ନୂଆଦିଲ୍ଲୀ,୩୧।୫: ଶଶି ଥରୁରଙ୍କ ନେତୃତ୍ୱରେ ଭାରତ ଦ୍ୱାରା ଅପରେସନ ସିନ୍ଦୂରରେ ପଠାଯାଇଥିବା ପ୍ରତିନିଧି ଦଳ ବଡ଼ ସଫଳତା ହାସଲ କରିଛି। କଲମ୍ବିଆ ଅପରେଶନ ସିନ୍ଦୁର ସମୟରେ ପାକିସ୍ତାନରେ ନିହତ ଆତଙ୍କବାଦୀଙ୍କ ପ୍ରତି ସମବେଦନା ପ୍ରକାଶ କରିଥିଲା, ଏବେ ଏହା ଆନୁଷ୍ଠାନିକ ଭାବରେ ତା’ର ବୟାନ ପ୍ରତ୍ୟାହାର କରିନେଇଛି।
ପ୍ରତିନିଧି ଦଳର ନେତୃତ୍ୱ ନେଉଥିବା ଶଶି ଥରୁର ଚିନ୍ତା ପ୍ରକାଶ କରି କହିଥିଲେ, ଆମେ (ଭାରତ) କଲମ୍ବିଆ ସରକାରଙ୍କ ପ୍ରତିକ୍ରିୟାରେ ଟିକେ ନିରାଶ। ଭାରତୀୟ ପ୍ରତିନିଧି ଦଳକୁ ଭେଟିବା ପରେ, କଲମ୍ବିଆର ଉପ-ବୈଦେଶିକ ମନ୍ତ୍ରୀ ୟୋଲାଣ୍ଡା ଭିଲାଭିସେନସିଓ କହିଛନ୍ତି, ଆଜି ଆମେ ପାଇଥିବା ସ୍ପଷ୍ଟୀକରଣ ଉପରେ ବିଶ୍ୱାସ କରୁ। କଶ୍ମୀରରେ କ’ଣ ଘଟିଛି ସେ ବିଷୟରେ ଆମ ପାଖରେ ଥିବା ବିସ୍ତୃତ ସୂଚନା ଆଧାରରେ, ଆମେ ଆଲୋଚନା ଜାରି ରଖିପାରିବୁ।
କଲମ୍ବିଆର ପୂର୍ବ ବିବୃତ୍ତି ପ୍ରତ୍ୟାହାର କରିବା ଉପରେ ଥରୁର କହିଛନ୍ତି, କଲମ୍ବିଆର ଉପ-ବୈଦେଶିକ ମନ୍ତ୍ରୀ ଆମକୁ ବହୁତ ବିନମ୍ରତାର ସହିତ କହିଛନ୍ତି, ସେମାନେ ଯେଉଁ ବିବୃତ୍ତି ଉପରେ ଆମେ ଚିନ୍ତା ପ୍ରକାଶ କରିଥିଲୁ ତାହା ପ୍ରତ୍ୟାହାର କରିନେଇଛନ୍ତି ଏବଂ ସେମାନେ ଏହି ପ୍ରସଙ୍ଗରେ ଆମର ସ୍ଥିତିକୁ ସମ୍ପୂର୍ଣ୍ଣ ଭାବରେ ବୁଝନ୍ତି, ଯାହା ଆମ ପାଇଁ ବହୁତ ମୂଲ୍ୟବାନ’
୨୨ ଏପ୍ରିଲରେ ପହଲଗାମ ଆକ୍ରମଣ ପରେ ଆତଙ୍କବାଦ ବିରୋଧରେ ଭାରତର ମତାମତ ଜଣାଇବା ପାଇଁ ଭାରତୀୟ ଏମ୍ପିମାନଙ୍କର ଏକ ସର୍ବଦଳୀୟ ପ୍ରତିନିଧି ଦଳ ବିଭିନ୍ନ ଦେଶ ଗସ୍ତ କରୁଛନ୍ତି। ସୀମାପାର ଆତଙ୍କବାଦ କାର୍ଯ୍ୟକଳାପ ପ୍ରତି ପାକିସ୍ତାନର ସମର୍ଥନ ଏବଂ ଆତଙ୍କବାଦ ପ୍ରତି ଭାରତର ଶୂନ୍ୟ-ସହିଷ୍ଣୁତା ଆଭିମୁଖ୍ୟ ଜଣାଇବା ପାଇଁ ଥରୁର କଲମ୍ବିଆରେ ପ୍ରତିନିଧିମଣ୍ଡଳର ନେତୃତ୍ୱ ନେଉଛନ୍ତି। କଲମ୍ବିଆ ରାଜଧାନୀରେ ଏକ ସାମ୍ବାଦିକ ସମ୍ମିଳନୀରେ ଥରୁର ଆତଙ୍କବାଦ ଉପରେ ଭାରତର ମତାମତ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ, ‘ଅପରେଶନ ସିନ୍ଦୂର’ ବିଷୟରେ କହିଥିଲେ ଏବଂ ପହଲଗାମ ଆତଙ୍କବାଦୀ ଆକ୍ରମଣ ପ୍ରତି କଲମ୍ବିଆର ପ୍ରତିକ୍ରିୟା ଉପରେ ନିରାଶା ପ୍ରକାଶ କରିଥିଲେ।
