ନୂଆଦିଲ୍ଲୀ, ୨୦ା୧: ଭାରତୀୟ ମହିଳା ଓ ପୁରୁଷ ଦଳ ସର୍ବପ୍ରଥମ ଖୋ ଖୋ ବିଶ୍ୱକପରେ ଚାମ୍ପିୟନ ହୋଇଛି। ସ୍ଥାନୀୟ ଇନ୍ଦିରାଗାନ୍ଧୀ ଷ୍ଟାଡିୟମରେ ରବିବାର ଅନୁଷ୍ଠିତ ମହିଳା ବିଭାଗର ଫାଇନାଲରେ ଭାରତୀୟ ଦଳ ନେପାଳକୁ ୭୮-୪୦ରେ ପରାସ୍ତ କରିଛି। ଭାରତର ଅଂଶୁ କୁମାରୀ ବେଷ୍ଟ ଆଟାକର, ନେପାଳର ମନମତୀ ଧାନୀ ଶ୍ରେଷ୍ଠ ଡିଫେଣ୍ଡର ଏବଂ ଭାରତର ଚାଇଥ୍ରା ବି’ ବେଷ୍ଟ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଛନ୍ତି। ସେହିପରି ପୁରୁଷ ବର୍ଗର ଫାଇନାଲରେ ଭାରତ ୫୪-୩୬ରେ ନେପାଳକୁ ହରାଇ ଦେଇଛି। ଦଳର ଅଧିନାୟକ ପ୍ରତୀକ ଓ୍ବାଇକରଙ୍କ ନେତୃତ୍ୱରେ ମେହୁଲ, ଅନିକେତ ପୋଟେ, ଓ ରାମଜୀ କାଶ୍ୟପ ପ୍ରଭାବୀ ପ୍ରଦର୍ଶନ ଜାରି ରଖି ଦଳକୁ ଏହି ଐତିହାସିକ ସଫଳତା ଆଣି ଦେଇଥିଲେ।
ମହିଳା ବର୍ଗରେ ଉଭୟ ଦଳ ସେମିଫାଇନାଲରେ ସୋମାନଙ୍କ ପ୍ରତିଦ୍ୱନ୍ଦ୍ୱୀଙ୍କ ବିପକ୍ଷରେ ବଡ଼ ବିଜୟ ହାସଲ କରିଥିବାରୁ ଫାଇନାଲ ତୀବ୍ର ପ୍ରତିଦ୍ୱନ୍ଦ୍ୱିତାମୂଳକ ହେବ ବୋଲି ଆଶା କରାଯାଉଥିଲା। ରବିବାର ଫାଇନାଲରେ ନେପାଳ ଟସ୍ ଜିତି ଭାରତକୁ ପ୍ରଥମେ ଆଟାକ୍ର ସୁଯୋଗ ଦେଇଥିଲା। ଆୟୋଜକ ଦଳ ଅତୁଳନୀୟ ଚପଳତା, ସହନଶୀଳକା ଓ ଦ୍ରୁତ ପ୍ରଦର୍ଶନ କରି ନେପାଳକୁ ହରାଇ ଦେଇଥିଲା। ଗ୍ରୁପ୍ ଷ୍ଟେଜ୍ରେ ଦକ୍ଷିଣ କୋରିଆ, ଇରାନ ଓ ମାଲେସିଆ ବିପକ୍ଷରେ ଭାରତ ଏହାର ସମସ୍ତ ତିନୋଟିଯାକ ମ୍ୟାଚରେ ବିଜୟ ଲାଭ କରିଥିଲା। ଦଳ ମୋଟ ୩୭୫ ପଏଣ୍ଟ ସ୍କୋର କରିଥିବା ବେଳେ ୫୪ ବରଣ କରିଥିଲା। ବାଂଲାଦେଶ ବିପକ୍ଷ କ୍ୱାର୍ଟରଫାଇନାଲ ମ୍ୟାଚ ଦଳ ୧୦୯-୧୬ ବ୍ୟବଧାନରେ ଜିତିଥିଲା। ଦକ୍ଷିଣ ଆଫ୍ରିକା ବିପକ୍ଷ ସେମିଫାଇନାଲରେ ମଧ୍ୟ ଦଳ ଭଲ ପ୍ରଦର୍ଶନ କରିଥିଲା। ଏଥିରେ ଭାରତ ୬୬-୧୬ରେ ବିଜୟୀ ହୋଇଥିଲା। ନେପାଳ ବିପକ୍ଷ ଫାଇନାଲରେ ଭାରତ ପୁନର୍ବାର ଆଧିପତ୍ୟ ବିସ୍ତାର କରି ଖେଳିଥିଲା। ଜବରଦସ୍ତ ଫର୍ମରେ ଥିବା ଅଧିନାୟିକା ପ୍ରିୟଙ୍କା ଇଙ୍ଗଲେ ତାଙ୍କ ଦଳ ପାଇଁ ମଲ୍ଟିପଲ ଟଚ୍ ପଏଣ୍ଟ ସ୍କୋର କରିଥିଲେ।
