ରୂପସା, ୨୩।୨(ଡି.ଏନ.ଏ.):ବାଲେଶ୍ୱର ଜିଲା ସିଂଲା ଥାନା ଅଧୀନ ଇଡ଼ଦା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ମଙ୍ଗଳବାର ଜଣେ ଫାର୍ମାସିଷ୍ଟ ନିଶାସକ୍ତ ଅବସ୍ଥାରେ ଉନ୍ମତ୍ତକାଣ୍ଡ ଘଟାଇଛନ୍ତି। ଫାର୍ମାସିଷ୍ଟଙ୍କ ଆକ୍ରମଣରେ କରୋନା ଟିକା ନେବାକୁ ଆସିଥିବା ଜଣେ ବ୍ୟକ୍ତି ଗୁରୁତର ଆହତ ହୋଇଛନ୍ତି। ତାଙ୍କ ହାତ ଓ ଗୋଡରେ ଗଭୀର କ୍ଷତ ହୋଇଛି। ଫାର୍ମାସିଷ୍ଟଜଣକ ଅନ୍ୟମାନଙ୍କୁ ଗୋଡାଇ ଆକ୍ରମଣ କରିବାରୁ ଲୋକେ ତାଙ୍କୁ କାବୁ କରି ବାନ୍ଧି ପକାଇଥିଲେ। ପରେ ସିଂଲା ଥାନା ପୋଲିସ ପହଞ୍ଚି ଫାର୍ମାସିଷ୍ଟଙ୍କୁ ଲୁହାଚେନ୍ରେ ବାନ୍ଧି ଥାନାକୁ ନେଇଥିଲା।
ସକାଳେ ସ୍ବାସ୍ଥ୍ୟକେନ୍ଦ୍ରର ଫାର୍ମାସିଷ୍ଟ ସୁବାଶିଷ ଟୁଡୁ ନିଶାସକ୍ତ ଅବସ୍ଥାରେ ଥିଲେ। ଦାଣ୍ଡି ଗ୍ରାମର ପ୍ରଶାନ୍ତ ଘଡ଼ାଇ ଉକ୍ତ ସ୍ବାସ୍ଥ୍ୟକେନ୍ଦ୍ରକୁ ଟିକା ନେବା ପାଇଁ ଆସିଥିଲେ। ସେ ଟିକା ନେବା ସମ୍ପର୍କରେ ପଚାରିବାରୁ ଫାର୍ମାସିଷ୍ଟ ସୁବାଶିଷ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ପ୍ରଶାନ୍ତଙ୍କୁ ମଦ ବୋତଲରେ ଆକ୍ରମଣ କରିଥିଲେ। ଉଲ୍ଲେଖଯୋଗ୍ୟ, କିଛି ମାସ ପୂର୍ବରୁ ଫାର୍ମାସିଷ୍ଟ ଜଣକ ନିଶାସକ୍ତ ଅବସ୍ଥାରେ ଖଣ୍ଡା, ଭୁଜାଲି ଧରି ଲୋକଙ୍କୁ ଗୋଡ଼ାଇ ଆକ୍ରମଣ କରିଥିଲେ। ବାରମ୍ବାର ବିଶୃଙ୍ଖଳା ସୃଷ୍ଟି କରୁଥିବା ଏଭଳି ନିଶାସକ୍ତ ଫାର୍ମାସିଷ୍ଟଙ୍କୁ ଚାକିରିରୁ ବହିଷ୍କାର କରିବା ପାଇଁ ସରପଞ୍ଚ ଦେବୀପ୍ରସାଦ ଭଞ୍ଜଙ୍କ ସମେତ ଅଞ୍ଚଳବାସୀ ବସ୍ତା ମେଡ଼ିକାଲ ଅଫିସରଙ୍କଠାରେ ଲିଖିତ ଦାବି କରିଛନ୍ତି। ଅପରପକ୍ଷରେ ଜିଲା ମୁଖ୍ୟ ଚିକିତ୍ସାଳୟରୁ ଏକ ପ୍ରତିନିଧି ଦଳ ଓ ବସ୍ତା ମେଡ଼ିକାଲ ଅଫିସର ଡା. ଦେବବ୍ରତ ଜେନା ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି। ଏ ସମ୍ପର୍କରେ ଡା. ଜେନାଙ୍କୁ ପଚାରିବାରୁ ଘଟଣାର ତଦନ୍ତ ପରେ ପଦକ୍ଷେପ ନିଆଯିବ ବୋଲି କହିଛନ୍ତି।
