ନୂଆଦିଲ୍ଲୀ, ୪।୫(ପି.ଟି.)-ଓଡ଼ିଶାର ଶୀର୍ଷସ୍ଥାନୀୟ ପାରା ବ୍ୟାଡ୍ମିଣ୍ଟନ ତାରକା ପ୍ରମୋଦ ଭଗତଙ୍କ ପାରାଅଲିମ୍ପିକ୍ସ ପ୍ରସ୍ତୁତିରେ ବାଧା ସୃଷ୍ଟି ହୋଇଛି। ଦେଶର ଅନ୍ୟତମ ଖେଳାଳି ସୁକାନ୍ତ କଦମଙ୍କ ଅବସ୍ଥା ମଧ୍ୟ ତାହା। କୋଭିଡ୍-୧୯ ମହାମାରୀ ଯୋଗୁ ନୂଆ କ୍ୱାରାଣ୍ଟାଇନ୍ ନିୟମ ଅନୁସାରେ ଏ ଦୁଇ ଖେଳାଳି ସ୍ପାନିଶ ଇଣ୍ଟରନ୍ୟାଶନାଲରେ ଭାଗ ନେଇ ପାରିବେ ନାହିଁ। ଏହି ପ୍ରତିଯୋଗିତା ମେ ୧୧ରୁ ୧୬ ପର୍ଯ୍ୟନ୍ତ ଅନୁଷ୍ଠିତ ହେବ। ଭାରତରୁ ଯାତ୍ରା କରୁଥିବା ସମସ୍ତ ବ୍ୟକ୍ତିଙ୍କ ପାଇଁ ସ୍ପେନରେ ୧୦ ଦିନିଆ କ୍ୱାରାଣ୍ଟାଇନ୍ ବାଧ୍ୟତାମୂଳକ କରାଯାଇଛି। ଫଳରେ ଏମାନେ ଭାଗ ନେବା ସମ୍ଭବ ହେବନାହିଁ। ”ଦୁବାଇ ପାରା ବ୍ୟାଡ୍ମିଣ୍ଟନ ଟୁର୍ନାମେଣ୍ଟରେ ଚମତ୍କାର ପ୍ରଦର୍ଶନ କରିଥିବାରୁ ମୁଁ ଆଗ୍ରହର ସହ ସ୍ପାନିଶ୍ ଟୁର୍ନାମେଣ୍ଟକୁ ଅପେକ୍ଷା କରିଥିଲି। ପାରା ଅଲିମ୍ପିକ୍ସ ପୂର୍ବରୁ ଏହା ଶେଷ ଟୁର୍ନାମେଣ୍ଟ। ଟୋକିଓରେ ମୁଁ କ୍ୟାରିୟରର ସର୍ବପ୍ରଥମ ପାରା ଅଲିମ୍ପିକ୍ସରେ ଭାଗନେବାକୁ ଲକ୍ଷ୍ୟ ରଖିଥିବାରୁ ସ୍ପେନ୍ରେ ପ୍ରସ୍ତୁତି ପାଇଁ ଭଲ ସୁଯୋଗ ଥିଲା। ମାତ୍ର ସାମ୍ପ୍ରତିକ ସମୟର ଆବଶ୍ୟକତାକୁ ମୁଁ ବୁଝୁଛି। ସମସ୍ତେ କୋଭିଡ୍ ପ୍ରୋଟୋକଲ ମାନି ସୁରକ୍ଷିତ ରହିବାକୁ ମୁଁ ନିବେଦନ କରୁଛି“ ବୋଲି ପ୍ରମୋଦ ପ୍ରକାଶ କରିଛନ୍ତି। ଗତମାସରେ ଦୁବାଇରେ ଅନୁଷ୍ଠିତ ଅନ୍ତର୍ଜାତୀୟ ପାରା ବ୍ୟାଡ୍ମିଣ୍ଟନରେ ୪ ସ୍ବର୍ଣ୍ଣ, ୬ ରୌପ୍ୟ ଓ ୭ ବ୍ରୋଞ୍ଜ ପଦକ ପାଇଥିବା ଭାରତୀୟ ଦଳର ସଦସ୍ୟ ଥିଲେ ପ୍ରମୋଦ ଓ କଦମ। ବିଶ୍ୱର ନମ୍ବର ଓ୍ବାନ ଖେଳାଳି ପ୍ରମୋଦ ଏସ୍ଏଲ୍ ୩ ପୁରୁଷ ସିଙ୍ଗଲ୍ସ ଫାଇନାଲରେ ନିଜ ଦେଶର କୁମାର ନୀତେଶଙ୍କୁ ହରାଇ ସ୍ବର୍ଣ୍ଣ ପଦକ ହାସଲ କରିଥିଲେ। ଏହା ବ୍ୟତୀତ ସେ ଏସ୍ଏଲ୍୩-ଏସ୍ଏଲ୍୪ ପୁରୁଷ ଡବଲ୍ସ ଇଭେଣ୍ଟରେ ମଧ୍ୟ ମନୋଜ ସରକାରଙ୍କୁ ସାଥିକରି ସ୍ବର୍ଣ୍ଣ ପଦକ ହାସଲ କରିଥିଲେ। ଏସଏଲ୪ ସିଙ୍ଗଲ୍ସରେ କଦମ ରୌପ୍ୟ ପଦକ ଲାଭ କରିଥିଲେ।
