ଦୁବାଇ,୨୯।୮: ଏସିଆ କପ୍ର ଏକ ମ୍ୟାଚରେ ଭାରତୀୟ ଦଳ ପାକିସ୍ତାନ ବିପକ୍ଷରେ ରୋମାଞ୍ଚକର ବିଜୟ ହାସଲ କରିଛି। ଏହି ବିଜୟର ହିରୋ ଥିଲେ ହାର୍ଦ୍ଦିକ ପାଣ୍ଡ୍ୟା। ହାର୍ଦ୍ଦିକ ପ୍ରଥମେ ଚମତ୍କାର ବୋଲିଂ କରିବା ପରେ ବ୍ୟାଟିଂରେ ମଧ୍ୟ ଭଲ ପ୍ରଦର୍ଶନ କରିଥିଲେ। ଶେଷ ଓଭରରେ ଭାରତକୁ ୭ ରନ ଆବଶ୍ୟକ ଥିଲା। ହାର୍ଦ୍ଦିକ ସହଜରେ ଏହାକୁ ହାସଲ କରିଥିଲେ।
ମ୍ୟାଚ ପରେ ହାର୍ଦ୍ଦିକ କହିଛନ୍ତି, ଏଭଳି ଟାର୍ଗେଟକୁ ପିଛା କରିବାବେଳେ ପ୍ରତି ଓଭରରେ ଯୋଜନା ପ୍ରସ୍ତୁତ କରିବାକୁ ପଡେ। ମୁଁ ଜାଣିଥିଲି ଆଗରେ ଜଣେ ଯୁବ ବୋଲର ଅଛନ୍ତି ଏବଂ ବାମହାତୀ ସ୍ପିନର ମଧ୍ୟ ଅଛନ୍ତି। ୨୦ ଓଭରରେ ଅଧିକ ଚାପରେ ବୋଲର ହିଁ ରହିବେ। ମୁଁ ଜିନିଷଗୁଡ଼ିକୁ ସରଳ ରଖିବାକୁ ଚେଷ୍ଟା କଲି। ଶେଷ ଓଭରରେ ଆମକୁ ମାତ୍ର ୭ ରନ ଆବଶ୍ୟକ ଥିଲା କିନ୍ତୁ ୧୫ ରନ ଆବଶ୍ୟକ ଥିଲେ ମଧ୍ୟ ମୁଁ ଏହାକୁ କରିଥାନ୍ତି।
ଏହି ମ୍ୟାଚରେ ଭାରତୀୟ ଦଳର ଅଧିନାୟକ ରୋହିତ ଶର୍ମା ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ଭାରତୀୟ ବୋଲରମାନେ ଏକ ଶକ୍ତିଶାଳୀ ପ୍ରଦର୍ଶନ କରି ପାକିସ୍ତାନ ଦଳକୁ ୧୪୭ ରନ୍ରେ ବାନ୍ଧି ରଖିଥିଲେ। ଏହି ମ୍ୟାଚରେ ଭୁବନେଶ୍ୱର କୁମାର ୪ ଏବଂ ହାର୍ଦ୍ଦିକ ପାଣ୍ଡ୍ୟା ୩ଟି ଉଇକେଟ ନେଇଥିଲେ। ଏହା ପରେ ୧୪୮ ରନ୍ର ଟାର୍ଗେଟକୁ ପିଛା କରିବା ଭାରତୀୟ ଦଳ ପାଇଁ ସହଜ ନ ଥିଲା। ଏକ ସମୟରେ ଦଳ ୩୪ ବଲରୁ ୫୯ ରନ ଆବଶ୍ୟକ କରୁଥିଲା। ଏଠାରୁ ହାର୍ଦ୍ଦିକ ପାଣ୍ଡ୍ୟା ଜୋରଦାର ବ୍ୟାଟିଂ କରି ଭାରତର ବିଜୟ ପକ୍କା କରିଥିଲେ।
