ନୂଆଦିଲ୍ଲୀ/ଓ୍ବାଶିଂଟନ, ୧୮।୫ : ଆମେରିକୀୟ ପ୍ରତିରକ୍ଷା ପ୍ରତିଷ୍ଠାନ (ପେଣ୍ଟାଗନ) ଭାରତ ବିଷୟରେ ଏକ ବଡ଼ ଦାବି କରିଛି। ପେଣ୍ଟାଗର ଜଣେ ବରିଷ୍ଠ ଅଧିକାରୀ ଆମେରିକାର ସାଂସଦଙ୍କୁ କହିଛନ୍ତି ଯେ ଭାରତ ୨୦୨୨ ଜୁନ ସୁଦ୍ଧା ରୁଷିଆରୁ କିଣାଯାଇଥିବା ଏସ୍-୪୦୦ କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀକୁ ମୁତୟନ କରିବାକୁ ଚାହୁଁଛି। ଯାହା ଦ୍ୱାରା ଏହା ପାକିସ୍ତାନ ଏବଂ ଚାଇନାର ପକ୍ଷରୁ କୌଣସି ବିପଦର ଆଶଙ୍କା କମ୍ ହୋଇପାରିବ।
ଆମେରିକାର ପ୍ରତିରକ୍ଷା ଇଣ୍ଟେଲିଜେନ୍ସ ଏଜେନ୍ସିର ନିର୍ଦ୍ଦେଶକ ଲ୍ୟୁଟନାଟ୍ ଜେନେରାଲ ସ୍କଟ ବାରିୟର ସିନେଟର ପ୍ରତିରକ୍ଷା ସେବା କମିଟି ଆଗରେ ଏହା କହିଛନ୍ତି। ସେ କହିଛନ୍ତି ଯେ ଗତ ବର୍ଷ ଡିସେମ୍ବରରେ ରୁଷିଆ ଭାରତକୁ ଏସ୍-୪୦୦ କ୍ଷେପଣାସ୍ତ୍ର ଯୋଗାଇବା ଆରମ୍ଭ କରିଥିଲା। ନିକଟରେ ଆମେରିକା ସଂସଦର ଏହି କମିଟିର ଏକ ବୈଠକ ଅନୁଷ୍ଠିତ ହୋଇଥିଲା।
ବାରିୟର କହିଛନ୍ତି ଯେ ଦେଶର ସେନାର ପ୍ରତିରକ୍ଷାକୁ ଦୃଢ଼ କରିବା ତଥା ଏହାର ଆକ୍ରମଣାତ୍ମକ ତଥା ପ୍ରତିରକ୍ଷା ସାଇବର କ୍ଷମତାକୁ ବଢ଼ାଇବା ପାଇଁ ଭାରତୀୟ ସେନା ଉନ୍ନତ ପ୍ରତିରକ୍ଷା ଏବଂ ନୀରିକ୍ଷଣ ପ୍ରଣାଳୀ କିଣିବାକୁ କହିଥିଲା।
ପେଣ୍ଟାଗନ୍ର ଗୁପ୍ତଚର ମୁଖ୍ୟ ଏହା ମଧ୍ୟ କହିଛନ୍ତି ଯେ ଭାରତ ଏହାର ହାଇପରସୋନିକ, ବାଲିଷ୍ଟିକ, କ୍ରୁଜ ଏବଂ ଏୟାର ଡିଫେନ୍ସ କ୍ଷେପଣାସ୍ତ୍ର କ୍ଷମତାର ଶୀଘ୍ର ବିକାଶ କରୁଛି। ୨୦୨୧ରେ ଭାରତ କେତେକ ପରୀକ୍ଷା କରିଥିଲା। ମହାକାଶ କକ୍ଷପଥରେ ଭାରତର ଉପଗ୍ରହ ସଂଖ୍ୟା ବୃଦ୍ଧି ପାଉଛି।
ବାରିୟର କହିଛନ୍ତି ଯେ ଘରୋଇ ପ୍ରତିରକ୍ଷା ଉତ୍ପାଦନ ବୃଦ୍ଧି ଉପରେ ଗୁରୁତ୍ୱ ଦେଇ ବାୟୁ, ସ୍ଥଳ, ସେନାବାହିନୀ ଏବଂ ରଣନୈତିକ ପରମାଣୁ ଶକ୍ତି ସହିତ ଭାରତ ବ୍ୟାପକ ସାମରିକ ଆଧୁନିକୀକରଣ କରୁଛି। ଏକୀକୃତ ସାମରିକ କମାଣ୍ଡ ଗଠନ ପାଇଁ ଭାରତ ମଧ୍ୟ ପଦକ୍ଷେପ ନେଉଛି। ଭାରତ ଏହାର ତିନୋଟି ସାମରିକ ସେବାର ସାଧାରଣ ସାମର୍ଥ୍ୟକୁ ବୃଦ୍ଧି କରୁଛି ବୋଲି ସେ କହିଛନ୍ତି।
