ନୂଆଦିଲ୍ଲୀ,୩।୧ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଯେ ଦେଶର ସୀମାରେ ବିରୋଧୀଙ୍କ ଆହ୍ବାନକୁ ରୋକିବାରେ ଭାରତର ସମ୍ପୂର୍ଣ୍ଣ ସାମର୍ଥ୍ୟ ରହିଛି। ସୀମାରେ ଶତ୍ରୁଙ୍କୁ ଜବାବ ଦେବାକୁ ଭାରତୀୟ ଯବାନ ସର୍ବଦା ପ୍ରସ୍ତୁତ ରହିଛନ୍ତି। ଆମ ଦେଶ କଦାପି ଯୁଦ୍ଧକୁ ପ୍ରୋତ୍ସାହିତ କରେ ନାହିଁ ଏବଂ ପଡୋଶୀ ଦେଶ ସହ ଆନ୍ତରିକ ସମ୍ପର୍କ ବଜାୟ ରଖିବାକୁ ଚାହେଁ। ସେ କହିଛନ୍ତି, ଆଜି ସାରା ବିଶ୍ୱରେ ଅନେକ ବିବାଦ ଚାଲିଛି। ଭାରତ ସର୍ବଦା ଯୁଦ୍ଧକୁ ବିରୋଧ କରିଆସୁଛି। ଏହା ଆମର ନୀତି ।
ସୀମା ସଡକ ସଂଗଠନ ଦ୍ୱାରା ନିର୍ମିତ ଏକ ସେତୁ ଉଦଘାଟନ କରି ରାଜନାଥ ମଙ୍ଗଳବାର ଏହା କହିଛନ୍ତି।
ଆମେ ପ୍ରଭୁ ରାମ ଏବଂ ଭଗବାନ ବୁଦ୍ଧଙ୍କ ଶିକ୍ଷା ଠାରୁ ଏହା ଉତ୍ତରାଧିକାରୀ ହୋଇଛୁ। ତଥାପି ଆବଶ୍ୟକ ପଡ଼ିଲେ ଉଚିତ ଜବାବ ଦେବାକୁ ଆମେ ପଛଘୁଞ୍ଚା ଦେବୁ ନାହିଁ।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଯେ ସୀମାକୁ ମଜବୁତ କରିବା ପାଇଁ ଭିତ୍ତିଭୂମି ନିର୍ମାଣକୁ କେନ୍ଦ୍ର ସରକାର ପ୍ରାଥମିକତା ଦେଇଛନ୍ତି। ଏହି ନୂତନ ସେତୁ କେବଳ ସ୍ଥାନୀୟ ଲୋକଙ୍କ ଗତିବିଧିକୁ ସହଜ କରିବ ନାହିଁ, ବରଂ ସୈ ନ୍ୟ, ଭାରୀ ଯନ୍ତ୍ରପାତି ଏବଂ ଯାନ୍ତ୍ରିକ ଯାନର ଫ୍ରଣ୍ଟ ଅଞ୍ଚଳକୁ ଦ୍ରୁତ ଗତିରେ ପରିବହନ କରିବାରେ ମଧ୍ୟ ସହାୟକ ହେବ। ପଶ୍ଚିମ ସିଆଙ୍ଗ ଏବଂ ଉପର ସିଆଙ୍ଗ ଜିଲାର ଆଲୋ-ୟିଙ୍ଗକିଙ୍ଗ ମଧ୍ୟରେ ୧୦୦ମିଟର ରାସ୍ତାରେ କ୍ଲାସ-୭୦ଷ୍ଟିଲ ଆର୍କ ନିର୍ମାଣ କରାଯାଇଛି। ଏଥିରେ ୭୨୪.୩ କୋଟି ଟଙ୍କା ଖର୍ଚ୍ଚ ହୋଇଛି। ଏହା ସୀମା ସଡକ ସଂଗଠନ ଦ୍ୱାରା ସମ୍ପନ୍ନ ହୋଇଥିବା ୨୮ ଟି ପ୍ରକଳ୍ପ ମଧ୍ୟରୁ ଗୋଟିଏ ।
ପ୍ରତିରକ୍ଷା ମନ୍ତ୍ରୀ ସୀମା ସଡକ ସଂଗଠନର ୨୭ ଟି ପରିଯୋଜନା ଭର୍ଚୁଆଲ ମାଧ୍ୟମରେ ଲୋକାର୍ପଣ କରିଥିଲେ। ସେଥିମଧ୍ୟରୁ ଆଠଟି ଲଦାଖରେ, ଚାରିଟି ଜମ୍ମୁ-କଶ୍ମୀରରେ, ପାଞ୍ଚଟି ଅରୁଣାଚଳ ପ୍ରଦେଶରେ, ତିନୋଟି ସିକିମ ଏବଂ ପଞ୍ଜାବରେ ତଥା ଦୁଇଟି ରାଜସ୍ଥାନରେ ନିର୍ମିତ ହୋଇଛି।
