ହାମିଲ୍ଟନ,୧୨ା୩: ହାମିଲ୍ଟନରେ ଶନିବାର ଖେଳାଯାଇଥିବା ମହିଳା ବିଶ୍ୱକପ୍ର ତୃତୀୟ ମ୍ୟାଚରେ ଟିମ୍ ଇଣ୍ଡିଆ ୱେଷ୍ଟଇଣ୍ଡିଜ୍କୁ ୧୫୫ ରନ୍ରେ ହରାଇ ଦେଇଛି।
ଟିମ୍ ଇଣ୍ଡିଆ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା। ସ୍ମୃତି ମାନ୍ଧାନାଙ୍କ ସହ ଉପଅଧିନାୟକ ହରମନପ୍ରୀତ କୌର ଦମ୍ଦାର ବ୍ୟାଟିଂ କରି ଶତକ ହାସଲ କରିଥିଲେ। ଫଳରେ ଭାରତ ନିର୍ଦ୍ଧାରିତ ୫୦ ଓଭରରେ ୮ ଉଇକେଟ ହରାଇ ୩୧୭ ରନ୍ କରିଥିଲା। ୱେଷ୍ଟଇଣ୍ଡିଜ ଆଗରେ ୩୧୮ ରନ୍ର ବଡ଼ ସ୍କୋର ରଖିଥିଲା ଟିମ୍ ଇଣ୍ଡିଆ। ହେଲେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୱେଷ୍ଟଇଣ୍ଡିଜ ୪୦.୩ ଓଭରରେ ସମସ୍ତ ଉଇକେଟ ହରାଇ ୧୬୨ ରନ୍ କରିବାରେ ସଫଳ ହୋଇଥିଲେ।
୩୧୮ ରନ୍ର ଟାର୍ଗେଟକୁ ପିଛା କରୁଥିବା ୱେଷ୍ଟଇଣ୍ଡିଜର ଦୁଇ ଓପନର ଡିଏଣ୍ଡ୍ରା ଡଟିନ ଓ ହାଲେ ମାଥ୍ୟୁସ ଜବରଦସ୍ତ ଆରମ୍ଭ ଦେଇଥିଲେ। ୧୨ ଓଭରରେ ଉଭୟ ୧୦୦ ରନ୍ କରି ଭଲ ଷ୍ଟାର୍ଟ ଦେଇଥିଲେ। ୪୬ ବଲ୍ରେ ୬୨ ରନ୍ କରିଥିବା ଡଟିନଙ୍କୁ ସ୍ନେହା ରଣା ଆଉଟ କରି ଭାରତକୁ ପ୍ରଥମ ସଫଳତା ଦେଇଥିଲେ। ପରେ ୱେଷ୍ଟଇଣ୍ଡିଜର ବ୍ୟାଟିଂ ବିପର୍ଯ୍ୟୟ ଆରମ୍ଭ ହୋଇଥିଲା। ମେଘନା ସିଂହ କାଇଶୋନା ନାଇଟ(୫) ଓ ଅଧିନାୟକ ଷ୍ଟେଫାନୀ ଟେଲର୍(୧)ଙ୍କୁ ଆଉଟ କରି ଭାରତର ବିଜୟ ପଥ ପରିଷ୍କାର କରିଥିଲେ। ଫର୍ମରେ ଥିବା ମାଥ୍ୟୁସ ୪୩ ରନ୍ କରି ସ୍ନେହା ରଣାଙ୍କ ବଲ୍ରେ ଆଉଟ ହୋଇଯାଇଥିଲେ। ପରେ ୱେଷ୍ଟଇଣ୍ଡିଜ ବ୍ୟାକ୍ ଫୁଟକୁ ଚାଲି ଯାଇଥିଲା।
