ଜାକର୍ତ୍ତା,୨୪।୧୧ : ଇଣ୍ଡୋନେସିଆର ପଶ୍ଚିମ ଜାଭା ପ୍ରଦେଶର ସିଆନଜୁରରେ ସୋମବାର ୫.୬ ତୀବ୍ରତାଯୁକ୍ତ ହୋଇଥିବା ଭୂକମ୍ପରେ ମୃତ୍ୟୁସଂଖ୍ୟା ବୃଦ୍ଧି ପାଇବାରେ ଲାଗିଛି। ସରକାରୀ ରେକର୍ଡ ଅନୁଯାୟୀ, ଏପର୍ଯ୍ୟନ୍ତ ଏହି ବିପର୍ଯ୍ୟୟରେ ୨୭୧ ଜଣଙ୍କର ମୃତ୍ୟୁ ହୋଇଛି। ଜାତୀୟ ବିପର୍ଯ୍ୟୟ ଏଜେନ୍ସି କହିଛି ଯେ ଭୂକମ୍ପ ପରେ ୧୫୧ ଜଣ ନିଖୋଜ ଥିବାବେଳେ ୧୦୮୩ ଜଣ ଆହତ ହୋଇଛନ୍ତି।
ଆହତଙ୍କୁ ଚିକିତ୍ସା ଲାଗି ଡାକ୍ତରଖାନାରେ ଭର୍ତ୍ତି କରାଯାଇଛି। ଅଧିକାରୀ କହିଛନ୍ତି ଯେ ୩୦୦ ରୁ ଅଧିକ ଲୋକ ଗୁରୁତର ଆହତ ହୋଇଛନ୍ତି। କିନ୍ତୁ ଏସବୁ ମଧ୍ୟରେ ଏକ ଖୁସି ଖବର ମଧ୍ୟ ଆସିଛି ଯେ ଜଣେ ୬ ବର୍ଷର ଶିଶୁକୁ ମାଟି ତଳ ଅଳିଆ ଆବର୍ଜନାରୁ ଜୀବନ୍ତ ଉଦ୍ଧାର କରାଯାଇଛି। ବର୍ତ୍ତମାନ ଶିଶୁ ଜଣକ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
ଇଣ୍ଡୋନେସିଆର ଜାତୀୟ ବିପର୍ଯ୍ୟୟ ପରିଚାଳନା ଏଜେନ୍ସି (ବିଏନପିବି) କହିଛି ଯେ ସିଆନଜୁର ରେଜେନ୍ସିର କୁଗେନାଙ୍ଗ ଉପ-ଜିଲାର ନାଗରାକ ଗ୍ରାମରେ ଉଦ୍ଧାରକାରୀମାନେ ଶିଶୁ ଅଜକା ମୌଲାନା ମଲିକଙ୍କୁ ଉଦ୍ଧାର କରିଛନ୍ତି। ଏଜେନ୍ସି କହିଛି ଯେ ଶିଶୁଟି ତାଙ୍କ ଜେଜେମା’ଙ୍କ ମୃତଦେହ ପାଖରେ ପୋତି ହୋଇ ରହିଥିଲା। ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି ଯେ ଅଜକା ବର୍ତ୍ତମାନ ସିଆନଜୁର ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଏଜେନ୍ସି କହିଛି ଯେ ଉଦ୍ଧାରକାରୀ ଦଳ ତାଙ୍କ ମାତାପିତାଙ୍କ ମୃତଦେହ ଉଦ୍ଧାର କରିଥିଲେ।
ଭୂକମ୍ପ ଯୋଗୁ ସିଆନଜୁର ସହରରେ ସବୁଠାରୁ ଅଧିକ ବିପର୍ଯ୍ୟୟ ଘଟିଛି। ଏଠାରେ ଲଗାତାର ତିନି ମିନିଟ ପର୍ଯ୍ୟନ୍ତ ଭୂକମ୍ପ ହୋଇଥିଲା। ଅଧିକାଂଶ ଲୋକଙ୍କ ମୃତ୍ୟୁ ମଧ୍ୟ ଏଠାରେ ଘଟିଛି। ତେବେ ମୃତ୍ୟୁର ସରକାରୀ ଆକଳନ ପ୍ରକାଶ ପାଇନାହିଁ।
ଏହି ଭୂକମ୍ପରେ ୫୬,୩୨୦ ଘର କ୍ଷତିଗ୍ରସ୍ତ ହୋଇଛି। ଅନ୍ୟାନ୍ୟ କ୍ଷତିଗ୍ରସ୍ତ ଅଟ୍ଟାଳିକା ମଧ୍ୟରେ ୩୧ ଟି ବିଦ୍ୟାଳୟ, ୧୨୪ଟି ଧାର୍ମିକ ସ୍ଥଳ ଏବଂ ତିନୋଟି ସ୍ବାସ୍ଥ୍ୟ କେନ୍ଦ୍ର ରହିଛି। ବିସ୍ଥାପିତଙ୍କ ଲାଗି ୧୪ ଟି ଆଶ୍ରୟସ୍ଥଳ ନିର୍ମାଣ କରିଛି। ଅନୁସନ୍ଧାନ ଏବଂ ଉଦ୍ଧାର କାର୍ଯ୍ୟ ପାଇଁ ୬ ହଜାରରୁ ଅଧିକ ଉଦ୍ଧାରକାରୀଙ୍କୁ ନିୟୋଜିତ କରାଯାଇଛି।
