ନୂଆଦିଲ୍ଲୀ,୧।୧୦: ଭାରତ ଓ ପାକିସ୍ତାନ ମଧ୍ୟରେ କ୍ରିକେଟ ମ୍ୟାଚ ହେଲେ ରୋମାଞ୍ଚର କୌଣସି ଅଭାବ ରହେ ନାହିଁ। ଏବେ ଏସିଆନ ଗେମ୍ସ ୨୦୨୬ର ଫାଇନାଲରେ ଦୁଇ ଦଳ ପୁଣିଥରେ ମୁହାଁମୁହିଁ ହେବେ। ସେମିଫାଇନାଲରେ ବାଂଲାଦେଶକୁ ୬ ଉଇକେଟ୍ରେ ହରାଇ ପାକିସ୍ତାନ ଫାଇନାଲ ଟିକେଟ ହାସଲ କରିଛି। ଏବେ ଗୋଲ୍ଡ ମେଡାଲ ମ୍ୟାଚ୍ରେ ଭାରତ ସାମ୍ନାରେ ପାକିସ୍ତାନର କିଛି ଏଭଳି ଖେଳାଳି ରହିବେ, ଯେଉଁମାନେ ନିଜ ଦମ୍ରେ ମ୍ୟାଚର ଗତିପଥ ବଦଳାଇବାର କ୍ଷମତା ରଖନ୍ତି। ସେମାନଙ୍କ ମଧ୍ୟରେ ମାଜ ସାଦାକତ, ସାହିବଜାଦା ଫରହାନ ଓ ସୁଫିଆନ ମୁକୀମଙ୍କ ଉପରେ ବିଶେଷ ନଜର ରହିବ।
ମାଜ ସାଦାକତ ପାକିସ୍ତାନର ଜଣେ ଆକ୍ରମଣାତ୍ମକ ଓପନିଂ ବ୍ୟାଟର। ଦ୍ରୁତ ରନ କରିବା ସହ ଆବଶ୍ୟକ ପଡ଼ିଲେ ସେ ବୋଲିଂ ମଧ୍ୟ କରିପାରନ୍ତି। CPL ୨୦୨୬ରେ ତାଙ୍କ ପ୍ରଦର୍ଶନ ଚର୍ଚ୍ଚାରେ ରହିଥିଲା। ସେ ୭ଟି ମ୍ୟାଚ୍ରେ ୩୬୩ ରନ କରିବା ସହ ୨ଟି ଶତକ ହାସଲ କରିଥିଲେ। ଟୁର୍ନାମେଣ୍ଟର ଫାଇନାଲ୍ରେ ମଧ୍ୟ ସେ ୧୧୪ ରନର ଇନିଂସ ଖେଳିଥିଲେ। ତେଣୁ ଭାରତୀୟ ବୋଲରଙ୍କ ପାଇଁ ଆରମ୍ଭରୁ ତାଙ୍କୁ ରୋକିବା ଗୁରୁତ୍ୱପୂର୍ଣ୍ଣ ହେବ ।
ସାହିବଜାଦା ଫରହାନ ପାକିସ୍ତାନର ଅଧିନାୟକ ଓ ଓପନିଂ ବ୍ୟାଟର। ଭାରତ ବିପକ୍ଷରେ ତାଙ୍କ ପ୍ରଦର୍ଶନ ପୂର୍ବରୁ ମଧ୍ୟ ଦେଖିବାକୁ ମିଳିଛି। ଏସିଆ କପ ୨୦୨୫ରେ ଭାରତ ବିପକ୍ଷରେ ସେ ୫୮ ରନ କରିଥିଲେ। ଏହି ମ୍ୟାଚ୍ରେ ଯଶପ୍ରୀତ ବୁମରାଙ୍କ ବିପକ୍ଷରେ ମଧ୍ୟ ସେ ଛକା ମାରିଥିଲେ। ଏସିଆ କପ ୨୦୨୫ ଫାଇନାଲରେ ମଧ୍ୟ ଫରହାନ ଭାରତ ବିପକ୍ଷରେ ୫୭ ରନ କରିଥିଲେ। ତେଣୁ ଏସିଆନ ଗେମ୍ସ ଫାଇନାଲରେ ତାଙ୍କ ଉଇକେଟ୍ ଭାରତ ପାଇଁ ଅତ୍ୟନ୍ତ ମହତ୍ତ୍ୱ ରଖିବ।
ବାଂଲାଦେଶ ବିପକ୍ଷ ସେମିଫାଇନାଲ୍ରେ ପାକିସ୍ତାନର ଆରମ୍ଭ ଭଲ ହୋଇନଥିଲା। ୧୧୨ ରନର ଲକ୍ଷ୍ୟ ପିଛା କରୁଥିବା ପାକିସ୍ତାନ ୫୩ ରନ ମଧ୍ୟରେ ୪ଟି ଉଇକେଟ୍ ହରାଇଥିଲା। ଏହାପରେ ଅବଦୁଲ ସମଦ ଓ ହସନ ନୱାଜ ପାକିସ୍ତାନର ଇନିଂସକୁ ସମ୍ଭାଳିଥିଲେ।
ଦୁହେଁ ଅପରାଜିତ ରହି ୫୯ ରନର ଭାଗୀଦାରି କରିଥିଲେ ଏବଂ ୧୧.୩ ଓଭରରେ ପାକିସ୍ତାନକୁ ୬ ଉଇକେଟ୍ରେ ବିଜୟୀ କରାଇଥିଲେ। ସମଦ ୧୫ ବଲରେ ଅପରାଜିତ ୩୦ ରନ କରିଥିବା ବେଳେ ହସନ ନୱାଜ ୨୨ ବଲରେ ଅପରାଜିତ ୨୭ ରନ କରିଥିଲେ।
ସୁଫିଆନ ମୁକୀମ ପାକିସ୍ତାନର ବାମହାତୀ ରିଷ୍ଟ ସ୍ପିନର। ଉଇକେଟ୍ ନେବାର କ୍ଷମତା ରଖୁଥିବା ମୁକୀମ ବାଂଲାଦେଶ ବିପକ୍ଷ ସେମିଫାଇନାଲରେ ୩ ଓଭର ବୋଲିଂ କରି ୨୬ ରନ ଦେଇ ୩ଟି ଉଇକେଟ୍ ନେଇଥିଲେ। ତେଣୁ ଫାଇନାଲରେ ଭାରତୀୟ ବ୍ୟାଟରଙ୍କୁ ତାଙ୍କ ସ୍ପିନ ବିପକ୍ଷରେ ସତର୍କତାର ସହ ଖେଳିବାକୁ ପଡ଼ିପାରେ। ଏସିଆନ ଗେମ୍ସର ଗୋଲ୍ଡ ମେଡାଲ ମ୍ୟାଚରେ ମାଜ ସାଦାକତ, ସାହିବଜାଦା ଫରହାନ ଓ ସୁଫିଆନ ମୁକୀମଙ୍କ ପ୍ରଦର୍ଶନ ଉପରେ ବିଶେଷ ନଜର ରହିବ।