ରାଜନଗର, ୩ା୮(ଡି.ଏନ୍.ଏ.): ରାଜନଗର ବ୍ଲକର ଜୀବନରେଖା କେରେଡ଼ାଗଡ଼-ଅଳତାଙ୍ଗ ବନ୍ୟା ପ୍ରତିରୋଧକ ବନ୍ଧ ପ୍ରତି ହଂସୁଆ ନଦୀ ବିପଦ ସୃଷ୍ଟି କରିଛି। ହଂସୁଆ ମୁହଁରେ ଥିବା ବନ୍ୟା ପ୍ରତିରୋଧକ ବନ୍ଧକୁ ସୁରକ୍ଷା ଦେବାକୁ ନାବାର୍ଡ ସହାୟତାରେ ଆରଆଇଡିଏଫ୍ ଯୋଜନାରେ ସ୍ପର ଓ ପଥର ପ୍ୟାକିଂ ପାଇଁ ଜିଏସ୍ଟି ବାଦ୍ ୧୪ କୋଟି ୭୭ ଲକ୍ଷ ଟଙ୍କା ଯୋଗାଇ ଦିଆଯାଇଛି। ମାତ୍ର ଅତି ନିମ୍ନମାନର କାମ ଯୋଗୁ ନିର୍ମାଣାଧୀନ ସ୍ପର ବାରମ୍ବାର ଭୁଶୁଡି ପଡୁଛି। ସ୍ପର ବାରମ୍ବାର ଭୁଶୁଡିବା ଯୋଗୁ ରାଜନଗର ଅଞ୍ଚଳ ପ୍ରତି ବିପଦ ସୃଷ୍ଟି ହୋଇଛି। ଏହା ରାଜନଗରବାସୀଙ୍କ ସୁରକ୍ଷା ପ୍ରସଙ୍ଗ ହୋଇଥିବାରୁ ଏହି କାମ ନିମ୍ନମାନର କରାଯାଉଥିବା ନେଇ ବିଜେଡି ପକ୍ଷରୁ ଅଭିଯୋଗ କରାଯିବା ସହ ଏହାର ଭିଜିଲାନ୍ସ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନେବାକୁ ଦାବି କରାଯାଇଛି।
ବ୍ଲକ ବିଜେଡି ସଭାପତି ଅଶୋକ କୁମାର ପ୍ରତିହାରୀ ପ୍ରେସ୍ ବିବୃତିରେ ଦେଇଥିବା ସୂଚନା ମୁତାବକ, ହଂସୁଆ ନଦୀ କିଛିବର୍ଷ ହେଲା ନଦୀପଠାକୁ ଖାଇ ବନ୍ଧ ପାଖକୁ ଚାଲି ଆସିଥିଲା। ରାଜନଗରର ଜୀବନରେଖା କୁହାଯାଉଥିବା କେରେଡାଗଡ-ଅଳତାଙ୍ଗ ନଦୀବନ୍ଧ ପ୍ରତି ବିପଦ ସୃଷ୍ଟି ହୋଇଥିଲା। ଏହି ନଦୀବନ୍ଧ ପ୍ରତି ବିପଦ ସୃଷ୍ଟି ହେଲେ ରାଜନଗର ବ୍ଲକର ସାନବଡ଼ ଗୋପାଳପୁର, କେରେଡାଗଡ, ବାଲିସାହିପାଟଣା, ରାଜପୁର, ଓସ୍ତିଆ, ବେଲପାଳ, ବନ୍ଧପଡା ପଞ୍ଚାୟତ ନଦୀରେ ମିଶିବ। ଏହି ନଦୀବନ୍ଧ ଓ ଅଞ୍ଚଳକୁ ସୁରକ୍ଷା ଦେବାକୁ ରାଜନଗର ବିଧାୟକ ଧ୍ରୁବ ସାହୁ ଏ ନେଇ ରାଜ୍ୟ ସରକାରଙ୍କୁ ଜଣାଇବା ପରେ ନାବାର୍ଡ ସହାୟତାରେ ଆରଆଇଡିଏଫ୍ ଯୋଜନାରେ ୧୭ କୋଟିରୁ ଊର୍ଦ୍ଧ୍ୱ ଟଙ୍କା ଯୋଗାଇ ଦିଆଯାଇଛି। ଓଡ଼ିଶା କନଷ୍ଟ୍ରକସନ କମ୍ପାନୀ ଏହି କାମର ଠିକା ନେଇଛି। ଓଡ଼ିଶା କନଷ୍ଟ୍ରକସନ କମ୍ପାନୀଠାରୁ ଭଗବତୀ କନଷ୍ଟ୍ରକସନ ଏହି କାମର ଠିକା ନେଇଛି। ଭଗବତୀ କନଷ୍ଟ୍ରକସନ ଠିକା ନେଇଥିଲେ ମଧ୍ୟ ଅନ୍ୟମାନେ ଏହି କାମ କରୁଛନ୍ତି। ଏହି କାମ ଅତି ନିମ୍ନମାନର କରାଯାଉଛି। ୨୮୦ ମିଟର ପଥର ପ୍ୟାକିଂ ଓ ଲଞ୍ଚତ୍ ସହ ୩ଟି ସ୍ପର ନିର୍ମାଣ ପାଇଁ ଏହି ଅର୍ଥ ଯୋଗାଇ ଦିଆଯାଇଛି। ୨୦୨୧ ନଭେମ୍ବରରେ ଏହି କାମ ଆରମ୍ଭ ହୋଇଥିଲା। ଦୁଇଟି ସ୍ପର ଓ ୨ଶହ ମିଟର ପଥର ପ୍ୟାକିଂ କାମ ୨ ମାସ ତଳୁ ଶେଷ ହୋଇଥିଲା। ଅବଶିଷ୍ଟ ୮୦ ମିଟର ପଥର ପ୍ୟାକିଂ ଓ ଗୋଟିଏ ସ୍ପର କାମ ଜାରି ରହିଛି। ଗତ ୧୦ଦିନ ମଧ୍ୟରେ ନିର୍ମାଣାଧୀନ ୩ନଂ. ସ୍ପର ୨ଥର ଭୁଶୁଡି ପଡିଲାଣି। ନଦୀର ଶେଷ ଅଂଶରେ କିଛିଭାଗ ପଥର ଧସେଇ ପଡିବା ଯୋଗୁ ସ୍ପରଟି ଖସିଯାଇଛି। ସ୍ପରଟି ଧସେଇ ପଡିବା ପରେ ତଟବନ୍ଧ ବିଭାଗ ଓ ଓଡ଼ିଶା କନଷ୍ଟ୍ରକସନ କମ୍ପାନୀର ଅଧିକାରୀମାନେ ଘଟଣାସ୍ଥଳରେ ପହଞ୍ଚତ୍ ଅତି ତରବରିଆ ଭାବେ ଏହାକୁ ଲୁଚାଇବା ପାଇଁ ଯୁଦ୍ଧକାଳୀନ ଭିତ୍ତିରେ ନଦୀ ଭିତରେ ପଥର ପକାଇବା ଆରମ୍ଭ କରିଛନ୍ତି। ଏଷ୍ଟିମେଣ୍ଟ ଅନୁସାରେ, ନଦୀ ଭିତରେ ୨ କୁଇଣ୍ଟାଲ ଓଜନର ବଡବଡ ପଥର ପକାଇ ବେସ ବନାଇ ସ୍ପର ନିର୍ମାଣ କରାଯିବା କଥା। ହେଲେ ତାହା ପରିବର୍ତ୍ତେ ମାତ୍ର ୫ କେଜି, ୧୦ କେଜି, ୨୦ କେଜି ଓଜନର ଛୋଟଛୋଟ ପଥର ଖଣ୍ଡ ପକାଇ ସ୍ପର ନିର୍ମାଣ କରାଯାଇଛି। ଛୋଟଛୋଟ ପଥର ଖଣ୍ଡରେ ସ୍ପର ନିର୍ମାଣ କରାଯାଇଥିବାରୁ ନଦୀର ଜୁଆର ସ୍ରୋତକୁ ଏହା ଅଟକାଇ ପାରୁନାହିଁ। ଫଳରେ ସ୍ପର ତଳୁ ପଥର ବାରମ୍ବାର ଖସି ଭୁଶୁଡି ପଡୁଛି। କେରେଡାଗଡ-ଅଳତାଙ୍ଗ ଲୁଣା ଘେରିବନ୍ଧର ହଂସୁଆ ନଦୀର ଭାଟପଡା ନିକଟରେ ନଦୀ ବାରମ୍ବାର କୂଳକୁ ମାଡି ଆସୁଥିବାବେଳେ ଏହି ନିମ୍ନମାନର କାମ ଅଞ୍ଚଳକୁ ସୁରକ୍ଷା ଦେଇ ପାରିବ ନାହିଁ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବିଧାୟକ ସାହୁ ଦୁର୍ନୀତିକୁ ପ୍ରଶ୍ରୟ ଦିଅନ୍ତି ନାହିଁ। ରାଜନଗରର ସ୍ବାର୍ଥ ପାଇଁ ବିଜେଡି ସବୁବେଳେ ରହିଛି। ତୁରନ୍ତ ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ସହ ଭିଜିଲାନ୍ସ ତଦନ୍ତ କରିବାକୁ ବିଜେଡି ପକ୍ଷରୁ ଦାବି କରାଯାଇଛି।