ନୂଆଦିଲ୍ଲୀ,୯।୩ : କରୋନା ମହାମାରୀର ଦୁଇ ବର୍ଷ ପରେ ହଠାତ ଫ୍ଲୁ ସଂକ୍ରମଣ ବଢ଼ିିଚାଲିଛି। ଫ୍ଲୁ ସଂକ୍ରମଣ ଦେଶର ସବୁ ରାଜ୍ୟରେ ରିପୋର୍ଟ କରାଯାଉଛି। ଏହାର ପଛରେ ସବୁଠାରୁ ବଡ କାରଣ ହେଉଛି ମାସ୍କ ହଟିବା ଏବଂ ଇନଫ୍ଲୁଏଞ୍ଜା ଭାଇରସ। ନଭେମ୍ବର୨୦୨୨ ପରଠାରୁ ଫ୍ଲୁ ସଂକ୍ରମଣ ଗତ ୬ମାସ ମଧ୍ୟରେ ୨୦୦ ପ୍ରତିଶତ ବୃଦ୍ଧି ପାଇଛି।
ଅବଶ୍ୟ, ଫେବୃଆରୀ ୨୦୨୩ ମଧ୍ୟଭାଗରୁ ସଂକ୍ରମଣରେ ହ୍ରାସ ଘଟିଛି। ଏହାର ସଂକ୍ରମଣର ବୃଦ୍ଧି ପଛରେ ତିନୋଟି ମୁଖ୍ୟ କାରଣ ଅଛି। ସେସବୁ ହେଉଛି ନଭେମ୍ବରରୁ ଜାନୁୟାରୀ ମଧ୍ୟରେ ଶୀତ ଋତୁ, ପରିବେଶରେ ପ୍ରଦୂଷଣ ବୃଦ୍ଧି ଏବଂ ଭାଇରସ ସଂକ୍ରମଣ ଆଦି।
ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ ପକ୍ଷରୁ କୁହାଯାଇଛି ଯେ ଦେଶରେ କରୋନା ପରି ଅନ୍ୟ ଏକ ଭାଇରସ ସଂକ୍ରମଣ ବଢୁଛି। ଫଳରେ ଥଣ୍ଡା କାଶ ଏବଂ ଜ୍ୱର ରୋଗ ଦ୍ରୁତ ବେଗରେ ବୃଦ୍ଧି ପାଉଛି। ଇନଫ୍ଲୁଏଞ୍ଜା ଭାଇରସ ଯୋଗୁ ଏହା ଘଟୁଛି। ଗତ ଦୁଇ-ତିନିମାସ ଧରି ସ୍ବାଇନ ଫ୍ଲୁ ର ଏକ ସବ ଟାଇପ ଏଚ-୩ ଏନ-୨ ସଂକ୍ରମଣ ଯୋଗୁ ଜ୍ୱର ଏବଂ ଥଣ୍ଡା କାଶରେ ବୃଦ୍ଧି ଘଟିଛି। ଏହା ଯୋଗୁଁ ହସ୍ପିଟାଲରେ ଭର୍ତ୍ତି ହୋଇଥିବା ଲୋକଙ୍କ ସଂଖ୍ୟା ମଧ୍ୟ ବୃଦ୍ଧି ପାଇଛି।
ଇଣ୍ଡିଆନ ମେଡିକାଲ ଆସୋସିଏସନ କହିଛି ଯେ ବର୍ତ୍ତମାନ ଋତୁକାଳୀନ ଜ୍ୱର ବ୍ୟାପୁଛି ଯାହା ପାଞ୍ଚରୁ ସାତ ଦିନ ପର୍ଯ୍ୟନ୍ତ ଚାଲିଥାଏ। ତିନି ଦିନ ମଧ୍ୟରେ ଜ୍ୱର ଦୂର ହୋଇଯାଏ, କିନ୍ତୁ ଥଣ୍ଡା ଏବଂ କାଶ ତିନି ସପ୍ତାହ ଧରି ଲାଗିରୁହେ। ପ୍ରଦୂଷଣ ଯୋଗୁ, ୧୫ ବର୍ଷରୁ କମ ଏବଂ ୫୦ବର୍ଷରୁ ଅଧିକ ବୟସ୍କଙ୍କଠାରେ ଶ୍ୱାସକ୍ରିୟା ସଂକ୍ରମଣ ବୃଦ୍ଧି ପାଉଛି।
