ଜାତିସଂଘ,୧୩।୧: ଆତଙ୍କବାଦ ବିରୋଧୀ ଲଢ଼େଇରେ ଭାରତ ଜାତିସଂଘ ସୁରକ୍ଷା ପରିଷଦରେ ୮ ସୂତ୍ରୀ ଯୋଜନା ଉପସ୍ଥାପନ କରିଛି। ଆତଙ୍କବାଦକୁ କେବେ ସହ୍ୟ କରାଯିବ ନାହିଁ। ଏଥିପାଇଁ ଭାରତ ପକ୍ଷରୁ ଜିରୋ ଟୋଲରେନ୍ସ୍ ନୀତି ଉପରେ ଗୁରତ୍ୱାରୋପ କରାଯାଉଛି। ଅନ୍ତର୍ଜାତୀୟ ଶାନ୍ତି ଏବଂ ଆତଙ୍କବାଦ ବିରୋଧୀ ପଦକ୍ଷେପ ଦ୍ୱାରା ସୃଷ୍ଟି ହେଉଥିବା ବିପଦ ଶୀର୍ଷକ ଆଲୋଚନା ଚକ୍ରରେ ଭାରତ ପକ୍ଷରୁ ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଯୋଗଦେଇ ଏଭଳି ମନ୍ତବ୍ୟ ଦେଇଛନ୍ତି। କେତେକ ଦେଶ ପାଖରେ ଆତଙ୍କବାଦ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଆବଶ୍ୟକ ସରଞ୍ଜାମ ନାହିଁ। ମାତ୍ର କେତେକ ଦେଶ ଆତଙ୍କବାଦୀ କାର୍ଯ୍ୟକଳାପକୁ ପ୍ରୋତ୍ସାହିତ କରୁଥିବା ବୋଲି ସେ କହିଛନ୍ତି। ଚାଇନା ଏବଂ ପାକିସ୍ତାନର ନାମ ନ ନେଇ ସେ ଏଭଳି କହିଛନ୍ତି। ଏସବୁ ଦେଶ ଆତଙ୍କବାଦୀଙ୍କୁ ଆଶ୍ରୟ ଦେବା ସହିତ ପାଣ୍ଠି ଯୋଗାଣ କାର୍ଯ୍ୟ କରୁଥିବା ଜୟ ଶଙ୍କର କହିଛନ୍ତି। ଏବେ ଆତଙ୍କବାଦୀଙ୍କ ପାଖରେ ବହୁ ଅତ୍ୟାଧୁନିକ ଅସ୍ତ୍ରଶସ୍ତ୍ର ଏବଂ ଯୁଦ୍ଧ ସରଞ୍ଜାମ ରହିଛି। ଏହା ଯୋଗୁ ଆତଙ୍କବାଦ ବିରୋଧରେ ଲଢ଼େଇ କରିବା କଷ୍ଟକର ହୋଇ ପଡ଼ିଥିବା ସେ କହିଛନ୍ତି। ଆତଙ୍କବାଦ ସମସ୍ୟାର ସମାଧାନ ପାଇଁ ରାଜନୈତିକ ଇଛାଶକ୍ତି ଉପରେ ଅନ୍ୟ ଦେଶମାନେ ଗୁରୁତ୍ୱାରୋପ କରିଥିଲେ। ତେବେ ଭାରତ ଏହାର ସଫଳ ସମାଧାନ ଲାଗି ଯୋଜନା ଉପସ୍ଥାପନ କରିବା ସହିତ ଜାତିସଂଘ ସୁରକ୍ଷା ପରିଷଦର ସଦସ୍ୟଙ୍କ ମିଳିତ ସହଯୋଗ ଅପରିହାର୍ଯ୍ୟ ବୋଲି ଜୟ ଶଙ୍କର କହିଛନ୍ତି।
