ନୂଆଦିଲ୍ଲୀ,୧୩।୧: ଭାରତ ପୁଣିଥରେ ଶାକ୍ସଗାମ ଉପତ୍ୟକା ସମ୍ପର୍କରେ ଚାଇନା ଏବଂ ପାକିସ୍ତାନକୁ ସ୍ପଷ୍ଟ ବାର୍ତ୍ତା ଦେଇଛି। ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ପୁନର୍ବାର କହିଛନ୍ତି, ପାକିସ୍ତାନ ଏବଂ ଚାଇନା ମଧ୍ୟରେ ୧୯୬୩ରେ ହୋଇଥିବା ସୀମା ଚୁକ୍ତିନାମା ଭାରତ ପାଇଁ ସମ୍ପୂର୍ଣ୍ଣ ଅବୈଧ। ଶାକ୍ସଗାମ ଉପତ୍ୟକା ଭାରତର ଅଂଶ ଏବଂ ଭାରତ ସେଠାରେ କୌଣସି କାର୍ଯ୍ୟକଳାପକୁ ସ୍ବୀକୃତି ଦିଏ ନାହିଁ। ବୈଦେଶିକ ମନ୍ତ୍ରଣାଳୟ ପୂର୍ବରୁ ଏହି ପ୍ରସଙ୍ଗରେ ସ୍ପଷ୍ଟ କରିସାରିଛି ଯେ, ଭାରତ ଏହାର ସ୍ବାର୍ଥ ରକ୍ଷା ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ନେବାର ଅଧିକାର ସଂରକ୍ଷଣ କରେ।
ସେନା ମୁଖ୍ୟ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, ପାକିସ୍ତାନ ୧୯୬୩ ଚୁକ୍ତିନାମା ଅନୁଯାୟୀ ଶାକ୍ସଗାମ ଉପତ୍ୟକାର କିଛି ଅଂଶ ଚାଇନାକୁ ହସ୍ତାନ୍ତର କରିଛି, ଯାହାକୁ ଭାରତ କେବେ ଗ୍ରହଣ କରେ ନାହିଁ। ଆମେ ସେଠାରେ କୌଣସି କାର୍ଯ୍ୟକଳାପକୁ ଗ୍ରହଣ କରୁନାହୁଁ। ଏହି ଚୁକ୍ତିନାମା ଆମ ପାଇଁ ଅବୈଧ। ଜେନେରାଲ ଦ୍ୱିବେଦୀ ଏହା ମଧ୍ୟ କହିଛନ୍ତି ଯେ, ଚାଇନା-ପାକିସ୍ତାନ ଅର୍ଥନୈତିକ କରିଡର (ସିପିଇସି) ମଧ୍ୟ ଭାରତ ପାଇଁ ବୈଧ ନୁହେଁ। ସେ ଏହାକୁ ଉଭୟ ଦେଶ ଦ୍ୱାରା କରାଯାଉଥିବା ବେଆଇନ କାର୍ଯ୍ୟ ବୋଲି କହିଥିଲେ ଏବଂ କହିଥିଲେ ଯେ ପ୍ରକଳ୍ପଟି ଭାରତୀୟ ଅଞ୍ଚଳ ଦେଇ ଯାଏ।
ସେନା ମୁଖ୍ୟ କହିଛନ୍ତି, ଭବିଷ୍ୟତରେ ମହିଳାମାନେ ପଦାତିକ ବାହିନୀ ଏବଂ ପାରା-ଏସଏଫରେ ମଧ୍ୟ ଯୋଗ ଦେଇପାରନ୍ତି, କିନ୍ତୁ ସମାଜକୁ ଏଥିପାଇଁ ପ୍ରସ୍ତୁତ ରହିବାକୁ ପଡିବ। ସେନା ଲିଙ୍ଗ ନିରପେକ୍ଷତାର ସମର୍ଥନ କରେ। ଯଦି ମହିଳାମାନେ ସେନାର ନିର୍ଦ୍ଧାରିତ ମାନଦଣ୍ଡ ଏବଂ ଚିକିତ୍ସା ଫିଟନେସ ପୂରଣ କରନ୍ତି, ତେବେ ସେମାନଙ୍କ ପାଇଁ ଦ୍ୱାର ଖୋଲା ଅଛି।
Dharitri – Odisha’s No.1 Odia Daily
