାହିଁ। ଏସ୍ପି ଏଲ୍. ଦିବ୍ୟା ଭି.ଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ପ୍ରତିକ୍ରିୟା ମିଳିପାରିନି।
ଧରାଇଦେଲେ କାର୍ ଡ୍ରାଇଭର
ବୁଧବାର ଅପରାହ୍ନରେ ଡକାୟତ ଗ୍ୟାଙ୍ଗ୍ର ୪ଜଣ ବ୍ୟାଙ୍କରୁ ଲୁଟ୍ପାଟ କରିବା ପରେ ଦୁଇଟି ବାଇକ୍ରେ ରାସୋଳରୁ ଢେଙ୍କାନାଳ ଚାଲିଆସିଥିଲେ। ଏକ କାର୍ ଭଡ଼ା ନେଇ ଜିଲା ବାହାରକୁ ଚାଲିଯିବାକୁ ସେମାନେ ଯୋଜନା କରିଥିଲେ। ଏଥିଲାଗି ଢେଙ୍କାନାଳ ବସ୍ଷ୍ଟାଣ୍ଡ୍ରୁ ଏକ ଗାଡ଼ି (ନଂ. ଓଡି ୦୫ ଏଓ୍ବାଇ ୫୭୩୧) ଭଡ଼ା କରିଥିଲେ। ସଦର ଥାନା ଗୋବିନ୍ଦପୁର ଫାଣ୍ଡି ନିକଟ ୫୫ନଂ. ଜାତୀୟ ରାଜପଥ ଦେଇ ଯିବାବେଳକୁ ଅଭିଯୁକ୍ତଙ୍କ ବ୍ୟବହାରକୁ ନେଇ ଡ୍ରାଇଭରଙ୍କ ସନ୍ଦେହ ଉପୁଜିଥିଲା। ବାହାନା କରି ସେ ଗାଡ଼ି ବାହାରକୁ ଆସି ଉକ୍ତ ସ୍ଥାନରେ ସାଦାପୋଷାକରେ ପଇଁତରା ମାରୁଥିବା ଥାନାଧିକାରୀ ଅଭିନବ ଡାଳୁଆଙ୍କୁ ସୂଚନା ଦେଇଥିଲେ। ଇତିମଧ୍ୟରେ ୩ଜଣ ଅଭିଯୁକ୍ତ ଚମ୍ପଟ ମାରିଥିବାବେଳେ ଜଣଙ୍କୁ କାବୁ କରିବାରେ ପୋଲିସ ସଫଳ ହୋଇଥିଲା। ତାଙ୍କ ସୂଚନା ଆଧାରରେ ଲୁଟ୍ରେ ବ୍ୟବହୃତ ୨ ବାଇକ୍ ଜବତ ହୋଇଥିଲା। ପରେ ଅନ୍ୟ ୪ଜଣଙ୍କୁ ଉଠାଇ ଆଣି ପୋଲିସ ଗୋବିନ୍ଦପୁର ଫାଣ୍ଡିରେ ପଚରାଉଚୁରା କରିଥିଲା।
ଚିନ୍ତାରେ ସୁନା ବନ୍ଧକଧାରୀ ଗ୍ରାହକ
ରାସୋଳସ୍ଥିତ ଓଡ଼ିଶା ଗ୍ରାମ୍ୟ ବ୍ୟାଙ୍କ ଉପରେ ଆଖପାଖ ଅଞ୍ଚଳର ବହୁ ଗ୍ରାହକ ନିର୍ଭର କରନ୍ତି। ବିଶେଷକରି ଚାଷୀ, ବ୍ୟବସାୟୀ ଏବଂ ମଧ୍ୟବିତ୍ତ ବର୍ଗ ସୁନା ବନ୍ଧକ ଦେଇ ଋଣ ନେଇଥାଆନ୍ତି। ଦୈନିକ ଲକ୍ଷାଧିକ ଟଙ୍କାର ନଗଦ ସମେତ ସୁନା କାରବାର ମଧ୍ୟ ହୋଇଥାଏ। ତେବେ ବୁଧବାର ଘଟିଥିବା ଡକାୟତି ଘଟଣା ପରେ ଗ୍ରାହକଙ୍କ ମଧ୍ୟରେ ଛନକା ପଶିଛି। ଗୁରୁବାର ବହୁ ସୁନା ବନ୍ଧକଧାରୀ ଥାନାକୁ ଆସି ପଚାରି ବୁଝିଛନ୍ତି। ଅନ୍ୟପଟେ ପୋଲିସ ପ୍ରଶାସନ ପକ୍ଷରୁ ନିର୍ଭର ଆଶ୍ୱାସନା ଦିଆଯିବା ପରେ ସେମାନେ ଘରକୁ ବାହୁଡ଼ିଥିଲେ।
