ଓ୍ବାଶିଂଟନ, ୭ା୪(ପି.ଟି.): ଜାତିଭିତ୍ତିକ ପକ୍ଷପାତକୁ ସ୍ପଷ୍ଟ ଭାବେ ନିଷେଧ ଲାଗି ଆମେରିକାର କାଲିଫର୍ନିଆ ଷ୍ଟେଟ୍ ସିନେଟରେ ଡେମୋକ୍ରାଟିକ୍ ସଦସ୍ୟ ଆଣିଥିବା ବିଲ୍କୁ ବିରୋଧ କରି ଶତାଧିକ ଭାରତୀୟ-ଆମେରିକୀୟ ଶାନ୍ତିପୂର୍ଣ୍ଣ ବିକ୍ଷୋଭ ପ୍ରଦର୍ଶନ କରିଥିଲେ। ରାଜ୍ୟ ସିନେଟକୁ ନିର୍ବାଚିତ ପ୍ରଥମ ମୁସଲମାନ ତଥା ଆଫଗାନ-ଆମେରିକୀୟ ସଦସ୍ୟ ଐଶା ଓ୍ବାହେବ ଏହି ବିଲ୍ ମାର୍ଚ୍ଚ ୨୨ରେ ଉପସ୍ଥାପନ କରିଥିଲେ। ଆମେରିକାର ସବୁଠୁ ଜନବହୁଳ ରାଜ୍ୟ କାଲିଫର୍ନିଆ ସିନେଟରେ ଯଦି ଏହା ଗୃହୀତ ହୁଏ, ତେବେ ଜାତିଭିତ୍ତିକ ଭେଦଭାବ ବେଆଇନ ଘୋଷଣା କରିବାରେ ଏହା ଆମେରିକାର ପ୍ରଥମ ରାଜ୍ୟ ହେବ। ଏହାକୁ ବିରୋଧ କରି ଉତ୍ତର ଆମେରିକାର ହିନ୍ଦୁ ମେଣ୍ଟ ଦ୍ୱାରା ଏହି ରାଲିର ଆୟୋଜନ କରାଯାଇଥିଲା। ବିଲ୍ କାର୍ଯ୍ୟକାରୀ ହେଲେ ହିନ୍ଦୁ ଏବଂ ଏସୀୟମାନେ ଦୋଷୀସାବ୍ୟସ୍ତ ହେବା ସହ ସେମାନଙ୍କ ପିଲାମାନେ ଘୃଣା ଓ ଟାର୍ଗେଟର ଶିକାର ହେବେ ବୋଲି ଫ୍ରେମଣ୍ଟ ସିଟି ବାସିନ୍ଦା ହର୍ଷ ସିଂ କହିଛନ୍ତି।
