ବରଗଡ଼,୧୦।୪(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ପ୍ରଧାନମନ୍ତ୍ରୀ ଫସଲବୀମା ଯୋଜନା ବାଟବଣା ହୋଇପଡ଼ିଛି। ବିଭିନ୍ନ ସମୟରେ ଚାଷୀମାନେ ଫସଲକ୍ଷତିର ସମ୍ମୁଖୀନ ହେଉଛନ୍ତି, ଅଥଚ କ୍ଷତିଗ୍ରସ୍ତ ଚାଷୀମାନଙ୍କୁ ଠିକ୍ଭାବେ ବୀମାରାଶି ପ୍ରଦାନ କରାଯାଉ ନାହିଁ। ଏଥିପାଇଁ ଚାଷୀଙ୍କୁ ଜିଲାପାଳଙ୍କ କାର୍ଯ୍ୟାଳୟକୁ ଧାଁ ଧପଡ଼ କରିବା ସହିତ ରାସ୍ତାରୋକୋଠାରୁ ରେଲରୋକୋ ପର୍ଯ୍ୟନ୍ତ ଆନ୍ଦୋଳନକୁ ଓହ୍ଲାଇବାକୁ ପଡୁଛି। ଏହାସତ୍ତ୍ୱେ ବୀମା କ୍ଷତିପୂରଣ ରାଶି ପ୍ରଦାନରେ ଜିଲାରେ ଦେଖାଯାଉଥିବା ସମସ୍ୟା ଅସମାହିତ ରହିଯାଉଛି। ଏହାକୁ ନେଇ ଜିଲାରେ ପୁଣି ଚାଷୀ ଅସନ୍ତୋଷ ଦେଖାଯାଇଛି। ଗୁରୁବାର ଜିଲାର ଭେଡେନ ବ୍ଲକ ଅନ୍ତର୍ଗତ ରେଶମ ପଞ୍ଚାୟତର ଚାଷୀମାନେ ଏଭଳି ଅଭିଯୋଗ ନେଇ ଜିଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦେବା ସହିତ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ସ୍ମାରକପତ୍ର ପ୍ରଦାନ କରିଥିଲେ। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ତାହା ଗ୍ରହଣ କରିଥିଲେ। ଫସଲକ୍ଷତି ଅନୁପାତରେ ବୀମା କମ୍ପାନୀ ବୀମାରାଶି ପ୍ରଦାନ କରୁ ନଥିବା ଅଭିଯୋଗ କରି ବିହିତ ପଦକ୍ଷେପ ନେବା ପାଇଁ ସ୍ମାରକପାତ୍ରରେ ଜିଲାପାଳଙ୍କୁ ନିବେଦନ କରାଯାଇଛି।
ସୂଚନା ଅନୁଯାୟୀ, ଗତବର୍ଷ ରବି ଫସଲ ସମୟରେ ଅଦିନିଆ ବର୍ଷା ଯୋଗୁ ରେଶମ ପଞ୍ଚାୟତରେ ବ୍ୟାପକ ଧାନ ଫସଲ କ୍ଷତି ହୋଇଥିଲା। ସେତେବେଳେ କୃଷି, ରାଜସ୍ବ ଏବଂ ବୀମା କର୍ମଚାରୀମାନେ କ୍ରପ୍କଟିଂ କରି କ୍ଷୟକ୍ଷତି ଆକଳନ କରିଥିଲେ। କ୍ରପ୍କଟିଂ ପରେ ଉକ୍ତ ପଞ୍ଚାୟତରେ ୫୦% ଫସଲକ୍ଷତି ହୋଇଥିବା ନେଇ ସେମାନେ ଆକଳନ କରିବା ସହିତ ରିପୋର୍ଟ ପ୍ରସ୍ତୁତ କରିଥିଲେ। ଏହି ଅନୁପାତରେ କ୍ଷତିଗ୍ରସ୍ତ ଚାଷୀଙ୍କୁ ଏକର ପ୍ରତି ୧୮ହଜାର ଟଙ୍କାରୁ ଊର୍ଦ୍ଧ୍ୱ ଲେଖାଏ ବୀମାରାଶି ମିଳିବା କଥା। ମାତ୍ର ଫସଲକ୍ଷତିର ବର୍ଷକ ପରେ ଚାଷୀଙ୍କୁ ବୀମାରାଶି ପ୍ରଦାନ କରାଯାଉଥିଲେ ସୁଦ୍ଧା ତାହା ଧର୍ମକୁ ଆଖିଠାର ଭଳି ଚାଷୀମାନେ ଅଭିଯୋଗ କରିଛନ୍ତି।
ଗତ ମାର୍ଚ୍ଚ ୨୭ ତାରିଖଠାରୁ ବୀମା କମ୍ପାନୀ ଉକ୍ତ ପଞ୍ଚାୟତର କ୍ଷତିଗ୍ରସ୍ତ ଚାଷୀଙ୍କ ବ୍ୟାଙ୍କ ଆକାଉଣ୍ଟରେ ବୀମା ରାଶି ପ୍ରଦାନ କରିଛି। ତେବେ ଏକର ପ୍ରତି ୧୮ହଜାର ଟଙ୍କାରୁ ଊର୍ଦ୍ଧ୍ୱ ବୀମାରାଶି ମିଳିବା ବଦଳରେ ଏହାକୁ ୫ରୁ ୬ ହଜାର ଟଙ୍କା ମଧ୍ୟରେ ସୀମିତ ରଖାଯାଇଛି ଏବଂ ଏହା ପ୍ରାପ୍ୟ ବୀମାରାଶିର ମାତ୍ର ୧୫ରୁ ୨୦% ମଧ୍ୟରେ ରହିଥିବା ଚାଷୀମାନେ କହିଛନ୍ତି। ଅନ୍ୟପଟେ ବୀମା କମ୍ପାନୀ ଏପର୍ଯ୍ୟନ୍ତ କେତେଜଣ କ୍ଷତିଗ୍ରସ୍ତ ଚାଷୀଙ୍କୁ ବୀମାରାଶି ପ୍ରଦାନ କରିଛି, ତାହା ସ୍ପଷ୍ଟ କରି ନଥିବାବେଳେ ଏବେ ମଧ୍ୟ ଅନେକ ଚାଷୀ ବୀମାରାଶି ପାଇବାରୁ ବଞ୍ଚତ୍ତ ରହିଥିବା ଚାଷୀମାନେ ଅଭିଯୋଗ କରିଛନ୍ତି।
ଏଭଳି ଅଭିଯୋଗ ନେଇ ଜିଲାପାଳଙ୍କୁ ଜଣାଇବା ପାଇଁ ଚାଷୀମାନେ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ମାତ୍ର ସେମାନେ ପହଞ୍ଚତ୍ବା ପୂର୍ବରୁ ପୋଲିସ କାର୍ଯ୍ୟାଳୟର ମୁଖ୍ୟ ଫାଟକକୁ ବନ୍ଦ କରି ଦେଇଥିଲା। ଏହାକୁ ନେଇ ସାମୟିକ ଉତ୍ତେଜନା ପ୍ରକାଶ ପାଇଥିଲା ଏବଂ ଚାଷୀମାନେ ଜିଲାପାଳଙ୍କ କାର୍ଯ୍ୟାଳୟର ମୁଖ୍ୟ ଫାଟକ ସମ୍ମୁଖରେ ଧାରଣାରେ ବସିଥିଲେ। ତେବେ କିଛି ସମୟ ପରେ ଅତିରିକ୍ତ ଜିଲାପାଳ ସାହୁ ନିଜ ଭ୍ୟାନରେ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ମାତ୍ର ଧାରଣାରତ ଚାଷୀମାନେ ଫାଟକ ସମ୍ମୁଖରୁ ଉଠି ନଥିଲେ ଏବଂ ଚାଷୀମାନେ ଅଭିଯୋଗ କରିବାକୁ ଆସିଲେ ଜିଲାପାଳଙ୍କ କାର୍ଯ୍ୟାଳୟରେ କାହିଁକି ପୋଲିସ ତାଲା ମାରୁଛି ବୋଲି ପ୍ରଶ୍ନ କରିଥିଲେ। ପରେ ଅତିରିକ୍ତ ଜିଲାପାଳ ସାହୁ ଭ୍ୟାନରୁ ଓହ୍ଲାଇ ସ୍ମାରକପତ୍ର ଗ୍ରହଣ କରିଥିଲେ ଏବଂ ଚାଷୀମାନେ ଧାରଣାରୁ ଉଠିବା ପରେ କାର୍ଯ୍ୟାଳୟ ଭିତରକୁ ଯାଇଥିଲେ। ଉପରୋକ୍ତ ସମସ୍ୟାର ସମାଧାନ ପାଇଁ ଚାଷୀ ପ୍ରତିନିଧି, ବୀମା କମ୍ପାନୀ ପ୍ରତିନିଧି ଏବଂ ପ୍ରଶାସନିକ ଅଧିକାରୀଙ୍କୁ ନେଇ ଏକ ତ୍ରିପାକ୍ଷିକ ବୈଠକ ଡାକିବାକୁ ଚାଷୀମାନେ ଆହ୍ବାନ କରିଛନ୍ତି। ଆସନ୍ତା ୧୫ଦିନ ମଧ୍ୟରେ ଏହାର ସମାଧାନ ନହେଲେ ଆନ୍ଦୋଳନକୁ ଓହ୍ଲାଇବେ ବୋଲି ଚାଷୀମାନେ ଚେତାବନୀ ଦେଇଛନ୍ତି। ସୁଦାମ ଚରଣ ପାତ୍ର, ନରେନ୍ଦ୍ର ଭୋଇ, ନରେନ୍ଦ୍ର କୁମାର ବାରିକ, ସନ୍ତୋଷ ପ୍ରଧାନ, ରାହାସ ପ୍ରଧାନ, ଭରତ ପ୍ରଧାନଙ୍କ ସମେତ ଅନେକ ଚାଷୀ ପ୍ରତିନିଧି ଏଥିରେ ସାମିଲ ଥିଲେ।