ଅମୃତସର: ଦୃଢ ଇଚ୍ଛାଶକ୍ତି ଆଉ କଠିନ ଅଧ୍ୟବସାୟ ବଳରେ ମଣିଷ ସବୁ ଅସମ୍ଭବକୁ ସମ୍ଭବ କରିପାରେ। ଏହି ଉକ୍ତିକୁ ଏବେ ପ୍ରମାଣ କରି ଦେଖାଇଛନ୍ତି ପଞ୍ଜାବର ଦିବ୍ୟାଙ୍ଗ ଯୁବତୀ ପ୍ରତିଷ୍ଠା ଦେବେଶ୍ୱର। ବ୍ରିଟେନର ପ୍ରତିଷ୍ଠିତ ଅକ୍ସଫୋର୍ଡ ୟୁନିଭର୍ସିଟିରେ ନାମ ଲେଖାଇବା କ୍ଷେତ୍ରରେ ସେ ଏବେ ଭାରତର ପ୍ରଥମ ହ୍ବିଲ୍ଚେୟାର ମହିଳା ହୋଇ ପାରିଛନ୍ତି।
ପଞ୍ଜାବ ହୋସିଆରପୁର ଜିଲାର ଝିଅ ପ୍ରତିଷ୍ଠା ଦେବେଶ୍ୱର ଦିଲ୍ଲୀ ୟୁନିଭର୍ସିଟିରୁ ସ୍ନାତକ ଶେଷ କରିଛନ୍ତି। ମାତ୍ର ୧୨ ବର୍ଷ ବୟସରେ ପ୍ରତିଷ୍ଠାଙ୍କର ଅଣ୍ଟା ହାଡ଼ ମାଡ଼ହୋଇ ଭାଙ୍ଗିଯାଇଥିବାରୁ ସେ ହ୍ବିଲ୍ଚେୟାର ବ୍ୟବହାର କରିବାକୁ ବାଧ୍ୟ ହୋଇଥିଲେ। କିନ୍ତୁ ସେ ତାଙ୍କ ମନୋବଳକୁ କମ୍ କରିବାକୁ ଦେଇ ନ ଥିଲେ। କାହା ଉପରେ ବୋଝ ନ ହୋଇ ନିଜର ସାମର୍ଥ୍ୟକୁ ଦେଖାଇ ଦେବା ପାଇଁ ସେ ଦୃଢ଼ ପ୍ରତିଜ୍ଞାବଦ୍ଧ ହୋଇଥିଲେ। ଏଥିପାଇଁ ସେ ଉଚ୍ଚଶିକ୍ଷା ଲାଭ କରିବା ପରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ଆରମ୍ଭ କରିଥିଲେ। ଦିବ୍ୟାଙ୍ଗମାନଙ୍କ ମନରେ ଆତ୍ମପ୍ରତ୍ୟୟ ସୃଷ୍ଟି କରିବା ନିମନ୍ତେ ସେ ବିଭିନ୍ନ କାର୍ଯ୍ୟକ୍ରମରେ ଭାଗ ନେଇ ନିଜ ସକାରାତ୍ମକ ବିଚାର ରଖିଥାନ୍ତି। ଏମିତି କି ଦେଶ ବାହାରେ ମଧ୍ୟ ବିଭିନ୍ନ କାର୍ଯ୍ୟକ୍ରମରେ ଭାଗ ନେଇ ସେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ପ୍ରତିଷ୍ଠାଙ୍କର ଏଭଳି ଉଲ୍ଲେଖନୀୟ କାର୍ଯ୍ୟ ପାଇଁ ତାଙ୍କୁ ୟୁକେର ପ୍ରତିଷ୍ଠିତ ଡାଏନା ଆୱାର୍ଡରେ ମଧ୍ୟ ସମ୍ମାନିତ କରାଯାଇଛି। ଖାଲି ସେତିକି ନୁହେଁ, ପ୍ରତିକୂଳ ପରିସ୍ଥିତି ସତ୍ତ୍ୱେ ନିଜର କଠିନ ପରିଶ୍ରମ ଏବଂ ସକାରାତ୍ମକ ଭାବନା ପାଇଁ ଏବେ ସେ ଅକ୍ସଫୋର୍ଡ ବିଶ୍ୱବିଦ୍ୟାଳୟରେ ପବ୍ଲିକ୍ ପଲିସିରେ ମାଷ୍ଟର୍ସ ଡିଗ୍ରୀ କରିବାର ସୁଯୋଗ ପାଇଛନ୍ତି। ପାଠ ପଢ଼ା ଶେଷ କରିବା ପରେ ସେ ଭାରତ ଫେରି ଦିବ୍ୟାଙ୍ଗଙ୍କ ପାଇଁ କାମ କରିବେ ବୋଲି କହିଛନ୍ତି। ଭାରତୀୟ ଶିକ୍ଷା ବ୍ୟବସ୍ଥାରେ ଦିବ୍ୟାଙ୍ଗଙ୍କ ପାଇଁ ଆହୁରି ବହୁତ କିଛି ସୁଯୋଗ ସୃଷ୍ଟି କରିବା ବାକି ରହିଛି ବୋଲି ସେ କହିଛନ୍ତି। ଏହା ସହିତ ଦିବ୍ୟାଙ୍ଗ ଲୋକଙ୍କ ପ୍ରତି ସମାଜର ଦୃଷ୍ଟିକୋଣ ବଦଳାଇବା ମଧ୍ୟ ନିହାତି ଜରୁରୀ। ଏହି କାରଣରୁ ସେ ନିଜେ ଉଚ୍ଚଶିକ୍ଷା ଲାଭ କରି ପ୍ରତିଷ୍ଠିତ ହେବା ପରେ ଦିବ୍ୟାଙ୍ଗଙ୍କ ପାଇଁ ବହୁତ କିଛି କରିବାକୁ ଇଚ୍ଛା ରଖିଛନ୍ତି।
